LUNGLEI A RT-PCR KHAWL DAH TURIN BUILDING THAR SAK A NGAI; FALKAWN-AH A NGAI VE LO?

"Lunglei Civil Hospital-a RTPCR khawl dah hi sawrkar hian a ngaipawimawh em em a, nimahsela, RTPCR khawl awm ringawt hian he khawl hi a hman theih tihna a ni lova, a dahna tur, laboratory building hranpa, ICMR in a pawm thlap neih phawt a ngai a, hun reilote chhung a chutiang building neih chu thil harsa tak a nih avangin mawlmang taka lo au chhuah ve mai mai hi thil sawtsawhlawt a ni lo tih mipuiten i hria ang u" (- MNF Party Press Release - Dt. 28.5.2021)

MNF Party thu­chhuah a an sawi ang hi chuan RT-PCR khawl dahna tur laboratory hi building thar hlak, Indian Council of Medical Research (ICMR) in a pawmpui thlap a sak chawp ngai, thil harsa tak niin a lang a. Hetiang a nih hi chuan Lunglei a RT-PCR dahna tur laboratory hi sawi ang ngawta awlsam a ni dawn hauh lo tihna a ni. A building sakna tur project thehluh chauh a la nih bawk si avangin Covid-19 hripui len chhung hian Lunglei a RT-PCR khawl awm reng hi kan hmang hman lo mai ang tih hlauhawm tak a ni ta.

Mahse maw
Covid-19 sample test-na tur laboratory (BSL 2/3) hi hetiang taka hautak, ICMR pawmpui building thar hlak sak ngai ni a an sawi lai hian Falkawna Covid-19 testing laboratory awmna hi building thar a ni hauh lo thung a. Laboratory awmna hi District TB Centre building awm sa, OPD leh TB ward zawng zawng nena awm kawp sa vek a ni tlat nia.

Falkawna Covid-19 testing labo­ratory hi a tirah phei chuan TB veite dah­khawmna floor chung chiahah a awm ṭhin a. May, 2021 thla tir vel aṭang khan building chung berah, OPD chung chiahah an insawn chauh a ni; Building thar an sa chuang hauh lo nia. Building awm sa, TB veite awmna ward leh OPD te nen building khatah an la awm ho vek tho a ni.

A mak ṭhin ngawt mai! Lunglei Civil Hospital leh Falkawn Referral Hospital tan hian 'Guidelines a awm hrang' nge mawni dawn le?

C. Lalhriatpuia