Lunglei RT-PCR

RT-PCR-a Sorkar vanneihna : Hripui len ṭan tirhah khan hri endikna atana rintlak ber RT-PCR hi Mizoram Sorkar hian pakhatmah a nei lo. Hri a lo leng ṭan a, neih ngei a ṭul si a, ngun taka an ngaihtuah hnuah CAU, Selesih a mi chu hawhin kar hnih chhung leka hman theihin an bun fel der a. IBSD ten Imphal-a an regional office aṭangin RT-PCR min hawh tirin June ni 7, 2020 khan hman theiha peih fel a ni leh a. Tin, Pu Thantluanga (Hauva & Sons) in RT-PCR leina tur cheng nuai 21 pein khawl hi lei niin hun rei lo te chhunga hman theih tura peih fel a ni. Hri endikna atana rintlak ber RT-PCR khawl hi Mizoram Sorkarin lei ve lo mahse mi thil phal zarah vawiin ni thlenga RT-PCR hman tur kan la nei a, Sorkar tan pawh a vanneih thlak tak zet a ni.

MNYF nawr chhuah RT-PCR : Nikum June thla laihawlah khan Thorang bialtu, Pu Zodintluanga, CLP Leader chuan Lunglei District tana hman tur Ambulance leh damlohna thila mamawh chi hrang hrang a peknaah Lunglei District-in RT-PCR khawl an la neih ve loh thu leh neih ngei a ṭul thu sawiin, Lunglei District tan bik RT-PCR khawl hi pek a hreh loh thu a sawi a. Pu Zodintluanga thusawi hi MNF Ṭhalai Sub Hqrs. Lunglei lam hian Press Release hmanga chhang let nghalin RT-PCR chungchangah ‘Pu Zodintluanga, Thorang bialtu MLA in Lunglei District mipuite hnena a thu tiam hi, kan district dinhmun en hian a hma thei ang bera min tih hlawhtlin sak turin MNYF Lunglei chuan a chah duh a ni’ (No: MNYF/SHQ(L)/PR/2020-21/12 dated Lunglei the 15th June, 2020) tiin thuchhuah an siam a ni. Pu Zodintluanga hian MNYF te duhdan ngeiin RT-PCR chu lei nghalin nikum June thla tawp lam Lungleiah ava hlan leh nghal a ni.

Rinhlelhawm chu : I&PR Press Release No.2056/2020-2020-a tarlan a nih danin Lunglei Civil Hospital-a RT-PCR Diagnostic Laboratory din a nih theih nan Mizoram Sorkar chuan Expert Team dinin; mi thiam 3 tir pheiin heng Expert Team te hian Lunglei Civil Hospital-a Room ruak pathumte chu RT-PCR Laboratory tura a ṭhat tawk thu an sawi a. Hetih rual hian Sorkar lam chuan Lunglei district hman tur RT-PCR hi an buatsaih duh lo lui ngar ngar niin a lang a. IMCR ten RT-PCR khawl hi BSL-3 laboratory khera dah tur an ni tiin Lunglei mipuite tan RT-PCR khawl hi function tir loh dan mawlh an zawng niin alang a. IMCR hian nikum June thla aṭang daih tawh khan RT-PCR dahna tur hi BSL-3 laboratory kher angai tawh lo, BSL-2 laboratory ah pawh a dah theih an lo ti daih tawh a ni. Chu chu Lunglei lam pawh hian an neih sa a ni a. ZMC a RT-PCR an dahna building ngeiah TB laboratory, OPD, TB veite enkawlna Ward te a awm thung. Hetih laia hian CAU Selesih, IBSD Imphal te ta RT-PCR hawh leh Pu Thantluanga te lei hi a laboratory dinhmun thlir lova an function tir a nih a rinawm. Kar hnih chhung lekin an function tir deuh vek a, Lunglei RT-PCR erawh kumkhat vel hnuah pawh IMCR approval kan la hmu thei lo an ti reng mai a. Hei vang hian Lungleia RT-PCR bun a harsa tia an sawi fo mai hi a rinhlelh awmin Sorkar lam hotute aṭangin a petu avangin he RT-PCR hi hman loh hram dan an zawng niin alang.

