RAWMI AIAH PÂNGBAL ZAWK LE?

Kum te hi chhiar zawm zel takah chuan keipawh kum 86-na ka chhiar ṭan ve ta hial a. Thinrimna in kum bul ka ṭan a, 'in thinrimna chu ni in tlakpui suh se' tih anih laiin khua alo var a, a hma aiin ka thinrim tulh tulh a. Ka ṭhianṭha te ka thinrim min lo share pui turin ka phone hlawm a.

Annin lainatna aw nen, 'chuti fakauva i thinrimna chhan chu min hrilh ta che' an ti hlawm a. Kei chuan, 'Ele, Covid-19 leh ṭam lo thleng tur laka Zofate dam khaw­chhuahna ngaihtuah a nu leh pa te kan in dawmkun mek laia Rawmi Tender lo chhuak hi lungchhiatthlak - Zofate nuihzabura min siamtu, kuthnathawktute bahra khura min um lut tu anih hlauhna in min man a, ka khur a, All India a ka thinrim ber kum min thlen ta anih hi' tiin ka chhang hlawm a. 'Kan lo thinrim pui ve ang che' tiin min thlamuan hlawm a, ka thaw huai mai.

Nikum Covid-19 inṭan aṭang khan Zofate Covid-19 leh Ṭam laka kan dam khaw­chhuahna turin 'Econo­mic Independence zawk le' tiin article ka ziak ve a. State sawrkar in Agri-Emergency puang sela, ṭhalai hnathawk thei zawng zawngin chemtum leh tuthlawh hmangin mah­ni lo, huanah lockdown hmangin independence i setal chur chur ang u tiin.

Kum 1 chhunga thar theih buh leh bal, pangbal te - Rawṭhami aiah i uar ang u, rawṭhami, foreign rua, IAS ten hna an bansan duhna project pawh ni raw sek sek pal chawiah bak tuman phun suh u' tiin loneitute tan ṭhahnem ngaiin ka lo au ve lauh lauh a. Hman deuh khan India President Abdul Kalam-a ho meuhin Jatrofa buaipui ani tawh a. Ka thil tawn leh hriat mi thiam rualte thusawi Jatrofa hi Agriculture land ah chin reng reng loh tur' tih ka hriat te chu ka au chhuahpui ve tawh a, Jatrofa chu a reh ta duak a, ka lawm asin.

Chutiang chuan ka thu awihin rawṭhami aiah pang­bal chu an hmang ve mai dawn emaw tih laiin Budget Session aṭanga ka lo hriat danin Mizoram Sawrkar Flagship pawimawh ber, rawṭhami atan cheng vaibelchhe 7 zet hman ral a nih thu leh chakai farm atan cheng nuai 35 zet dah a nih thu leh chu Ṭam lo thleng tur laka inbuatsaihna ka hmu ve lova; kan mithiam rual te leh, MLA te lahin ngawih an chuh ṭhup si a, Pu M Lalmanzuala bak sawiseltu aw ka hre ve lo. Hei tak hian ka thinrim ati zuala, All India ah ka thinrim ber kum atan ka puang ta hial anih hi.

Rawmi tender
Department lam thu­chhuah leh a fak mawina Pu F Vanlalpeka thuziak te uluk takin ka lo chhiar ve a. Kan CM meuhin foreign rawṭhami, IAS te hna ban­sanna tur khawpa ṭha a fak mawina te nen inkungkaihna, in phiarzawmna awm ṭuaiin ka hria.

Rambuai laia patling ho ngaihṭha lo min hriat chhuah tira keipawh thil awmzia ka chhut hian ka ngaih a ṭha thei lo. Tender kalphung te pawh kan hre ve a, a ṭhiak supply na turin ṭhahnem an ngai hle tih hi ka hmuhdan a ni. Kuthnathawktu rilṭam mekte hi hmusit tlak kan nih tawh lo, sawisak zui tlak kan ni tawh bawk hek lo. Mizo ṭawnga ka khaikhawm thiam dam chu 'A zialo lulai e mai' tih hi a ni.

Demand : Sawrkarin Rawmi Tender hi cancel nghal rawh se. Sawrkar Flagship kal mek, foreign rua, Rawmi tih aiah pangbal zawk le tih hi ani e. Heihi AMFU Founder President ka nihna angin Zoram kuthnathawktute aiawhin ka ngenna leh demand chu a ni e.

Keini rilṭam mekte hian kan tana thil ṭha lo hi kan dodal ngam ve dawn law mi? Kawngzawh ve kher ṭullo hram se ava duhawm tak em. Sawrkar hian a tlai hma hian hma la nghal rawh se.

Chutichuan Sawrkar chak tak, Chief Minister chak tak, MNF nge nge kan ti dawn zu nia. Chhunzawm zel tur.

Vanlalngaia, Ex MP Candidate