RT PCR Politricks

Khawvel pumah Covid 19 hri leng vangin kum khat chuang zet harsatna a thleng tawh a. Kumina hri leng thawh hnihna thleng mek chu ram dang zawng aiin India-in a tuar na zual a, Mizoram pawh a tuar na ber zinga mi niin, thla khat chuang zet inkharkhip a ni tawh chungin hri kai hmuh chhuah zat a la tlahniam hleithei rih lo a ni.

Mithiamte sawi danin, hri hi a kai hmuh chhuah ran a nih a, enkawlna an dawng vat a nih chuan harsatna lutuk tuar lovin a dam leh mai theih a. Chuti ni lova, hmuh chhuah har a nih a, enkawlna an dawng vat lo a nih chuan taksaah bu a lo khuar nasa tawh a, enkawl dam a har bakah enkawl an nih chhungin harsatna chi hrang hrang an tawh theih phah a ni.

Mithiamte sawi anga hri kai hmuchhuak zung zung tur chuan a enna khawl neih tam a ngai a, Mizoramah chuan nikum lama ZMC-a RT PCR khawl bun bak RT PCR khawl hi vawiin thlengin hmun dangah kan la neih belh leh ta rih lova, ZMC-ah hian RT PCR khawl hi 4 a awm tawh a, District hrang hrangah pawh TrueNat Laboratory an tih mai, TRUELAB QUATTRO chu kan nei vek tawh bawk a, tun dinhmuna hri kai leh kai lo kan endikna tam ber chu Rapid Antigen Test niin, hei hi zaa za rintlak a ni lo tih mithiamten an sawi thung a ni.

Mizorama khawpui lian ber dawttu Lunglei mipui mamawhna hria-in Thorang bialtu MLA, MPCC Treasurer nibawk Pu Zodintluanga'n Lunglei Civil Hospital-a hman tur nikum June ni 26-a RT PCR khawl a pek chu vawiin thlenga hman theih a la ni ta rih lova. Lunglei tana MLA pakhatin RT PCR khawl a pek chungchang hian a pek tirh atanga vawiin thlengin ti ti a titam hle a, tu emawin RT PCR khawl pek chungchangah 'a petu rilru lah dik hek lo, a dawngtu rilru lah dik hek lo' a tih chu a dik leh dik loh hre lo mah ila, mithenkhat ngaihdanah chuan MLA pakhat-in RT PCR khawl hmanga Politics a khelh hi a tum angin a hlawhtling hle niin a lang mek a ni!

Lunglei tana RT PCR khawl pek hi hun engemawchen khawih chet a nih loh hnuah May ni 7 khan Health and Medical Education Director chuan Lunglei-a RT PCR hi bun turin hriattirna a tichhuak a. Hemi ang hian May ni 10 khan Microbiology Laboratory-ah dahluh a ni a, vawiin thlengin hmasawnna erawh a la awm zui ta rih lo a. May ni 20 zan chanchin thar lamah Health and Medical Education Director, Dr. T. Lalhmangaihi chuan, Lunglei-a RT PCR khawl bun nan hian NEC-ah cheng vbch. 7 leh nuai 8 dil a ni tih a sawi a. Chumi atan chuan DRP siam niin, NEC lamah thehluh a ni tawh tih a sawi bawk a, hei hi Microbiology Laboratory dinna tur a ni a, a sawi ang hi a hlawhtling a nih pawhin a taka hman theih hun chu a la hla deuh dawn niin a lang a, tunhnai maiah chuan mipuiten an la chhawr ṭangkai thei dawn rih lo tihna a ni.

Hetiang a nih mek lai hian Lunglei Sub-Headquarters YMA chuan, Health Minister, Dr. R. Lalthangliana chu lehkha thawnin, Thorang bialtu MLA, Pu Zodintluanga'n Lunglei Civil Hospital-a dah tur RT-PCR khawl a pek chu a hma thei ang bera bun turin an ngen a. RT-PCR khawl bun nan Civil Hospital Lunglei chuan duhthu a sam zo lo a nih pawhin, mipui manganna leh mamawhna avangin ngaihhnathiamna nen hma a laksak theih an beisei tih an sawi a. He lehkha hian ICMR inkaihhruaina avanga RT-PCR khawl bun a harsat thua Mizoram Sorkar insawifiahna chu an pawm lutuk lo tih a lang niin a hriat theih a ni.

Engpawh ni se, hri leng do letna kawngah Sorkar-in theihtawp a chhuah a, theih chu ni se hmanraw tha ber ber hmanga thawktute thuam pawh a duh ang tih a rinawm a. Chutihrual chuan, sum leh pai harsat vangin an duh ang leh tum angin an che thei bik lo tih hriatpui a ṭha a. Politics hmanga inchirhtheh lam phei chu tih hauh loh tur niin a lang a.

Tuna Mizoram dinhmun thlir hi chuan hri kai leh kai lo endikna khawl hi a tam thei ang ber kan va mamawh tehlul em!

Samuel Lalruatsanga