Mipui bum tumna US siam RT-PCR : Pu Zodintluanga, MLA in Lunglei District tana RT-PCR khawl a pek hnu hnu lawkah Health Department chuan US siam RT-PCR chah mek a nih thu sawiin chanchinbu hrang hrangah te pawh tarlan a ni a. Nimahsela, an chah tak tak lo nge USA aṭanga RT-PCR rawn thlen thu hi vawiin ni thlengin kan la hre lo thung. Pu Zodintluanga khawl pek hman loh an tum avanga mipui bum tumna a nih ngei a rinawm tlat a ni. Tichuan, he khawl, kum khat dawn hman loha awm ringawt mai, mipuiin an mamawh bawk si chu hman a nih ngei theih nan Lunglei lama miṭhahnemngaite chuan he khawl hi hman a nih ve ngei theih nan tun hnaiah hma rawn lain Sorkarin sum a nei lo a nih pawhin tiin Social Media lamah RT-PCR khawl function ngei theihna turin pawisa thawhna tur account no dah chhuakin mi inphalte hnen aṭangin sumfai cheng sing riat lai mai hun rei lo te chhungin a hmu ta nghal mai tih Zozam Times May ni 31, 2021 chhuakah tarlan a ni. Mipui lam pawh an phur chhoh viau laiin Health Minister Dr. R. Lalthangliana chuan tun hnaiah Lunglei district tana Pu Zodintluanga khawl pek chu hman ngei a nih theih nan hma an lak reng thu a rawn sawi ve leh nghal a. Nimahsela, karhmasa nilaini kal ta June ni 2, 2021 khan Dr. T. Lalhmangaihi, Director, Hospital & Medical Education chuan Lunglei Sub Hqrs leh Journalist te nena meeting an neihnaah Pu Zodingtluanga pek RT-PCR khawl chu hman a rem loh thu ava sawi leh ta a ni.

Expert Team te hmaiah belbang tat: I&PR Press Release an tih chhuah No. 2056/2020-2020 ah khan Nikum June ni 15 a Lunglei Civil Hospital-a RT-PCR bunna tur enfiahin Aizawl aṭangin mithiam rual (expert team) te chu Lungleiah pheiin RT-PCR Laboratory atana ruahman Room ruak pathumte chu a ṭha tawk tura an rin thu an sawi a. Hemi tuk June ni 16, 2020 hian an thil hmuh dan te Health Minister hnenah report leh rawtna te an theh lut bawk a ni. (I&PR Press Release No. 2077/2020/2020). Chutianga beiseina sang tak nena Lunglei mipuiten RT-PCR bun tur an thlir mek laiin Dr. T. Lalhmangaihi, Director, Hospital & Medical Education chuan Thuthar thehdarhtute hnenah nikum lama Sorkar tirh Expert Team, Lungleia kalte zingah Technical mi an awm lo tih a rawn sawi leh ta piap mai a. Mizoram Sorkar khan mithiam rual, expert team a tir, ti meuhin Sorkar PR ah ziah lan a ni.

