MRP Vrs MRP

Home Ministry, Government of Mizoram hnuaiah Mizoram Police (MRP) hi awmin January 21st. 1972 khan din ṭan a ni a. A general nature chu Local Civilian Police a ni a; an Headquarters (PHQ) chu Khatla, Aizawl, Mizoram a ni. A tirah chuan mi 200 vel lek an ni a; tunah chuan Police District 11, Sub-Divisions 18, Police Stations 40, Special Police Stations 3 leh Police Outposts 13 lai an nei tawh. Silai keng chi, Armed Battalions 8-(3 MAP Bns. & 5 IR Bns.) an nei a; Border Outposts 23 an nei bawk. Hei bãkah hian, police unit 6 an la nei cheu bawk. Police sanctioned posts hi a vaiin 12,206 an nei mēk a, a taka thawk mêk 8,634 awmin post hnawh khah loh 3,572 a awm bawk. Anni hi kan ram tan an pawimawha post ruak zawng zawng hi kan sorkar hian han hnawh khat thlap thei se a van duhawm tehlul êm!

Mizoram police-te hi an taimain an thawk rim ēm ēm a; sawisel bo ni bik lo mah se, India ram state danga Local Civilian Police-te nena khaikhin pawhin misual hnu chhui kawngah leh an service kawng hrang hrangah an fakawmin entawn tlak tak an la niin a lang.

MRP ve tho, pawimawh tak, mipui damkhawchhuahna tura kawngro sutu pawimawh tak tarlan ka tum tak zawk chu Maximum Retail Price (MRP) hi a ni. MRP hi Ministry of Civil Supplies, Department of Legal Metrology, amendment to the Standards of Weights and Measures Act (Packaged Commodities' Rules) (1976) anga siam a ni a. Maximum retail price (MRP) hi thil siam chhuaktute'n an thil siam chhuah sênso atanga chhuta retailer-te'na a man to thei ber ãwm tur tawka an bituk, a bikin India leh Bangladesh-a hman tura ruahman 1990 aṭanga hman ṭan kha a ni. India bak khawvel ram dangin MRP hi an hmang ve lo. An thil siam chhuahah MRP tih a chuang ngei ngei tur a ni a, retailer tuman MRP aia sangin an hralh tur a ni lo. Chutianga tih chingte chu pawisa chawi leh lung ina tantir theih an ni.

Mi duham leh pamham zualte'n MRP baka to uchuakin bungraw hralh an ching a, GST te belhchawpin customer-te an rawk ṭhin. An vai erawh chuan an ching lo. Chuvangin, mipuite'n MRP chhūt dan (formula) kan hriat chian a ngai hle. MRP -ah hian hengte hi chhūt tel vek a ni ṭhin. Ngun takin lo chhinchhiah rawh, chungte chu;

Thil siam man (Manufacturing Cost)
Fūn ṭhat man (Packaging/presentation Cost)
Hlêp tur (Profit Margin)
Rela thawn man (CnF margin)
A latu hlêp tur (Stockist Margin)
Hralh chhãwn man (Retailer Margin)
Chhiah (GST)

Phurh man (Transportation/Pholan man (Marketing/advertisement expenses)Senso dang (other expenses) etc.

Heng zawng zawng hi MRP-ah hian telhsa vek a ni tawh a; heti chung hian mipuite'n engmah chik nachang kan hriat ṭhin loh avangin sumdawng duhãm zualte'n MRP chhūt dan phung (formulation) pawh zahpah miah lovin mipuite min ei hek char char ṭhin a ni. A ṭhen lahin marker-in MRP inziaksa chawk chhiain a dang phuahchawp bel hnanin an duh dan danin an sawisa danglam a, a ṭhenin an bungraw zawrhin a chhawm tel (accessories) dah hrang chawpin man to tak takin a hranpain an hralh ṭhin bawk vei nen; a van rapthlãk ṭhin tehlul êm!

Nikum chhung zawng hripui avangin kan inkhãrkhip tawh a, kuminah engtianga rei nge inkhãrkhip a ngaih leh dawn Pathian chauh lo chuan kan hre lo. Lockdown apiangin manufacturing company/brand aṭanga MRP ngai reng siin MRP aia to uchuak leh MRP nei ve lem lo tualchhuak bungrua leh sa thlai to uchuak takin sumdawngte'n an chhiar ziah maite hi *Kristian nundan ṭha ngaihsan* tih thupui changchawitu Kristian 87.2% awmna ramte tih atan chuan a va han mawi lêm lo tehlul êm!

