Lungleia RTPCR khawl dah theihna tur laboratory Din theih dan endik tura sorkar mi tirh pathumte thukhawchang
June 15, 2020 khan Mizoram sorkar chuan Lunglei Civil Hospital-a RT-PCR khawl dah theih dan tur enfiah turin mithiam pathum - Dr. H. Lalhlenmawia, HoD, Department of Pharmacy, RIPANS; Prof John Zothanzama, Dept of Environmental Sciences, MZU bakah Dr. Vanramliana, Asst Professor, Zoology, PU- te chu a tir a, anni hian ngun takin thil awm dante an enfiah a, laboratory din tura harsatna awm theite leh laboratory din a theih leh theih loh dante an endik a ni.
June 15, 2020-a sorkar thuchhuah chuan, "Aizawl the 15th June, 2020 : Vawiin khan Aizawl aṭangin mithiam rual (Expert team) ten Lunglei rawn tlawhin Lunglei Civil Hospital-a RT-PCR Diagnostic Laboratory bun tura sawrkarin a ruahman mek chu inspection neiin hmalak ṭul te an enfiah," tiin a ziak a ni.
Kum khat dawn a ral hnuah pawh Lungleiah hian RT-PCR hmanga hri endik theihna tur laboratory hi din a la ni lo a, Sub Headquarters YMA, Lungleite chuan laboratory din tura an duh thu sorkarh an thlen a, social media lamah Lunglei mipuite'n vawi tam tak an au chhuahpui tawh bawk.
Mizoram sorkar chuan June 2, 2021 khan Hospital & Medical Education director Dr T. Lalhmangaihi Lungleiah a tir a, Dr Gracy Laldinmawii, Assistant Professor, Microbiology Department, ZMC-in a ṭawiawm a; Lungleiah thuthar thehdarhtute leh Sub Hqrs YMA hruaitute nen an inkawm.
He an inkawmnaah hian Hospital & Medical Education Director chuan, Lungleiah RT-PCR khawl din theih a ni em, tih pawh enfiah tawh a nih laiin, a taka thawktute ngei an tel loh avangin tihfuh loh deuh a awm tih a sawi a, “A hmunhma a awm, tia an report kha a rintlak tawk lo deuh a, a nih dan tur ang taka kalpui turin hmun a awm tha tawklo a, hei vang hian RT- PCR khawl dah nghal mai tur hian sawrkar tan thil tih a harsa a. Amaherawh chu sawrkar chuan dah ngei tumin theihtawp a chhuah a, a theihlohna lam aiin a theihna lam kan thlir zel a ni, ” a ti.
Hemi hnu hian Lunglei lama pawl din, RT-PCR for Chhimbial-in heng Mizoram sorkar mi tirhte hi zawhna chi hrang hrang an zawt a, chumi an chhanna chu a hnuaia mi hi a ni:
To
Secretary
RT-PCR for Chhimbial
Ram tana thawhpui duh tak,
Rt-PCR Laboratory Lunglei Civil Hospital a din theih a nih leh nih loh enfiah tura sawrkarin expert team-te min tirh dan leh tunhnaia media lama report lo kal chungchang a in zawhna rawn thawnte ka lo hmu e. Kei pawhin media leh ṭhiante kaltlangin ka lo hre ve a, mi mal zawhna tam tak ka dawng bawk. A hmunhma uluk taka fang chhuakin leh Lunglei Civil Hospital thuneitute nen kan sawiho hnua report pek anih tawh avangin heng zawhna mi hrang hrang aṭanga ka dawn te hi chhan emaw, lo sawifiah lehzel kha ka lo tum chiah loh laiin, mipui aiawha zawhna in rawn siamte hi zahawm ka tih em avangin a hnuaia mi ang hian ka rawn chhang e.
1. Lunglei Civil Hospitala RT-PCR Lab tur enfiah tura expert local mipuiin kan rin em em te kha technically a a fit tawk leh fit tawk loh enfiah turin technical lam mi awmlo leh technical lam hria in lo nilo reng em ni?
