Mizoram chet ṭhat chhan
Kan state hi hripui do kawnga kan chet ṭhat chhan hi state dang neih ve loh, Task Force kan neih vang a ni a, Zonun ze mawi tlawmngaihna leh kan Kristianna vang a ni.
Task Force-in sorkar thawh ai an thawk zo deuh vek a, Task Force te’n hma an lakna leh an inpekna hi, pawisa zawnga teh theih pawh a ni lo. Covid-19 boruak a awm tirah state boundary an veng a, mahni veng ṭheuh an veng leh bawk - kan state sorkar pawisaa thawk tur ni ila kan sorkarin a tlin lo vang.
Covid-19 boruak awm tirh lam, police pawh an la inrin hman hmain Task Force an che nasa hman hle; mipui pawhin Police an dem hman hial a nih kha.
Mizote kan vanneihna chu YMA kan nei leh kan tualzal nun inawp dan hi a ni. Chu kan vanneihna chu hripui do a ngaih tirh aṭang khan Task Force-ah a lo lang chhuak a, sorkara department hrang hrang aiin Task Force kha rikrum thilah chuan an che ṭha hial a nih kha.
Chumi hnu deuhah hriin min han luhchilh ta a, contact tracing, chhawmdawlna pawisa pek, ei leh in tur pek etc. an hnathawh dan hi sorkar hnathawk anga hunbi nei ni ve lovin a tawp rak thlengin an thawk a ni.
Aizawla LLTF thawh dan tlangpui chu hun pumin chhun zan zawmin an thawh a ngai. Aizawl veng lian deuhah hian chhungkaw 1300-1700 vel; mihring 6000-9000 vel an cheng a, heng veng lian deuhah te hi chuan Task Force te hi a za rual an thawh a ngai.
Aizawlah chuan sample la tur team hi an va kal a, sample an la tawp a, an haw a, a bak zawng Task Force kut a ni zui a, result chhuak a awmin positive se an buaipui leh a, positive chhungkua te ei leh in an ngaihtuah sak a ngai. Positive-in a hnimhnaih zawng zawng an chhui chhuak leh a, an vil leh vek a ngai - sawi vek sen pawh a ni lo. Kan sorkar bân tha chakna hmanga tih theih pawh a ni lo a, man power pawh sorkar in a nei daih lo.
Hripui do kawngah khawvel huap ang pawha entawn tlak kan nihna chhan hi rilru thianghlim leh fim taka kan ngaihtuah thiam a ngai. Kan ṭanrualna rah a ni.
Task Force, mipui leh sorkar ṭanrualna avanga ṭha taka hripui kan do mek lai hian ṭhenkhatin kan sorkar hrawn mek tih ṭhat vanga sorkar an fak chiam chiam hi a dik thei dawn em ni? Dik tak chuan sorkar ber hi an ṭang rual lo zawk niin a lang lo maw?
Hripui vanga kan buai ṭantirh lam, mipui hlau thlabara kan awm khan, kan innghahna ber Health Department kha pawisa hmang hleithei lovin an han audit thut duh tlat mai a, kha khan sorkar ṭanrual tawklohna a tar lang lo maw? Tho-thil ang ṭhapin ram hruaituten ke an pen kan ti thei dawn em ni?
Lunglei lama Laboratory siam pawh hi theih loh ni lovin ṭul ti lo an awm vang a ni zawk lo maw? Nagaland-in RTPCR test theihna laboratory pathum an nei a, Manipur pawhin panga an din thei an ti si. Khawl petu vanga Laboratory an din duh lawk lo a nih phei chuan sorkar hian ṭan rual pui a duh lo a ni zawk lo maw?
Nikumah mithiam rualin Lunglei an va enfiah khan laboratory din chu a theih thu an sawi daih tawh niin ka lo hria a. Kum khat chhung bawhzui loh a ni a, mipui hian sorkar hi dem ta ila thiam kan chang dawn lawm ni?
Sorkar pawhin hma a la nasa tih kan hria a, CM relief fund aṭang ringawt pawh cheng nuai 2140/- lai hman ral a ni tawh - sorkar hian mipui tan hma a la nasa a, fakna tur tam tak a awm tih hi hre reng bawk ila.
Chutihrual chuan chhungkaw pa berin nupui fanau tan ṭhahnemngai taka hna a thawh hian fak chiam chiam tur a ni lo, chhungkaw pa-in a tih tur, a kova tla a ti a ni mai. Kan mawhphurhna kan hlenchhuah ṭhat loh vanga kan chhungkua a ṭhat loh chuan nupui fanaute dem thei kan ni lo.
He hripui-in min sawisak chhoh dan leh kan hmabak hi chhutin i thlir ang u. Dam leh tlang khatah, thih leh ruam khatah tih rilru pu chungin lungrual takin he hripui hi i do ho zel ang u.
Pathara Sailo