Meeting Minute-a Lang

A hmasa berah chuan MZP-in Pathian Nia meeting minute an hal kha NGO pakhat hal tur a nih rau rau chuan CYMA-in hal se ka lo ti deuh a. Anni hi kan hnam enkawltu, kan ruang zalhna tur thleng pawha an kuta kan dahte an ni a. Tuna ramri buaiahte hian NGO zawng zawng kaihruaitu turah ka lo ngai deuh a.

 Engpawhnise, meeting an neih zawha Karimganj leh Mamit DC te’n chanchinbu mite hmaa an inlan khan, Karimganj DC khan ramri chungchang chu, “sawrkar thutlukna siam tur a ni, district thuneitute siam tur ni loin,” a ti a. Chutiang deuh bawkin Mamit DC chuan, “Level sang zawkin hun remchangah an la sawi ang,” a ti bawk a.

 Kan Chief Secretary, Pu Chuaungoa’n Zoram Mipuite Hriat atan leh Ngenna tih a ziah, social media-a an thehdarhah khan, “Boundary leh kan police dah sawn chungchang chu DC levela sawi fel chi a ni lo,” tiin Mamit DC a hrilh thu a ziak a. Hetih lai hian meeting minute kan thlir chuan ramri chungchang an sawi ngei tih erawh a lang. Agenda pakhatna a ni.

 Pu Chuaungoa’n a ziakah, “Mamit DC phei chuan Karimganj DC-in agenda a rawn rawtte chu ṭha a tih loh avangin meeting neihpui loh mai a duh,” tih a sawi a. Hetah hian Mamit DC hi ding nghetin, Karimganj DC agenda siam hi ka sawipui ve thei lo, ti ta se, tuna boruak sosang leh hi pumpelh theih a nih bakah, he ti tak hian a hming chhe lo tur a ni a. Amaherawhchu, Pu Chuaungoa’n, “Meeting neihpui huphurh leh tlanchhe zawk anga lan a ṭha lo,” a tih avang leh, 'A duh ang ang agenda siam ve tura' a tih vang chuan a pu thu awihin hreh tak chungin Mamit DC chuan meeting a neihpui tih a lang a ni.

 Agenda pathum leh thutlukna pahnih an siamte hi kan en chuan thutlukna pahnihte hi ramri inchuh thil a ni lo ve ve tih a lang a. “Mizoram Police Force te Choto-Bubirbond leh Medlicherra Area, Karimganj District, Assam aṭanga hnuhkir” tih Karimganj DC agenda pakhatnaah hi chuan thutlukna siam a ni ve lo. Mamit DC-in a pawm lo tihna a ni.

 Ni e, Mamit DC hian pawm se chu kan tawlh duai duai mai dawn a. Amaherawhchu, Karimganj agenda chu pawm lo pawh ni se, meeting minute-a a lan danah chuan Karimganj DC-in na taka Mizoram Police te chu “Choto-Bubirbond leh Medlicherra Area, Karimganj District, Assam atanga inhnuk kir tura ngena, a nawr” aia nasa mahin, Mamit DC chuan, kan ramah kan awm a, kan ram aṭangin kan inhnuk kir lo ang, han ti pap pap mai se la chu meeting minute-ah a chuang ve hlauh mai thei. Amaherawhchu, vanduaithlak takin Mamit DC chuan, “Mizoram Armed Police force te chu, chu lai chhehvelah chuan dahin hmun an khuar thu leh chu lai chhehvela awm chu remna leh muanna vawn nan a ṭul thu” chauhin a chhang a. Hetiang chauha chhân hian Mizote min tilang dawih em em a ni.

 Hei bakah hian, Karimganj DC-ina Mamit district thuneitute hnenah “Mizoram Police Force te inhnuhkir hunbi tuk tura a ngen” pawh khan hunbi an tuk theih loh thuin an chhang tih minute-ah kan hmu. Hei pawh hi, hunbi tuk a ngai lo, kan ramri a ni, han ti pap pap se la, chuan dawih hmel tak chuan kan lan a rinawm loh leh ang.

 Engpawhnise, Pu Chuaungoa lehkha aṭang chuan Cachar leh Karimganj DC te’n meeting neih hi an rawt a ni a. Chutiang a nih chuan an meeting rawt, minute pawh anmahni ziah ngei tur meeting chu intihlarna’na program siam, publicity stunt, mai a ni tih minute an ziak tak danah a lang chiang ta em em a. Karimganj district thuneitute lamin Mamit thuneitute chu inhnukkir tura an nawrna minute a ni ta ringawt mai a ni. An khaw mipuite mit an tlung ngawt ang.

 Hetiang a nih avang hian a tir aṭangin Mamit DC thusawite chu Mizo lawm zawnga minute-sak an tum lo hrim hrim tih a rin theih. Pu Chuaungoa pawhin, “Mamit DC thusawite an ziak lang kim lo” tiin, pawi a tih thu a sawi rêng a ni. Amaherawhchu, meeting minute hi, a pawm tih lantir nan Mamit DC-in a hming a ziak tlat mai a. Hei hi pawi ta chu a ni.

 A tirin Karimganj DC meeting neihpui leh pui loh amah Mamit DC kutah a awm a. A pu, Chief Secretary-in meeting neihpui tura a tih vangin hreh tak chungin a neihpui a. A tawpah, meeting minute darh zau tak tur chu, ṭha a tih loh chuan, hming ziah hnan lo thei dinhmunah a ding leh a. Hming a ziah hnan leh a. A pawi tak zet a ni.

 Pu Chuaungoa’n “ram” emaw “hnam hmelma ang dawn dawna inpuh hi ti lo turin ka ngen e," a ti ang deuh khan Mamit DC leh Pu Chuaungo hi hnam hmelma an ni lo. Nakin zelah pawh, Pathian zarah, hnam hmelma an nih a rinawm loh. Amaherawhchu, tuna meeting neih chungchangah hi chuan an putu hian an che ṭha tawk lo a. Han ṭang leh deuh se la. Chhuanlam siam loa mahni inenin han thawk tak tak se la, Mizote lan dan (image) hi han siam ṭha leh teh se.