Chhanna: He zawhna a technical mi tih hi a zauvin tunge technical mi tih ka hrethiam chiah lo a; 14th June 2020 khan sawrkarin expert team a tirhna order a chhuak a, chu mi ang chuan Lunglei Civil Hospital kan tlawh kha a ni a. Hospital chhung kha a theih ang angin Hospital thuneitute nen a huho a fang kual a, hmun remchang awmthei awm an lo neih te an kaihhruaina hnuaiah kan en a ni. Lunglei Civil Hospital kan tlawh hnu kum khat zet liam hnu, tunhnai mai khan mi ṭhenkhat ten media kaltlanga an thu hriat min hrilh aṭangin Technical mi tel ve lo tih kha ka hre ve chiah a ni. Team member ka nihna angin ka kalpuite hi in hriat a ṭul ka ti a, an experience sawi vek sen a ni lo a, tlem azawng in hriat atan ka tilang duh a:
a) Dr John Zothanzama: MZU a Department of Biotechnology Department ah Professor thawklai a ni a. University of Minnesota, USA aṭangin Post Doctorate a zo a, tunah hian he University nen hian an thawkho zel a ni. DST-SERB hnuaiah Molecular DNA laboratory dinin a enkawl mek a, Department of Biotechnology, Govt of India hnuai aṭangin Life Science leh Biotechnology ah DNA barcoding Rs 4.51 crore hmang fund research a enkawl mek bawk. Heng bakah hian UNO-FAO hnuaia life science research a enkawl tawh lam phei chu sawi lan sen a ni mai lo. Khawvel hriatah scientific publication tam tak a chhuah tawh a ni. Molecular biology ah tawnhriat ril tak nei tawh a ni.
b) Dr Vanramliana: Tunah Assistant Professor, Pachhunga Univ College-a thawk mek a ni a. Government of India hnuaiah Dept of Biotechnology kal tlangin Molecular Biology- Builtechnology laboratory setup turin Fund Rs 1 core research fund a dawng tawh a. Hei bakah hian Department of Science and Technology, Govt of India hnuaiah Scrub Typhus zirchiang turin Rs 40 lakhs research a enkawl mek a ni. Govt of India hnuaiah Institutional Biotech Hub Research kalpui bawkin PUC ah Research leh Intsrumentation Centre enkawltu a ni bawk. Molecular Biology ah tawnhriat tam tak neiin Rt-PCR hmanga research kalpui reng tawhtu a ni bawk. He a experience hi ZMC a Rt-PCR laboratory Covid test na tur din a nihna atan khan a ṭangkaiin sulsutu pawimawh ber a ni bawk.
Heng ka kalpuite sulhnu aṭang hian technical lam hre tur an nih leh nihloh chu ngaihdan a awm thei mai tur ah ka ngai.
2. Lunglei Civil Hospital hi (room in enfiahte pawh tel vekin) RT-PCR Lab atana pawm tlak a lo nilo reng em ni?
Chhanna: Lunglei Civil Hospital kan tlawh khan keini lam chuan Hospital hmunhma awmdan kan hre lawk lo a, Hospital thuneitute kaihhruaina hnuaiah laboratory siamna tur remchang nia ngaih hmun hrang hrang enkual a ni. A hmasaber ah Microbiology Lab hman lai en ani a, a room a tet chu thuhran ni se, a hmun kha mipui kaltlangna corridor nen insi reng a nih avangin a remchang lo a ngaih a ni. Room dang remchang awma an rin te en zelin, kil hrang hrang guidelines awmte ngaihtuah chungin rem chanlohna a awm zel a, a tawp berah building chhawng chung lama room en a ni a, a room awm dan te en in Rt-PCR bun theihna tur a cheibawl mai theih tura ngaih a ni ta a ni. He hmun rem chan theih dan tur hi a hmuna awm ten nen sawi hoin, hospital in enkawlna leh ruahmanna ah harsatna awm lo theih tur a sawi ho a ni. Hmalak dan tur ruahmanna siam theih dan tur te sawi ho in, a hnaih a damlo ward awm pawh kha a ṭul anga sawn dan tur ruahman theih ni tih sawi a ni bawk. Kha room kal pawhna atan khan gate pakhat hman a nih theih dan turte, gate leh room inkar panna corridor pawh vantlang kal lohna tur atana ruahman theih a nih dan turte en hoin sawi ho a ni bawk. Detail plan leh estimates keini team te siam chi a nih loh avangin siamtu turte sawi ho a ni bawk. Laboratory cheibawl a, Rt PCR hman theih a peih tur khan tih ngai leh ṭul a tam hle mai a, vawi leh khat a peih theih a nih loh zia a hriat chian em avangin hmalakna hmasa (present requirement) ṭul ang te pawh team te hian kan siam nghe nghe a ni.
3. In lokal ṭum khan RT-PCR Lab tur enfiah tura lokal kha niin kan hria che u a, lab tur enfiah tura lokal kha in ni reng em?