Sorkarin mithiam rual a tih Expert team te thusawi Director pakhatin a rintlak loh ti ang zia zanga a rawn sawi ta ngawt mai hi a tirtu Sorkar mualphona a ni tel chiang a ni. Politician te hian ram an kaihruai anga, vision an nei ang, chu an vision ang chuan Sorkar hnathawkte chuan hna an thawk mai tur a nih laia a harsa zawng ringawta thil thlir ṭhin kan nei hi a vanduai thlak hlein ka hre ṭhin. Tin, Health Minister hian mipui vote mamawh ve miah lo Sorkar official pakhat hmang hian Lunglei mipuiten RT-PCR an beisei tawh lohna turin a ṭawng tir a ni thei mai lo ang maw? Expert Team member pathumte tan Director ṭawngkam hi anâ viauin a rinawm. Sorkarin RT-PCR khawl chungchang leh laboratory thlenga hre ber tura a ngaih, a tirh an nih laiin Director pakhatin heng Expert team te hi RT-PCR khawl chungchanga an hriatna te hman tlak a nih loh zia mual laiah a rawn puang piap piap mai hi chu Expert team te tan a tlawm thlak dawn hlein ka hria.

Kan thupui ber Sum: Health Department ten Covid 19 do nan tiin mipuiah sum thawh tur tia an ngen hnu lawkah Covid 19 do nan CM Relief Fund ah i chhung lut ang u, tiin Chief Minister Office aṭanga thuchhuah an rawn siam ve leh nghal a. Kan CM zahawm tak hian sum leh pai lamah Health Minister hi a ring zo tawk lo emaw ni chu aw tih theih turin State Budget aṭanga hrileng do nan cheng nuai 650 an pek hnu lawkah Dept dang sum audit si lovin Health Dept. chauh Special Audit neih niin Special Audit Team te chuan Covid 19 dona sum dik lo taka hman a nih thu an hmu chhuak ta nghe nghe a (Zozam Times Ni 14 October, 2020). Hetiang hi thil awm dan a nih avangin tunah a pawisa faia an kuta thleng tur a awm loh avanga Lunglei RT-PCR hi hmang duh lo an nih a rinawm. Hemi tih chian nan Pu Thantluanga chuan RT-PCR leina tur cheng nuai 21 pe a, lawm takin an dawng a, an puang zar a, hun rei lo te chhungin an install nghal. Tute emaw hi chuan politics-a midang lansarhna dal tum ranin leh khawl leina tur an kuta sum a luh loh chuan khawl neih loh mai pawh an pawi ti miah lo niin alang. Nikum July ni 28 a CM instagram a TrueNat khawl leina man tarlan leh kumina TrueNat khawl leina man a inthlauh dan atang hian tute emaw chuan TrueNat khawl supply an hmuh theihna turin TrueNat hi an sawi mawiin RT-PCR hi an sawi hnawm niin a lang bawk.

Thu tlipna: Covid 19 thawh vawi hnihna kan hmachhawn mek a, hri kai an kiam thei lo hle mai. Kan Lockdown rei tawh si a, lockdown chhunzawm leh turin mipuiin kan tlin meuh tawh lo niin ka hria. Hetih rual hian test hi a tam thei ang berin nei zung zung zel ila, chu chu kan himna tur a ni. Health & Family Welfare Board Vice Chairman Pu ZR Thiamsanga leh Pu Vana inkawmna ka lo thlir ve a, Pu Thiamsanga khan Random test ah tam tak kan inhmu chhuak a, a dahna leh enkawlna tur kan nei dawn si lova, khum kan nei tlem bawk si a, chuvangin Random test hi ṭul lovah kan ngai tiin a chhang a. He a chhanna hi a mak ka ti hle a ni. Test a chak loha hri vei an inhriat har khan midang an kai darh tam bakah a natna a lan chhuah tawh chuan tih dam leh a harsat avangin mipakhat enkawlna ringawtah sum tam tak a luang ral dawn tih a chiang reng a, kan inenkawl zo chuangin a rinawm loh. Random test kalpuia, hri vei kan inhmuh chhuah zung zung khan enkawl dam leh a harsa lova, mahni inah pawh inenkawl dam leh mai theih a ni. Chuvangin, random test hi kalpui chhunzawm zel a, Lunglei mipuite pawhin khawl rintlak RT-PCR hi an hman theih ngeina turin Sorkar hian hma la chhunzawm se Sorkar tan leh mipui tan a ṭha a ni.

Lianhleia