TASK FORCE

Mite sawi hat khawpa hna kan thawh chuan kan thawk ṭha emaw kan thawk chhia tihna a ni a, a thawk ṭha te fak kan hreh tlat zel a, hming langsar sa emaw, ram puma mi hriat hlawhte thiltih ṭhat chu sawizui kan peihin kan ngaisang viau zel.

Eng pawh chu nise, he hrileng avanga kan himna tur ngaihtuahtu pawl veng tin leh khawtin deuh thaw in kan neih Local Level Task Force (LLTF) leh Village Level Task Force (VLTF) te hi kan ram hrilengin min run tak takah chuan sawi hlawh hat khawpa hnathawk an ni a, kan thlirna mit a inang lo ang bawkin an hnathawh dan pawh kan sawi zui dan an inang lo hle mai.

Social media-a chhaih hlawh leh kan khel peih LLTF/ VLTF hian fakna ṭawngkam hi an dawng tam mawh khawp mai, hrileng karah hri lakah ka him angem? Lo him lo palh ta ila keimah chu thuhran nise ka chhungte hi engtin nge niang ti chunga taima taka veng leh khawtlang tana duty-a theihtawp chhuaha hrileng dona kawnga hnathawk an nihna ringawt pawh hi pangpar ṭhi awrh tirna tham a ni dawn lawm ni? Hetiang a nih avang hian sawrkar pawhin hri dona kawnga thawktute vanduaina tawka nunna hial chan an awm chuan tiin ruahmanna a siam a, sum leh paia a theih ang anga inṭanpui dan kawngte pawh a zawnga kan sawrkar pawhin a ngaipawimawh hle a, mipui te phei chuan kan zah thiam hle tur a ni dawn lawm ni?

Veng tinah task force te hnathawh sawisela dem tawk hi chu an awm zel emaw tih turin veng tin leh khaw tin hian rilru hrisel lo pu hi chu kan kawl ve hrim hrim a, heng mite hian a thawh aiin a sawi an peih a, midangte pui aiin mi dangte rilru tihna theih zawnga thu leh hla lak an ching a, heng ho hi an ninawm tak zet a, midangte thilṭha tih lai hmu thei miah lo. Mahse, mi dangte tana ke pen tum miah lo an ni duh em em mai lehnghal. Kawng ṭhenkhatah hi chuan insiamṭhat kan mamawh tak zet a ni.

Hrileng thawhkhatna in min run aṭang tawhin veng leh khaw tina task force ten an theihtawpin hna an thawk a, an hnathawh danah phuailuai lai deuh leh mit tikham tawkte awm bawk mah se, an mahni demna thu hi kan chhak chhuak hma mah mah em? Social media kaltlanga demna thu kan vawrh dan te hi ngaihtuah chiang ila, ka thu hriat hi thu tak tak tling a ni em tih ngaihtuah peih miah lova, task force beih vak mai kan ching ta lutuk te hi mipui lamte pawh kan inenfiah ava hun tawh em.

Hmanniah khaw pakhat task force leh kan mamawh phura a thim a var pawh sawi lova kan eitur buhfai phurtu driver pakhat boruak a lian hle a, ram pum a khat a nih kha, a bak chu sawizui ngai lovin kan hre vek awm e. A pawimawh ta chu, kha boruak aṭang ringawt pawh khan thu tlinglo leh belhchian dawl lo a awm nual niin a lang, tumah kan inti bik lo, kan youtuber ṭhenkhat lah hian an sumhmuhna tur ringawt an ngaihtuah emaw tih tur hian hriat chian hmel em em in an channel-ah chanchin chiang mang lo an post a, hengte hi mipui ten kan thlir a ni si a, mi tam zawk rilru leh ngaihtuahna hruaisual thei thil a ni tih lam an hre miah lo te hi kan buaithlakna lai chu a ni. Mipui beng kan tivir a, an hriatchak thil kan post dawn a nih chuan a tak tak a ni em tih fiah phawt ṭhin ang u. Kan youtube channel te hi midang fakna atan pawh hmang ve zel ila ava ṭha dawn em.

LLTF leh VLTF te hi a demtu lam awka a rin ṭhin em avang hian lam ṭang nei lo an ni lova, an hnathawh leh mipui hrileng laka him tum, mahni inlama inkhung mek te tan hian an hlutzia chu sawithiam baka nasa a ni. Inchhungkua home quarantine ni ula, inveng red zone emaw containment zone-ah awm ula, chutah tak chuan i dem a, an ṭhatna lai i hmuh theih miah loh task force te bawk hi an hlutzia i hre mai ang.

I chhungte emaw nang­mah ngei pawh vanduai thilah hri lakah lo him ta lo thut la, in veng leh in khaw task force te kha nangmahni ngaihven hmasatu tur an ni. Ṭhat lohna pakua an neih a, ṭhatna pakhat chauh nei an nih pawhin tumah hi tling lo hmuhin hmu nghal rawk rawk lo ila, an ṭhatna laia an thiltih kha thlir thiam zawk teh ang u.

Tun thlenga LLTF leh VLTF te hnathawha lung­awina hmu lo hi chu mahni inah pawh, ṭangkaina nei em em lo, eirawng bawl ngai lo, chaw ei dawna chhungte chawhmeh siam sawisel ching an ni duh tlangpui. Hetiang mi hi chuan leiah leh vanah lungawina an hmu kherin a rinawm lo; tin, a lungawi lo mi ṭhenkhat hi chuan dan an zawm peih loh vang mai mai a ni, khawiah emaw chhuah an tum a, a nih loh vek pawhin len ruk an tum a, duty ten an lo hmu leh si a, anmahni in lama an haw tir leh ṭhin te hian social media lamah a lem leh a tak inpawlhna hmunah vui hmui an pu ta ṭhin a, hetiang hi chu thunei lo thu mai a ni tih i hrethiam tlat ang u.

Veng leh khaw tiin kan himna ngaihtuaha tuk leh zana ke pen ṭhin task force-te kaihza veng ngam ila, sawisel ni lova thurawn an mamawh chang pawhin puitling takin thurawn pe zawk ila, kan ṭhat pui zawk ngei ang. Tlawmngaia inpe an nihna hrim hrim pawh a ropui tawh tehreng nena dem duh kan la awm ta cheu hi chu a zialo ṭhin mang e.

Task force an nih avangin engkim an tidik bik kher lovang i beisei angin hna an thawk kher lovang i duh khawp lo a nih chuan nangmah kha hrileng karah va duty ve chhin la, an dik lohna laite siamṭhat va tum chhin la, ral tlir ngawt aiin thil a lo har maithei. Veng tin leh khaw tiin an khua leh tuite himna turin sawrkarin a phal angin dan a siam thei a, hei hi kan zah sak a, dan chu dan a nih anga kan zawm chuan tumah hi tisual leh sawisel ngai kan awm lovang, mipui lam bawk hian dan kan bawhchhia a, dan kengkawhtute kan dem leh ṭhin hi i sim ang u.

Tun hi innghirnghona hun a ni lova, insawisel chiam chiam aiin ṭanrual hun a ni zawk si a. Kan tan, ram leh hnam tan, LLTF leh VLTF te hna thawk zel ula, nangni hi kan innghahna in ni a, a lang lo ruamah hian in lama ṭang kan awm reng a, lo zam mai lo ula, in thawhrimna kan hre reng a, hmalam panin kal zel ang che u.

Ramchhana Hmar, Phuaibuang