Chhanna: Sawrkar aṭanga tirh kan nihdan chu Office Order No.D 33012/41/2020- HFW(ETCL)/90, Dated 14th June 2020 ah kan hmuh theihin a awm.
4. Khata in lokal ṭum khan in lokal chhan thu kha ngun taka kan chhiar chuan ‘RT- PCR Lab tur enfiah tur’ tih a ni a, Lab tur tih a nih mai tawh si chuan Lab kha neih mai theih tawh a hmunhma rawn enfiahin ni tihna a ni si a, engvang a rawn tirh nge in nih chiah?
Chhanna: Sl No 4 a office order ah hian kan kal chhan a chiang viau mai. RtPCR lab tih ringawt hian Rt-PCR khawl chauh hi a mamawh a ni lo a, Rt-PCR khawl bun ringawt chu thil harsa a ni lo tawp a, PCR hi chu a tawpa result hmuhna tur chauh a ni. PCR hi hman na tur a zirin room mamawh a danglam nasa thei hle. Mahse tuna Rt-PCR hi Covid test na atan hman tur anih avangin sample buatsaih hi thil harsa, khirh khan leh fimkhur ngai lai tak a ni a. A hautak lai ber pawh a ni zawk kan ti thei awm e. Rt-PCR in sample tam tak vawikhatah a en thei tiin sawi ṭhin nimahse, a en tur ber sample kha buatsaih hmasak a ngai a, a buatsaih nan thawktu, khawl, reagent leh chemical tam tak a ngai a, a hmunhma uluk a ngaih em avangin tihtur a tam hle a ni. A thawktute leh midang dang awm ve te himna turin ruahhmanna hrang hrang siam a ngai bawk. ICMR pawhin guidelines ṭha tak a siam bawk a ni. Heng kaihhruainate leh thildangte thlir chung hian a chung a tarlan tak room, ward, partition leh corridor siamṭhat na atana ruahmanna awm thei te Hospital thuneitute nen sawi ho a ni.
5. A tawp berah chuan Expert Team, Mizoram mipuiin kan chhuan leh kan lo rin em em te kha Director ṭawngkam avang khian kan hlauthawng zo ta a Expert in lo ni reng em?
Chhanna: India ram leh khawvel hmun hrang Covid avangin kan buai a, sawrkar pawh theih tawpa tan lain sawrkarin remhre takin Institution a zirtirtu, laboratory nena research kalpui mekte rawn sawmin tihtur min rawn pe kha a ni a. Sawrkar kha a zahawm kan ti hle a ni. Kan theih ang tawkin kan experience ṭheuh leh kan hriatna thawh khawmin min tirh chhan hlawhtlinna turin kan thawk maiin ka hria. Report thehlutin ṭawngkamin a tlangpui kan sawi bawk. Kan report thehluh hnu hian min zawt chiang emaw, sawifiah ngai awm ang te zawh kan ni tawh lo a, chanchinthara an puan min hrilh chhawn kha keipawhin kan report kalzui dan ka hriat leh hmasakna ber a ni e. Media lamah eng ang takin nge puan chhuah a nih ka hre lo a, kumkhat a ralhnu ah kan report kha a hmantlak loh ti a sawi an lo awm palh a nih pawh in a siam ṭhat dan an hre tur ah ka ngai mai e. Lunglei Civil Hospital kan tlawhna report hi sawrkarin a kawl turah ka ngai a. Kei ni team avanga hlauhthawnna in lo nei hi a pawi ka tiin hrehawm ka ti hle a ni.
Mithiam ber ber kan ni lo a, amaherawhchu kan thiamna leh hriatna hunkhirh lai bera ram tana hmang ve theia kan awm erawh kha a lawmawm ka ti a.Sawrkar in state chhunga zirna hmun a zirtitrtute hmang ṭangkai a hma a la hi a fakawm ka ti hle ani. He mi ṭuma team member te pawh hian kan theihtawk kan chhuah pawh in ka hria.
Ka lawm e.
Dated: Aizawl, the 4th June, 2021
Dr H Lalhlenmawia
A hmasa in chhimbial mipuite chibai ka buk a che u. Dt.5/6/2021 a Zawhna min zawh angin channa ka thiam ang tawkin kan ziak ang e.
Zawhna
1.Lunglei Civil Hospitala RT-PCR Lab tur enfiah tur a expert lokal mipuiin kan rin em em te kha Technically-a a fit tawk leh fit tawk loh enfiah turin Technical lam mi awmlo leh Technical lam hria in lo nilo reng em ni?
