LUNGLEI RT-PCR KHAWL IN RIAH RÛN A VAI?
Lunglei District Hospital tana hman tur, hri kai endikna khawl lian, nikum lama Thorãng bialtu MLA Pu Zodintluanga pek RT-PCR khawl chuan vawiin thlengin riah rûn a la vai tluang zel.
Sawrkar lam hian mamawhna a san a vangin State Referral Hospital Falkawna TB Laboratory (Khak Culture na) chu RT-PRC Emergency installation a tan ICMR lam an approve tir thei mai a, Lunglei lam tan erawh ICMR Guidelines ang lo chuan thiltih a buaithlak tih an sawi mauh mai.
ICMR lam hian, khawl bunna tur hian BSL-3 Lab. chin approval a pe thei ṭhin a, Covid hripui len hma zawng kha chuan India ramah pakhat chiah awmin sawi a ni. Tunah chuan RT-PCR khawl 2500 chuang India ramah bun ni tawhin, Covid pandemic hnu hian BSL-2 ah relax a ni. Chumi zulzui chuan SRH Falkawn ah hian RT-PCR Khawl 4 bun mek a ni.
Lunglei Southern Hqrs (Sub Hqrs) YMA chuan RT-PCR khawl hi rang taka bun an duh thu sawiin, a ṭul anga hmalak an tum thu an sawi a, Lunglei Covil Hospital compound chhungah hian building remchang 3 lai awmin a ngai tih an sawi a, Sawrkar lam erawh chuan, ICMR Guidelines phak lovin an hre thung a, khawl bun a nih thuai theih nan hma an lak thu leh hemi a tan hian NEC ah pawisa an dil mek tih sawiin, Khawl pui bun a nih hmaa hman lailawk turin TrueNAT Quattro (Mini PCR) khawl 2 ngaihtuah lailawk a nih tur thu an sawi ve thung.
Vawiin Vanglaini (digital edition) sawi danin, Mizoram Health & Family Welfare Director chuan, Lunglei ah Press Conference neiin, Lunglei tana RT-PCR khawl petu Pu Zodintluanga MLA hian, a pek dan a dik loh a vangin hman theih a nilo, tiin a sawi a ni awm e.
Mizoram sawrkar hian, RT-PCR khawl pek dan (guidelines or regulation) hi a lo siam reng nge, Pu Zodintluanga hian engtinnge a pek bik tih hi mipui ngaihven a ni nghal. Thil inpe ve si a, a vawma vawm te, elsen chunga pek leh leichhuah khum chunga inpek angin sawrkar hian a ngai tihna emni ang le ? Pu Zodintluanga hian Pu Thantluanga te chhung (Hauva & Sons) pek dan zawh nachang a lo hre lo hlauh a nih hmel e.
Heng thua thil awmdan ni a lang ta chu, Pu Zodintluanga khawl pek chungchang LDCC Gen Secretary pakhat in MNF party a zawm tuma a sawi, he khawl hi hling ni tura ka pêk a ni a tih zulzui khan, sawrkar hian Khawl hling nei hi hman loh dan phet a zawng ve a nih duh hmel hle.
Heng thil ah hian, kan ram politics kal fuh loh zia a lang thei a, tun hi party hamṭhatna aia ram mamawh ngaihtuah hun a nih laiin, a petu leh a dawngsawngtu lam hi 50:50 anga dik/diklo ve ve anga sawi theih an ni. Pu Zodintluanga pawh hian, a bial fund hi Lunglei lamah daih a hmang hi a dik bik chiahlo maithei bawk e. Chutih rual chuan, Aizawl lama Laboratory guideline ngaihhna thiam (relax) thei a, Lunglei lama ICMR Guideline ngaipawimawh leh tlat sawrkar rilru pawh hi mipuite hian kan hrethiam ru viau chuan a lang.
Engpawhnise, INC leh MNF sawrkar hian danglamma nasa tak min thlen dawn lo ve ve, tih hi thil chiang a ni.
Vanlalhuma Kawlni