SAWRKAR A CHE TA E

Covid19 thawh khatna dona kawnga Mizo mipuite ṭanrual dan leh State dangte fak hial khawpa kan Sawrkar hma lakna kha a lawmawm tak zet a ni. Kuminah a thawh hnihna lo thleng lehin nikum lam aiin nasa takin a hluarin thi leh hri kai mek pawh kan pung chak nasa ta hle mai, mithiamten a thawh thumna lo thleng leh mai thei awmin an la sawi cheu.

Hetih lai hian Sawrkar hmalakna duh khawp lohna leh sawiselna Social media-ah leh Print media lamah a tam hle mai a. Sawiselna ṭhenkhatte chu a awm viau laiin ṭhenkhat dang erawh chu Pol.party in an loh vang leh rorel lai sawisel chak hrim hrim vang te pawh a ni hlawm awm e. Covid-19 kaihhnawiha Sawrkarin hma la nghal mai tura mipuiin an beisei, mahse hma a lak mai si loh leh tun hnaia Sawrkar hma lak takna point pathum leh a behbawm han tar lang ila.

1.RT-PCR Lungleiah : Sawi hlawh tak, nikum June thla-a Opposition MLA pakhatin Lunglei Civil Hospitala dah tur RT-PCR khawl a pek, Sawrkar pawhin a dawn (received) diam tawh chu kum khat dawn hnuah, dah (install) vat tura thupek hmanni khan a chhuak ta-a, a lawmawm hle tho mai. YMA Sub-Hqrs Lunglei pawhin chak taka hma lak ni se an duh thu thuchhuah an siam nghe nghe a.

RT PCR khawl, chhim lam mipuiten an mamawh em em bun tura hma lak vat a ni lo hi hriat thiam a har deuh a, politics thli chhia a tleh em ni tih mai a awl hle. A bun (install) a harsa deuh a nih pawhin chu harsatna sut kian chu mipui mamawhna thlir chungin Sawrkar hmalak vatna tur a ni ang. Sample test result chhuah har vanga chaw nghei hiala nawr a nihte kha hre rengin, Sawrkar hian nikum khan he khawl hi lo bun daih tawh ni se, mipuiin kan chhawr tawh ngei ang. ICMR aṭanga a dawnte leh mimal pek kha chu rei vak lo chhungin a bun (install)nghal mai a nih kha. Tun hnuah Sawrkar hian inenfiahnan hmang thei se a ṭha hle awm e.

2. Health Minister leh Opposition MLA/Councillor ṭhu khawm ta : Covid 19 thawh khatna do chung changah khan Opposition MLA te kha eng Committee ah mah telh an nih loh thu kha Assembly Sessionah meuh Opposition Group leader khan a sawi chhuak a nih kha. Covid-19 thawh hnihna kal mek chu a lo thawk na ta in, sum lamah kan la harsat zel vangte pawh a ni ang e, kan sawrkar hruaitute pawh an mangang zual ta niin a lang.

Ni 18.5.2021 khan Aizawl khawpui chhung bialtu MLA zawng zawng leh Councillor zawng zawngte chu (Opposition tiamin ) Health Minister hovin thawh ho dan tur ngaihtuahin an ṭhu khawm ta rup mai a. Thil lawmawm tak a niin hei hi kalphung thar chu a ni lawm ni! Opposition lam te pawh a tiphurin ṭangkai leh zuala thawh hona kawng a ni ngei ang. Thil dangah rawn an nih loh pawhin, Covid-19 dona kawngah hi chuan Oppositionte hi rawn chhunzawm zel ni thei se a ṭha hle mai. State dangah an ti ngai lo a nih pawhin keini State angah chuan thil inhmeh tak niin a lang e, ṭanrual hi kan chakna a nih kha.

3.Hei le CM Refiel Fund (CMRF) chu : Hripui vanga thla khat chuang inkhung a nih hnu chuan Aizawl Dist.ah chauh pawh chhuanchham chhungkaw 3074 an awm hman thu Zonet News dt. 17.5.2021 ah kan hre ta a, rilṭama thi erawh kan la awm lo hlauh hi a lawmawm hle a ni.Tun hmaa mi inphalte thawh khawm khan a daih seng ta lo va, nitin maiin hri kai an pungin inenkawlna hmun pawh siam belh zel a lo ngai ta si a.

Ni 17.5.2021 khan Chief Minister Relief Fund (CMRF) hmanna tur ngaihtuahtu pawlte chu Chief Secretary hovin an ṭhu khawm ta-a, a ṭum khatna atan (CMRF) Rs 91.50 lakhs chu mi harsa zualte ei leh bar kawnga ṭanpuinan an sanction thu an puang ta a, a lawmawm takzet a ni. A ṭul ang a an chet zel tur leh an pawisa hman tawhna leh la bang thlenga an puang kha a thlamuanthlak hle mai. CMRF hi tun aṭang chuan hma deuhah sem ni thei se a ṭangkai leh zual ang.Lockdown pawhsei a ni leh ta a, Sawrkar a bengvar hle loh chuan nitin inhlawh chawp, mi in luah leh ei tur chhek khawl ve thei lo Aizawl khawpuia awmte (urban poor) hi ngaihsak an ṭul hle mai.

CMRF hi a ṭul hunah chuan hman zung zung ni thei se, mipuiin mi harsate tana an thawh khawm a ni a, khawl khawm reng lo va a hmanna tur dap zawk hial chi niin a lang. A ṭul hunah chuan mipui leh mi inphalten an thawh leh zel ang tih hi a rin ngamin a lang. Mi harsate ṭanpui hi kan sakhaw kalphung mil a nih tlat avangin tun ṭuma Kohhran pawl hrang hrangte CMRF atana an luangchhuak kha a inhmehin a lawmawm takzet e.

‌ Covid-19 dona kawngah hian kan sawrkar hmalakna hi a fakawm hle mai a, mipuiten kan theihna mual ṭheuhah i ṭanpui zel ang u. Kan Sawrkar pawh hian tun ang hian inrawnkhawmna zau zawk hi nei zel ṭhin se la a duhawm hle mai. Thil tih theih nghal mai ni a lang ti mai lo va, mipui leh tute emaw nawr vanga tih leh tho hi ṭha ve bawk mahse, Sawrkar tan chuan mualphona a nih theih chin a awm avangin, fimkhur taka ngaihtuahna sen hun a ni ang. Tun ang hunah hian eng Pol. party mahin hamṭhatnan hman tum lo teh u, kan dam khawchhuahna tura lungrual taka ṭan hun a ni e. Sawrkar hi dik tak leh langtlang taka akal chuan mipui hian thu hi kan awi khawp a nia, han che chhuak zel teh se!

H.Lalchhuanliana