SEDP-a Outdoor Gym siam aiah ṭanpuina

A hunlaia sawi hlawh tak cheng nuai 60 man Outdoor Gym (Open Gym) chungchang kha Google aṭangin ka en nawn leh mai mai a, Feb 26, 2021 mai khan kan sorkar hian SEDP aṭangin cheng nuai 60 zet man kha Outdoor Gym a lo siam tih chiang takin I&PR Website lamah a hmuh theih a ni.

Press Release No.7641/2020-2021 lama thu inziak ṭhenkhat hi a ngai ngaiin zuk la chhuak ila: "Sports & Youth Services Minister Pu Robert Romawia Royte chuan khuallian niin tukin dar 7:30 khan R.Dengthuama Indoor Stadium, Mualpui-ah Mizoram sawrkar flagship programme “Socio-Economic Development Policy (SEDP)” kaltlanga siam insawizawina Outdoor Gym (Open Gym) a hawng," tih a ni a, a thu kal zelah hian, "MINECO tri-junction a outdoor gym chu nitin darkar 24 chhung mipuite hman theih turin hawn a ni dawn a ni tiin. hetiang outdoor gym hi a tahtawlin Mizoram chhunga district zawng zawngah dah kan tum a ni, a ti bawk," tih a inziak tel bawk a ni.

A ngai ngai hian la chhuak zui ta zel ila, "Outdoor Gym (Open Gym), R. Dengthuama Indoor Stadium hi SEDP 2019-20 sum hmanga siam a ni a, Mapuia Enterprise, Ritz Market, Dawrpui, Aizawl chu supply leh installation hna thawk tura thlan an ni. Project cost hi Rs. 60,00,000/- a ni a, hetiang hian sum sen a ni.

Gym equipment - Rs. 55,70,000/-
Site preparation & installation - Rs. 4,30,000/-
TOTAL - Rs. 60,00,000/- "
tih a in ziak a ni.

Kan Chief Minister Pu Zoramthanga hian budget chungchang a sawi khan, 'Kan duh chuan kan kang thei a, kan duh chuan kan bai thei' ti ang deuva a sawi hi a video ka en fuh tawh a, sorkar kum hmasaa budget pawh kha an hman duh dan hrang hrang kan lo hmu ve hlawm a, SEDP hnuaia pawisa dah kha Department ṭhenkhat ah khan an hmang nasa hle a, Department ṭhenkhat tan khan an bai ve lova, a ṭhenah chuan an kang bawk a, an chhum pawlh bawk a, an hmanna hi chu sawisel theih a ni lova sorkar thu thu a ni a, tuna pawisa la awm ang ang hmanna tur hi chu mipuite hian citizen kan nih angin kan sawi ve thiang a ni.

March 1, 2021-a Finance Minister Budget Speech ah khan, "State Budget aṭangin cheng vaibelchhe 400.00 SEDP hnuaia hna hrang hrang thawh nan ruahman a ni," tih kan lo hmu a, hei hi Covid-19 avanga mirethei ṭanpuina atan hman theih a ni ve dawn em? District Headquarters khawpuia mirethei harsa tak tak, thingtlang anga lova eizawng tura chhuahna nei ve lo leh chhuak thei lote tan hian chhawmdawlna package a pek theih em? Khawpuia chhungkaw harsa zual mi 20,000 hi Rs 5,000 den den pawhin ṭanpui ta se cheng vaibelchhe 10 bak hman a ngai dawn si lova tiin rawtna ka siam ve duh a, Aizawl ni lo District khawpui dang 10-ah hi chuan Out Door Gym din tawh lovin khawpuia miretheite ṭanpuina atan hmang se, cheng nuai 60 zela District 10-a senso tur hi vaibelchhe 6 a ni ang a, vaibelchhe 4 belh lehin SEDP aṭang hian puih mai rawtna hi ak zat hnih hnuai lam hian kan rawn siam a ni.

Lalremruata