LUNGLEIAH RT-PCR DAHNA TUR BUILDING THAR A NGAI BIK EM NI?

Congress sorkar liam ta khan Falkawn Referral Hospital din thar lehin, awm lo ata Medical College MIMER a din a. Damdawi lam zirna In sang atana ruahman a nih angin khawl ṭha tak tak tam tham tak a dah zui a, khawvel huap pawha bungraw ṭha a ngaihin a thuam a. Cheng tam tak sengin Oxygen Plant a siam bawk a, District Hospital a Oxygen Plant zawng zawngte hi NEDP suma lei vek a ni nghe nghe. Hengte hi Covid-19 veite enkawlna kawngah pawh an ṭangkai zui hle a ni tih hretute chu Mizoram mipui kan ni a.

May 18,2021 a ICMR (Indian Council of Medical Research) tarlan dan chuan Mizoram hian RT-PCR hmanga Covid-19 test-na laboratory 1 a nei mek a. RT-PCR khawl hi ZMC-ah 4 a awm mek a, mahse Laboratory 1-ah an dah vek avangin vanduai thilah thawktute’n Covid-19 hri an lo kai palh a nih chuan ZMC Lab. hi khar zeuh zeuh a ngai ṭhin a nih hi. Hei hian Sample Test tur nasa takin a tikhawtlai ṭhin a ni. ZMC Lab a RT-PCR khawl 4 te hi hman vek ni loa sawi pawh a awm; khawl 4 dahna turin Laboratory saw a zau ṭha tawk lo pawh a ni thei.

Tuna RT-PCR khawl hmanga Covid-19 Sample Test-na hmunpui an tih ZMC Laboratory an tih hi ZMC bul a District TB Centre (DTC) building a mi saw a ni a. Covid-19 len tirh aṭangin DTC Building-ah sawn an la inkulh char char a; TB vei te nen building pakhatah Covid-19 hri len tirh aṭangin an dah ho a. District TB Centre Building a an inkulh tlat avangin TB umbo tura hmalaknain a tuar hle tawh tih pawh i hria ang u.

Nikum (2020) June 26 a chhim lam mipuite tana MLA Zodintluanga’n Lunglei Civil Hospital a dah tur a pek (donate) pawh kum 1 dawn an dah mai mai a. Sorkarin hman theih tura bun (install) tur tiin Order chhuah zeuh zeuh mahse, hmuh theia hmalakna a awm chuang lo. Covid-19 hri enna rintlak ber zing a mi RT-PCR hi Lunglei mipui tan chauh a ni lo, chhimlam mipuite tana ṭangkai thei tak tur a ni a. Covid-19 hripui len loh hnuah pawh natna dang chhui (investigate) nan ṭangkai taka hman theih zel tur khawl a ni. Chutiang khawpa khawl ṭha leh ṭangkai a nihzia hriain Lunglei Sub.Hqrs YMA pawhin bun (install) a nih thuai theihna turin May 28,2021 khan Health Minister hnenah ziakin ngenna an thehlut hial a ni.

Hriselna thil hi party mita thlir lova mipui nawlpui hamṭhatna a nih theihna zawk dah pawimawh a ṭul zia hriain Lunglei MNYF.Sub Hqrs. President pawhin, “Kan dinhmun en hian Lunglei hian RT-PCR khawl hi a mamawh tak zet tawh niin a lang a. Pu Zodin­tluanga'n a khawl bakah ṭul leh mamawh dang pawh a rawn pek ang hian kan ruling lam MLA te hian khawl hi a rang lama hman a nih theih nana hma an lak a ngai takzet a ni. Covid 19 hripui hneh tur hian i ṭangrual phawt ang u, hri reh hnuah politics ah chuan kan la inbei leh zawk dawn nia” a tih hi a mawi khawp mai.

Hripui rawn len ṭan tirha Covid-19 Test-na atana District TB Centre TB Lab BSL-3 an buatsaih kha, kum 1 dawn an hman hnuah kumin (2021) March thla aṭangin a building ngai tho, DTB Centre building chhawng chung berah ICMR sum pekin Covid-19 Test-na BSL-2 an siam a. Party pakhatin “Laboratory building hranpa” neih ngai anga an thuchhuah (Mizo National Front, Sub Hqrs. Lunglei Press Release No 40 of 2021. Date. 28th.5.2021. Lunglei) a an tarlan khan belhchian a dawl lo hle.

Kan sorkar hian tun hripui len laiin thildangah tender a chhuah thei a, party mi te tan contract a sem thei bawk. Heng aia pawimawh, hripui do kawngah hian ke a chhep muang deuh a, RT-PCR khawl dahna turah pawh a harsatna thu hlir a sawi mai hi eng nge a awmzia? Khawl bun a harsat thu hlir an naute an theh darh tir mek laiin Community Spread dinnhmun kan thleng ta chu a ni a. Khinga an sum sen ai khian, RT-PCR khawl bunna tur mipui mamawh hmasa hi a buaipui thei lo em ni?

Mizoram sorkar hian tum tak tak ni se, thla 14 chhung khan building sa chawp pawhin Lungleiah hian BSL-2 Laboratory a din thei ang. May 21, 2020-a Nagaland CM-in Naga Hospital Authority Kohima (NHAK)-a BSL-3 Laboratory a hawn pawh kha ni 32 chhunga siam zawh vek a ni a.

Dr. Lallianchhunga