May 21, 2021 khan Aizawl DC Dr Lalhriatzuali Ralte kaihhruaina hnuaiah Commerce & Industries Minister hova meeting-in sa leh thlai man bithliahtu tura a ruat Committee chu Aizawl DC pisaah an thukhawm a. Committee-in sa leh thlai man a bithliah hi Aizawl Municipal Corporation huam chhungah 25.05.21 (Thawhlehni) aṭanga June thla thleng hman tura tih a ni.

Veng tina LLTF-te'n Dan bawhchhiate an vãi ang a, hremna lekkawh chu Local Council-te kutah dah a ni bawk. LLTF te bakah sa leh thlai man bithliaha zuartute'n an zawm ngei em tih endik turin Commerce & Industries Department kaihhruaina hnuaiah line department heng - Horticulture, Fisheries, AH& Vety, Legal Metrology leh AMC aṭanga ruat mi pahnih ṭheuhin Aizawl bazar-te an fang kual ṭhin tura tih an ni. Committee-in sa leh thlai man a bituk dan chu:

THLÃI:
Feren 70, Tampui 50
Tamkawr 50, Kauphek 70
Behlawi Hnah 70
Bawkbawn 60
Bean 120, Berul 100
Bawrhsaibe 70
Behlawi rah 100
Bell Pepper & Capsicum 200, Changkha 80
Carrot 150
Hmarchapui ria 100
Hmarchapui thau 150
Hmarcha te 300
Iskut 40, Knolkhol 60
Mai (Tai) 50, Maite 60
Maipawl 50 Maitamtawk 90, Mushroom(Pa Khawi) 300, Phuihnam 80
Purun zung 150 Radish 60, Sawhthing 80
Samtawk 60, Saptheihnah 110
Thingthupui 80
Tomato (Green House) 150, Tomato (open) 80
Zikhlum 40, Zawngṭahmu 500
Chingit 80, Khanghu 150

SA
Nghate/Kaikuang etc.180
Yearling/Small Fish upto 150gram 250
Common Carp (Japan Sangha) 350
Other culture Fish 150gm-2Kg 300
Big size fish/cut piece without head &Viscera 400, Crab (Chakai) 400
Snail (Chengkawl) 150
Phai Sangha (upto 2kg) a pum 280, Vawksa (Pork) 400, Vawksa rep(Smoked Pork) 400 per 750gm
Arsa (Chiken Boiler) 180 (puah loh) 300 (puah sa)
Bawngsa (Beef) A ti/a ir=600, A thin =700
A ruhsahpawlh = 500
A kawchhung = 500
A chek =150 per 250gm
Kelsa (Chevon) 600

(Written by: Lalnunmawii, MIS, IPRODated: 21st May 21 5:39 PM).

CFPMV & F-in thlai leh sa man to uchuak taka hralh a nih loh nana a man a bithliah hi AMC huam chhung atan chauh ni lovin Zoram pumpuia hman tur ni law law se a ṭha viau zawk mai thei. Tichuan, monitoring cell ten 29/05/2021 khan an han enfiah a, rate bituk zawm ṭha duh lo an la awm nual pek a. A ṭhen erawh thuawih tak leh rate aia hniama hralhte an awm bawk a, an fakawmm hle. He thil man bithliah thar ang zãwm duh lote hi pawisa chawitira lung in tantir theih an nih tho hmel a, chuvangin, sorkar hian dãn zãwm duh lote hi a tak takin hrem se, June 2021 thleng tan chauh ni lovin kumin chhung atan emaw a season mil zawngin khauh takin kengkawh zawm zel se a ṭha hle ang.

Tin, thlãi leh sa zuara ei zawngtute leh Aizawl mipuite hian CFPMV & F thil man bithliah hi June thla thleng atan chuan MRP-ah ngai hmiah tlang ila, chutiang zelin sumdawng dawrkai tê ber aṭanga lian ber thlengin an thil zawrh MRP-te hi zahin dik taka zawrh tum ṭheuh bawk se, mipuite pawh hian MRP angin kan lei em? tih finfiah nachang hre ṭhin ila kan zavaia ṭhat tlanna a ni ngei ang.

Tun kan dinhmun mêkah hi chuan hrema pawisa chawia lung ina tãn kan hlauh vang nge Mizoram Police (MRP)-te hi State dang police-te ngaihtuah chuan mipuite leh sumdawngte hian kan zah thiam êm êm a; chutih laiin MRP ve tho *Maximum Retail Price* erawh hi chu kan zah lo tlang hle tih a hriat theih a; chuvangin, mipuite leh sumdawngte hian MRP ṭheuh ṭheuh zah bik nei lovin an pahniha zah taka ena ngài pawimawh hram hram tuurin ṭan i la thar theuh teh ang u.

NB: Article hi ka ngaih dan leh hmuh dan mipui tana ṭhatna tura ka ziah a ni e.(see-CCS Rules 8(3)).

Dr. C. Lalrampana