MUMANG ṬANGKAI

Farawa mumang kha mumang azawng­ah a ṭangkai ber mai awm mang e ka ti. A hrilhfiahtu Josefa a lo awm remchang hlauh bawk nen.

Kum ṭhat kum kha kum 7 a ni a, in­khawl nachang an hriat phah a, a dawt leh kum 7 ṭam kum­ah eitur an neih phah. Hriat lawk theih tluk zeta pawimawh chu 'management' a ni a, Josefa manage­ment thiam zar an zo nasa hle.

A pa leh a unau­te'n chibai an buk tur mumanga a lo hmuh lawk pawh kha a thleng dik a, Farawa mumang anga ṭangkai a ni lem lo, a thleng dik a ni ve mai.

Kan ram kal­phungah pawh thil tam tak hi hriat lawk theih ruai ruai thil a awm a, chutianga lo hre dik thei leh hmalakna tur lo duang thiam hruaitu nei hi an vannei zel dawn bawk niin a lang.

Chutianga hma­lak chu a pawi­mawh tih hriain ram ṭhenkhat chuan nakina khawvela la pawimawh zel tur 'zirna' lamah ṭan an la a, hmantlak chherchhuah an tum. Khawvel chhe zel vanga tui kang leh eitur vang tur hre lawkin 'environment humhalh' lamah ṭan an la thung a, an ram eizawnna atan tourism lamah te, agriculture lamah te, mipui pung zel tana ruahmanna hrang hrangte awmze neiin an kalpui a ni.

Kan hmaa thil lo thleng tur tam tak hi Farawa anga mu­manga hmu kher lo pawhin chiang tak tak a tam mai. Hri a leng zel dawn a, eng­tinnge kan lo in ruahman ang? Tuihna a kang zel dawn a, engtinnge hma kan lak ang? Inhmun to zel tur te hi retheiten an la tuar nasa dawn a, engtinnge policy kan siam ang?

Chutiang lo thleng tur thlir thiam leh hmalakna awmze nei duang chhuak thei, Josefa anga vision leh manage­ment skill nei ṭha hruaitu kan mamawhna a sang zel dawn a ni.

Chhana Ralte