Chhanna: Technical a tih ah hian tute nge a huam a, eng line ber nge ka hrethiam lo deuh a. Keini kha sawrkar tirh a kal ve mai kan ni a. Kan expert member te han hmehriat ila;
Dr John Zothanzama Biotechnology department MZU Professor a ni a, Mizo te zinga Biotechnology department a Professor hmasa ber a ni. Department of Biotechnology GOI in Biotechnology laboratory din thei tura a ngaih , mega barcoding project 4.5 crore chuang research project a pek ngam khawpa mi thiam a ni. University of Minnesota, USA ah te research ti a kal a, Joint research project a thawk tawh a ni.
Dr. H Lalhlenmawia hi Department of Pharmacy, RIPANS a Head of department tanglai a ni. Mizo te zinga Pharmacy subject ah PhD nei hmasa ber a ni. Mizoram Sawrkar hnuaia drugs analyst ṭanglai ani. Mizoram food testing laboratory din nan a hmalatu te zinga mi a ni. RIPANS a Department of pharmacy bul ṭanute zinga mi niin laboratory changtlung takah an neih ah hian a thawh hlawk ber zinga mi a ni a, Mizoram a damdawi quality test theina laboratory leh a thiamna nei, technical lama kan mi thiam tlemte zinga mi a ni. Research lamah hian DBT project 75 lakhs, AICTE 25 lakhs, NMPB 30 Lakhs project a thawk a, Australia ah Monash University, University of South Australia, Sydney University, National University of Singapore ah Training nei tawh leh research paper tam tak ziaktu a ni.
Dr. H lalhlenmawia nen hian ZMC a Covid 19 laboratory sentup a nih dawn khan, Core laboratory team atan ruat kan ni a, tin, a laboratory siam anih dawn tak takah khan sub committee-physical infrastructure team a tel kan ni e. Tin, keimahni thu a tel kan nilo a, Sawrkar in a sawm a sawm kan ni. Kan qualify leh qualify loh chu a teh tu a zir a ni mai ang chu.
2. Lunglei Civil Hospital hi (room in enfiah te pawh tel vekin) RT-PCR Lab atana pawm tlak a lo nilo reng em ni?
Chhanna: Tun dinhmun a trunat test nan a hman mek room saw chu a zim deuh kan ti a, tin natna dang test na te nen a in hnaih avangin room dang kan en a. Rt-PCR setup na tur room kan indentify a, mahse he room hi chei ṭhat a ngai anga, damlo awmna nen a in hnaih deuh avangin room siksawi a ngaih tur thu kan sawi bawk.
3. In lokal ṭum khan RT-PCR Lab tur enfiah tur a lokal kha niin kan hria che u a, lab tur enfiah tur a lokal kha in ni reng em? Khata in lokal tum khan in lokal chhan thu kha ngun taka kan chhiar chuan ‘RT-PCR Lab tur enfiah tur’ tih a ni a, Lab tur tih a nih mai tawh si chuan Lab kha neih mai theih tawh a hmunhma rawn enfiah in ni tihna a ni si a, engvanga rawn tirh nge in nih chiah?
Chhanna: Laboratory a dah theih ang em? Dah ta ila a him angem? Enge a feasibility leh eng hmanrua te nge Rt-PCR laboratory tur neihsa an neih tih te kan en a. Hmun awl a awm leh awmloh kan en a ni ber.
Rt-PCR laboratory hi din ta ila manpower leh laboratory mamawh hrang hrangah hian a hautak dawn avangin sawrkar kutah engkim a awm tih leh ICMR gudelines nen a inkalh ang em? tih te pawh ngaihtuhna thui tak kan seng a. Hetah hi chuan thui tak sawi tur a awm awm e.
4. A tawp ber ah chuan Expert Team, Mizoram mipuiin kan chhuan leh kan lo rin em em te kha Director ṭawngkam a vang khian kan hlauthawng zo ta a Expert in lo ni reng em?
Chhanna : Tun kan hripui dona ah hian kan Health Minister zahawm takin Academician te min rawn der ve a, kan tel ve theihna platform min siamsak hi kan lawm em em a, lawmthu kan sawi a.
Academician te hi mahni field ṭheuh ah chuan ṭhat ve na kan nei a, thiamloh leh hriatloh tam tak kan nei. Covid-19 lo thlen hma a Mizoramah ah Rt-PCR laboratory panga a awm a, chumi pakhat chu ka enkawl ve a, miin expert team an din a, kan duh vang reng nilo in min sawm a, kan tel ve ta rawih kha ania. Mizoram a Covid-19 test laboratory din a harsat thu an sawi te, kum 1 chuang a duh tur thu sawite khan chona nasa tak min pe a. Mi rama an tihdan leh ṭul ang te kan en a, kan tih ve theih ringtu kha kan ni ve mai a. Engti tiha min telh ve ngot nge an nih erawh ka la hre biklo. Keini aia mithiam an tam si a.
