Open Gym sum aiah rethei ṭanpui
Pu Lalremruata article rawn ziah lan, 'SEDP-a Outdoor Gym siam aiah ṭanpuina' tih kha tun hripui len lai tak hian a chhunzawm hun lai tak a in her chhuakah ngaiin mahni vei zawng zawng han chhunzawm ve ta ila, mithiam leh hre zau zawk te cho chhuahna a nih theih chuan a lawmawm khawp ang le.
Article lama kan hmuh ang khan Socio-Economic Development Policy (SEDP) kaltlangin insawizawina Outdoor Gym (Open Gym) chu R. Dengthuama Indoor Stadium kawt ah siam a ni a, hei hi Mapuia Enterprise, Ritz Market, Dawrpui, Aizawlin an supply a, a bunna nena an senso zawng zawng hi Rs. 60,00,000/- a ni.
He Open Gym bakah hian Capital Complex (MINECO) lam ah pawh siam tum na a la awm leh zel tih a lang a, hei bakah pawh hian District khawpui hrang hrang ah Open gym hi siam tum a la ni leh zel bawk tih kan hmu thei a ni.
Sorkar thil tih hi a pawng a ataka sawisel kher tur a ni lova, khi Open gym an buatsaih lai leh an plan lai khian Covid-19 hi a la awm lo pawh a ni mai thei a, chuvangin Open Gym hi chu sawisel kher tur pawh a ni lo. Social Media lama an sawiselna, "A supply na a to lutuk, Open gym hi Google ah kan zawnga hei aia 50% a tlawm pawh hian a din theih," tih thuar tham hi chu an ringhlel a nih chuan RTI Act nen emaw expert lamin lo compare ta zawk se, heng Open Gym dinna sum velah hian rinhlelh tur a awm nih chuan lo chhui tawh mai se, he lam hi chu keia sawi tum lam ni a ni lova, ka sawi tum ber leh he article in a tin zawn ber zawk chu Open Gym hi din chhunzawm tawh lovin mirethei ṭanpuina atan a pawisa hi hman phawt rawtna siam thlawpna a ni a, pawisa la awm hi mirethei ṭanpuina atan hmang phawt se, Open Gym chu a lova awm theih a nih vangin ṭum dangah la siam chhunzawm ni se ramin a chhawr zawk dawn a ni.
Open Gym siam tumna sum awm zat leh an ruahman dan hriat ni mah suh se Open Gym hi "Mizoram chhunga district zawng zawngah dah kan tum a ni," tih kha ziah tel a ni a, hei hi chu tun dinhmunah chuan tih tawh hrih loh ni se mirethei an zahawm a ni.
Nikum aṭangin Lockdown avangin mipui an rethei em em a, chumite ṭanpuina tur chu Mizoram sorkar budget aṭangin 'economic relief package' dah a la ni lova, Chief Minister Relief Fund aṭang tlem tham te te sem chhuah chiah a la ni a, Open Gym siam na tur sum awm hi Lockdown avanga hna chhunzawm thei lo mirethei ṭanpuina atan sem ni zawk se a ṭha zawk dawn a ni.
JV Lalliansanga