Damdawi In Bawlhhlawh

Hospital bawlhhlawh leh thli (bio-medical waste) kan sawngbawl danah ruahmanna mumal a awm loh ṭhin avanga mipuiin kan tawrhna hrang hrang awm thei te chu kan hre chho deuh deuh zel niin a lang a. A bik takin kan Damdawi In lian Zoram Medical College (ZMC), Civil Hospital leh Presbyterian Hospital (Durtlang) ten tihdam hna theihtawpa an chhuah mek lai hian mihring damlaite tana hri hlauhawm an thlen tir theih dan (environmental impact) hi kan chhut tel a ṭul ta hle.

Tun dinhmuna Damdawi In bawlhhlawh kan sawngbawl dan han en hian hnawhsarum taka Damdawi In kan din rumrum zia a lang ṭan a, Lungphum ringawt lo deuh kan ngaihtuah tel a ṭul ta hle. Mihring taksa (human tissues, organs, body parts) te pawh bawlhhlawh dang nen kan thliar hrang lem lo fo tawh ṭhin va. Damdawi In hmanrua Waste Sharps kan tih mai (needles, syringes, scalpels blades, glass etc) te pawh chemical treatment pe lem lovin kan bawlhhlawh pangngai paih hmiah hmiah mai bawk ni a sawite hi tak tak a ni em?

Chutiang zelin human anotomical waste bakah, laboratory thli, enchhinna hmun, research neihna hmuna mihring leh ran taksa hrang hrang (microbiology & biotechnology waste) te, damdawi in thli zawng zawng (solid & liquid waste) te, chemical waste kan tih thleng hian Dan-in a sawi ang lovin, a remchan dan ang angin kan thehthang nia Social Media-a lo lang hi enchian a ngai hle.

Dan-in a sawi ang chuan:-
Ministry of Environment and Forest (Govt. of India) chuan Environment (Protection) Act. 1986 (29 of 1986) tlawhchhanin Bio-Medical Waste (Management and Handling) Rules 1998 chu India ram puma hman turin dt. 20th July, 1998 daih tawh khan notification a lo chhuah tawh a. Mizoramah pawh he Rules hmang tur hian dt 3rd February, 2000 khan Mizoram sorkar pawhin notification a lo siam ve tawh bawk a ni.

Hei hi tihlawhtling tur leh Dan ina a phut angin Mizoram state-ah pawh Prescribed Authority-ah Environment & Forest Department-a PCCF chu ruat a han ni ve nghal phawt a, awmze neia hmalak chhunzawm nise a duhawm hle.

Bio-Medical Waste (Management & Handling) Rules 1998 in a phut ang chuan- India ram pum State/UT tinah Advisory Committee din a ni anga, chutah chuan hetiang lama mithiam- damdawi leh hriselna lamah te, animal husbandry & veterinary sciences, environmental management, municipal administration bakah hetiang lam kaihhnawih sorkar department emaw, tlawmngai pawl (NGO) te chu he Committee-ah hian an tel ang a. Chu Committee chuan state/UT sorkarah thurawn/rawtna an thlen ṭhin ang tih a ni.

Tin, heng bakah hian Prescribed Authority hnenah kumtin January ni 31-ah Annual Report an thehlut ṭhin a nga. Ani chuan Central Pollution Control Board-a thlen ṭhin tura tih a ni a. Heng bakah hian Dan in a phut engemawzat a awm bawk, sawi kim vek lo ang.

Damdawi In thli/ bawlhhlawh (bio-medical waste) han tih hian Hospital mai bakah Nursing Home te, inentirna hmun (clinic) dispensary, veterinary institution, ran talhna hmun, pathological laboratory leh blood bank aṭanga mihring hriselna tichhe thei thil chhuak zawng zawng a huam vek a. Tin, heng bawlhhlawh phurh sawn (transportation, packaging & storage) chung changah te pawh Bio-Medical Waste (Management and Handling) Rules 1998 hian felfai takin a hung vek a ni.

He Rules hi siam ṭhat ngai laite siam ṭhain dt 2nd June, 2000 khan notification chhuah leh nghal a ni a. Chumi ang chuan Bio-Medical Waste (Management and Handling) (Second Amendment) Rules 2000, tih a ni ta a ni. Tichuan he rules kengkawh tur hian State Pollution Control Board chu mawhphurtu a ni ta bawk.

Bio-Medical Waste (Management and Handling) (Second Amendment) Rules 2000, Rule 5 (schedule vi)-in a tarlan ang chuan-

* Hospital leh Nursing Home, khawpui mihring nuai 30 leh a chung lam chenna chin chuan he rules hi December 31, 1999 emaw, a hmain an hmang tur a ni a.

* Mihring nuai 30 chenna hnuai lam, Damdawi In khum 500 leh a chung lam awmna chin chuan December 31, 1999 emaw, a hmain.

* Khum 200 chung lam, 500 hnuai si (Civil Hospital leh Durtlang Hospital angte) chuan December 31,2000 emaw a hmain.

* Khum 50 chung lam, 200 hnuai si te chuan 31 december, 2001 thleng emaw a hmain.

* Khum 50 hnuai lam leh a chunga tarlan loh bio-medical waste ti chhuak ve tho institution etc. te chuan December 31, 2002 emaw a hmain he rules hi an zawm ngei tur a ni, tih a ni bawk.

BMW Rules hi kum 2016 khan tih danglam niin, chumi ang chuan kum tin State Pollution Control Board-ah Damdawi In hrang hrangte hian annual report an thehlut ṭhin a, a ṭul anga endik ṭhin an ni. Tun dinhmunah common treatment facility, inhmanṭawm tur awm lo hi kan mutan ber niin a lang.

He Rules ṭha tak mai hian mihring hriselna turin kiltinah a hung felfai em em a. Chumi tihlawhtling tura hmalakna sawi tur awm mawlh mawlh sela a duhawm hle. A fawng vuantute mipuiin kan thlir reng a ni.

Roṭhuama Sailo, Green Mizoram Network (GMN)