Trunat laboratory din an duh a, expert min ruat leh a, kan zin kual ang lawp lawp kha ania. Eng ber nge maw kan nih chiah ni! Sawi duh pakhat erawh chu Team member te hi Molecular Biology based biotechnology laboratory din tawh vek kan ni a. Kum 2011 aṭang khan Department of Biotechnology, Govt of India hnuaiah "Biotechnology hub laboratory kan nei tawh a, PCR leh Rt-PCR based technology ah hian faculty, researchers leh zirlai te training kan pe ṭhin a ni, chu zawng chu kan expert nih ve na chu a nimai e. Keini team hi mithiam bik leh mi ṭha bik kan nilo tih chu kan in hailo a, amaherawhchu Mizoram a covid-19 a lo thlen tak hnua laboratory kan neihloh avanga thawh ve theihtawk kan nei ang ti a mahni hlawhna awm miahlo a pen chhuak ve te kan ni a. Kan sorkar hotuten min chhawr ṭangkai duh hi kan lawm a. Kan theihtawp chu kan chhuah ve a. Miin hnawk min lo ti emaw, an pawi kan sawi anih chuan ngaihdam kan dil a. Heti em em a natna dona hmanrua political game anga kan han kalpui ta hi a na kan ti a.
Mizo ṭhalai, kan sakruang mizoram ṭan ngam, theihtawp a ram rawngbawl tura mi inpe ṭhalai te lo pen chhuak ve zel tur leh mi te fuihtu ni zel turin duhsakna sang ber ka hlan a che u.
Dr. Vanramliana
Zawhna chhanna
1) Lunglei Civil Hospitala RT-PCR Lab tur enfiah tur a expert lokal mipuiin kan rin em em te kha Technically a a fit tawk leh fit tawk loh enfiah turin Technical lam mi awmlo leh Technical lam hria in lo nilo reng em ni?
Chhanna: Keimah bikah chuan hei hi chu chhan ṭul ka ti lova. Ka ṭhiante, kalo kalpui pahnih erawh chu 2020 tir lama ZMC a hmanhmawh taka RT-PCR khawl bunna tur atan a thawhhlawk ber te an ni.
2) Lunglei Civil Hospital hi (room in enfiah te pawh tel vekin) RT-PCR Lab atana pawm tlak a lo nilo reng em ni?
Chhanna: Microbiology lab min entir hmasak ber kha chu a awmna a laili mah mah deuh kan ti a. Building chung lamah midang tlawhpawh theihloh tura rem room ruak kan enho kha ṭha kan ti tlang kha a ni a. BSL-2 criteria anga uluk taka cheibawl phawt chuan hmantheih tur chu a ni.
3) In lokal ṭum khan RT-PCR Lab tur enfiah tur a lokal kha niin kan hria che u a, lab tur enfiah tur a lokal kha in ni reng em?
Chhanna: Aw, min tirhdan lehkha zulzui chu a ni e (Office order Office Order No.D 33012/41/2020- HFW(ETCL)/90, Dated 14th June 2020)
4) Khata in lokal ṭum khan in lokal chhan thu kha ngun taka kan chhiar chuan ‘RT-PCR Lab tur enfiah tur’ tih a ni a, Lab tur tih a nih mai tawh si chuan Lab kha neih mai theih tawh a hmunhma rawn enfiah in ni tihna a ni si a, engvanga rawn tirh nge in nih chiah?
Chhanna: A chunga chhanna ang khian a sawifiah tawh tho mai.
5)A tawp ber ah chuan Expert Team, Mizoram mipuiin kan chhuan leh kan lo rin em em te kha Director ṭawngkam a vang khian kan hlauthawng zo ta a Expert in lo ni reng em?
Chhanna: Keimah bikah chuan hei hi chu chhan ngailo ah ka ngai. Ka ṭhiante, kalo kalpui pahnih erawh chu 2020 tir lama ZMC a hmanhmawh taka RT-PCR khawl bunna tur atan a thawhhlawk ber te an ni a. Anni aia hria leh ṭha koh tur awm midang ka hre lovang. An thawhna hmuna a hrechiang zawkte pawh han zawt ve ta ula a chiang lehzual awm e.
Prof John Zothanzama