ANNI LEH KEINI (CMRF FOR COVID-19) TIH KHA
Vanglaini May 25,2021-a V. Lalchhanchhuaha’n a chunga thupui hmanga a rawn ziak kha ka lo chhiar ve a. Kha thu ziaka a landanah kha chuan Mizo mipuite chu kan sual hlein a lang. Hetiangin a sawi a, “Opposition party-ten sawrkar ṭanpuina atana CMRF-a chhanglet tura tlangau chu sawiloh, mipui hnenah CMRF chu chhang let lo turin beihpui an thlak mek thung,”a han tih chiah phei kha chuan min barakhaih hle mai. Ka rilru chuan, ‘a tiha tihngeih loh, eng party-ten nge maw beihpui lo thlak aw!’ ka ti a. Ram inpumkhatna lam hawi lo lutuk thu ka hriat khan min ti thinur a ni. Ka inhnemna erawhchu, opposition party-a mi ṭhenkhatte hi chu an firfiak deuh pawh a ni ang, chutiangin he thu ziaktu pawh hian a ziak uar deuh a ni em ang chu tiin ka inhnem ta a ni. A ziak ang tawpa hripui dolet kawngah sawrkar leh opposition te beihpui thlaka an indo a nih ngat chuan, Mizoram chuan kan chhiatpui nasa hle ang. Isua’n, “Khawi ram pawh mahni indo apiang an boral ṭhin,” a ti si a (Matt.12:25).
Ramin indona rapthlak a hmachhawn lai te, hripui, ṭampui leh chhiatna rapthlak eng eng emaw a tawh lai chuan, chu chhiatna laka ram a him theih nan ram mipuite chu politics-a party hran nihna rilru te, kohhrana pawl hran nihna rilru te leh chi leh kuang inlak bingna rilru ang chi reng rengte chu dah bovin, inthurual takin ram ral do chu do tur a ni. Keini pawhin chutianga kan tih loh chuan tuna kan do mek covid-19 hi engang fakauvin nge kan chhiatpui dawn hriat phak a ni lo. Tun ang hun, hun ṭha lo lai tak hi chu, ruling lam tan pawh, ruling rah zawn hun (hunting of money) a ni lo va, hri laka kan him tlan theihna tura beih hun a ni. V. Lalchhanchhuaha’n state dang dangte tih dan bengvarthlak tak a rawn ziak hi a lawmawm hlein ka hria.
Ram pum ṭanrual hunah hian, kan roreltu, ruling party a mite hi hmahruaitu pawimawh ber an ni a. Ram inpumkhat zawnga hma an hruai thiam chuan, party nihna anga inep lovin, ram hmelma (hripui) beihna kawngah pawh theihtawp chhuahin kan ṭangho mai tur niin a lang a. Amaherawhchu, nikum lamah khan, hripui dona kawngah party inbeihna rilru puin, opposition lam mite chu a tiṭha leh langsar an ni ang tih an hlau nia puh theihin.
(a) Hri kai leh kai loh enna khawl indaih lova sawrkarin mi ta a hawhkhawm lai khan Pu Lalduhawma MLA-in, RT-PCR khawl hi sawrkarin a mamawh chuan a lei theih thu leh chawlhkar khat chhunga a tihthlen theih thu a hrilh a. Mamawh lova an insawi avangin a lei ta lo va.
Tin, Pu Zodintluanga MLA chuan Lunglei Civil Hospitala hman turin a leia a pe tawp a. Chu pawh chu lawm taka dawng ta lovin, hman tuma han sawngbawl eih pawh awm lovin a awm ta ngar ngar a. Pi Lalrinpuii mangangin Prime Minister hnenah lehkha thawnin, RT-PCR khawl Pu Zodintluanga MLA-in, Lunglei Civil Hospitala hman tura a pek hman lohva awm reng chu hman theih tura siam turin a ngena. Pi Lalrinpuii ngenna chu a hlawhtling ta nia ngaih theihin, hma an la ta niin kan lo hria a lawmawm hle a ni.
(b) Nikum lamah khan sawrkar hruaituten Covd-19 dona kawnga ram mipuite ṭanrualna kawnga lawmthu an sawinaah opposition party lam hi an sawi tel va ngai lova. Opposition MLA-te pawh pawisa nuai tel tehmeuh thawhtute an ni vein, ramri a tlawmngai duty-tepawh an tlawh ve zak zak a, an ṭanpui ve tepawh kha a ni si a. A hranpa taka an thiltihte sawi lan chu an phut hauh lova, hri dova ram pum ṭan rualnaa tel hlawm hrang zawng zawng sawi lanna-a an tel ve ngai lo erawh kha chu mak an ti a ni. Kha’ng thilte khan nghawng ṭha lo deuhhlek kal zel a nei em ni ang aw? a tih theih.
Awle, khang thil kal tawhah khan, kan thiam tawk lohna leh lungawi lohna a awm pawhin sirah hnawl ila. Kan sawrkar hruaituten ram mipuite-ah fa tak leh fahrawn thliar miah lovin mipuite min han hruai sela. Opposition lam pawhin khua leh tui ṭha leh rinawm nihna kengin, tihtak zeta ṭawngṭaina nen he kan hripui inluling tak hi hneh ngei turin ṭan i la sauh sauh ang u le. Lal Isua’n, “ in zinga mi pahnih, an thil dil kawnga an thurual chuan, ka Pa vana mi tihsakin an awm ang. Mi pahnih emaw, pathum emaw ka hminga an inkhawmna apiangah chuan, an zingah ka awm si ṭhin a,” (Matt.18:19,20) a tih kha.
Rev. Darchungnunga