MITTUI NENA LALPA AUH HUN A NI

Hripuiin kan khaw­pui a fang dul dul a, enkawl sen loh khawpa tam min man ta. Thihphah kan pung tulh tulh bawk a, chuti chung pawhin kan khawpui hian hlauthawng hmel a la pu lo.

A theih hlek chuan kan chhuak duah duah a, veng ṭhenkhatah chuan traffic te a la jam hial. Heti chung hian chawhmeh ṭha hmeh loh te kan la hlau em em a. Kan in hmangaiha in ṭanpui tawn kan duhna te hi a ropuiin a lawmawm, mahse chawhmek semte hi mi khawih hnu min khawih tam­tirtu, mi dang nena awmkhawm tamna leh in contact tamna siamtu mai an ni. Chawhmeh neih loh aiin damna a hlu zawk.

Thingtlang lamin Aizawl min ngaih­tuahte hi a lawmawm, chutih rualin Aizawl hri leng nena inthleng erawh a hlauhawm hle tih hriat a ṭha.

Kan MLA rual ho leh Counsellor hote thil semte pawh hi dik tak chuan mamawh chu a ni na meuh mai. Amaherawhchu, khawlaia dahkhawma thla la ho va, politics khelhna atana kan la hmang reng te hi erawh chu a hun tawh lo.

LLTF ten an venga mamawhtute chu an hre lutuk. Hmangaih thilpek a nih hrim chuan keuh tawp ula, a ruka hmutu chuan a rul ang che u. Mi dang ko khawm kher lovin LLTF ten mamawhtute kawt kaiah an va hunsak tliah thliah mai ang. A petu hriattir kher hun pawh a ni lo. Kan chapo lutuk hi hri kan inkaidarhna siamtu mai mai a ni.

Heti khawpa kan medical lam thawktute an mangan tawh hnuah department dang hotuten hri leng ṭanchhana thil sem hmanga mipui hneh kan la tum fo hi a dik tawh lo. I ngaihtuah chiang teh ang u.

Kan pi pute khan an mangan tak tak chuan in tinin puandum an zar chhuak ṭhin. Chu chu an ṭawngṭaina, tihngaihna kan hre ta lo ve, puih kan ngai e, an tihna a ni.

Tun hi puandum zara kan lungngaihna leh manganna tihlan hun a ni. Lawng puten Jona hnenah “tho la i Pathian au rawh” an tih hun kha kan thleng a nih hi.

Kan Pathian thu sawitu tam tak lah hian ruhkawl deuh deuh, inhnialna tur ringawt an buaipui a, hre dik bika insawi leh rau bika insawi reng mai lah bo lo. Inhnial hun a ni tawh lo, kan chhandamna Isua chauh thlir hun a ni e.

Mi tin, in tin kan ran te nen lam chaw ngheia Lalpa auh a hun ta. Lalpa chuan kan manganna leh keimahnia kan ngam lohzia hriain a khaw­ngaihna avangin he hripui lakah hian min chhandam mahna.

Commissioner Lalkiamlova