NANGMAH KHA (Mangan a hun e!)
India ram pumpui leh state lian zâwkte hri kai thar an tlakhniam duai duai tawh laiin Mizoram erawh chuan kan la pung zel a, hri kai tharin kiam lam a pan thei lo. Mi pangngai tân chuan mangan a hun ta e!
Kan sawi ṭhin, kan sawi nawn leh dawn- He hri leh Mizote nunphung hi a inmil hlawl lo! He hri hian min ṭhendarh a, mahni inchhûnga min um luh diak a tum a, keini lahin inlênpawh phêt kan tum thung a! A chak lo leh do thiam lo zawk chuan kan kai ta mawlh mawlh mai a nih hi!
Sawrkarin a tih theih tawk tiin lockdown a puang a, ningin hne hle mah ila, kan eizawnna leh kan chawbel ti tlu dawn mah sela kan nun khawchhuahna tur (survival) atana hmanraw ṭha ber a nih rih si avangin hreh tak chunga kalpui a ngai a. VLTF/LLTF ten tlawmngaiin zankhaw tairek thleng thlengin an duty a, chhun ni sensa hnuaiah thlantui huh hluamin khawtlang an vêng bawk a, chuti chung chuan a kâi hi kan tlahniam thei reng reng lo mai a. Hei hi eng vang nge ni ang?
Hemi chungchang hi hriat chian a chakawm a, sawrkarin hun rei tak lockdown a puang chung pawha hri kai kan kiam theilo hi chhan engemaw tak a awm a rinawm. Vanglaini editorial (June 1) in a tarlan danin Sorkar mi pawimawhte leh Aizawl City Local Council Association hruaitute'n May thla chhûnga Covid-19 dinhmun an thlirnaah chhungkuaa inkaichhawng an tam hle tih hmuh chhuah a ni a, hetiang hi an chhinchhiah dan a ni:
1) Chhungte hnen aṭanga kai chhungkaw 725 an awm a,
2) Lainate tlawhna aṭanga kai mi 121
3) Ṭhenawm hnaite aṭanga kai 195 an awm a,
4) Ṭhiante nena intlawh vanga kai 81 leh
5) Hnathawhna aṭanga kai mi 122 an awm.
Heti a nih chuan sawrkar leh VLTF/LLTF hmuhpui phâk lohah mipui thuawihlo kan tam tihna a ni. Kan khawlaite chu reh thuap mah sela, kan vêng chhûngah, kan ṭhenawmah kan la inlên pawh hram hram a, chawhmeh kan la insuah hram hram a! Chhiatni ṭhatniah tel ve hram hram kan la tum a. Chutianga duty te hmuh phâk loha inlentawn tamna veng apiangah kai an pung chak an tih chu. A hun rih lo!! Hri darh chhûng hi chu tawm ve rih teh!!
He hri darh zel tur dan chah nan hian Mizo tlawmngaihna hman tum aiin mahni inchhûnga tawm a pawimawh rih zawk a, phungthlûk aiin 'fimkhur over' nih hlawh a pawi rih lo zawk. Nakinah boruak a ralmuan hunah duhtawkin kan tlawmngai leh ang a, duhtâwkin midang tân kan la luangchhuak leh zawk dawn nia. Tunah hian India ram pumpui chu hri kai thar lamah a tlahniam mêk a, India ram khawpuia kai an tam leh hluarna hmun Delhi, Mumbai, Pune, Kolkata, Bengaluru etc te pawh hri kai thar an tlahniam mek a. Boruak a êng zawngin a inmun ṭan mek a, third wave lo thleng tur atan an inpuahchah fel leh deuh vek tawh bawk. Mizoram chu second wave pawh kan la buan hneh lo a ni a, third wave lo thleng leh phei sela kan va buai nasa dawn em...
Chuvangin kan dinhmun dik tak hi hria ila, sawrkarin sum a tlachham tawh a, tlawmngai pâwlte leh mi ṭhahnemngaite hi che chhuak nasa hle mah ila tlin loh chin kan nei thei a, heti renga kan kal chuan kan ram economy leh society pawh hian tlin loh chin, zawh loh chin a nei thuai thei dawn. Chuvangin, nakina kan zalen thuai theihna turin vawiinah i inkhung hram hram ang u. Thu kan awih tlán chuan reiloteah he hri hi kan hneh thei ngei ang.
He hri do hneh tur hian sawrkar tha chakna a tâwk lo va, VLTF duty chauh hi kan himna a ni lo va, a pawimawh ber chu Nangmah kha a ni. Lo lêng chhuak tawh lo la, ṭhenawmte anhnah thar tem phêt lo tum rih suh! Chhungkhat chaw eikhawm lo rawt ve sek tawh rih lo la, ṭhenawm hnai vai lo tlawh du du tawh lo la, laina leh ṭhiante pawh nise lo tlawh lo ve rih la, sawrkar leh VLTF hmuh phâk lohva i lo tei kual zuk zuk hian hri i pu darh a, i lên na te khan hlauhthawng chungin an lo dawng sawng bawk che a, khawvel tihrehawmtu i ni ringawt tih lo hre teh aw, inah lo tawm ve rih rawh. Tichuan, tun aṭanga reiloteah hian kan zavaiin kan la lêng chhuak leh dial dial ang a, khawlaiah kan la inchibai leh lâwp lâwp zawk dawn zuk nia.
He hri do hneh nana pawimawh ber chu Nangmah kha i ni. Nangmah kha lo inthununin lo insum hmasa phawt mai teh aw.
Dika Pa