HARSATNA TINRENG KARAH MUALPHO LOVIN MNF SORKAR A KAL ZEL
Sorkar hian hnatthawhna hun a la nei meuh lo:- MNF Party hi kum 1998 kum tawp inthlanpuiah a sorkar a, krismas leh kum thar chawlh an hmang zui nghal a. Kum hnih leh a chanve vel a sorkar chhung hian Mizoram chhungah Election chi hrang hrang MP (LS) te, Sinlung Hills Council te, VC leh LC thlan te, Lai District thlan te, AMC leh Serchhip bial MLA bye-election te a hmachhawn a, kha tih hun chhung khan Election Model Code of Conduct Rules-in a phuar pah zel bawk a, ram pumah development sum hmanga hnathawh bawrh bawrhna hun an la nei tlem hle a ni.
Heti chung hian hmun hrang hrangah sorkar hmalakna vung thar chhuah hmuh tur tam tak a awm a, sorkar hmasa kum 10 chhunga kan kawngpui chhe lutukte chu a lo mam ta zur zur vek mai a nih hi, zin mite tan a nuamin a awlsam tawh hle a, a va lawmawm kher em.
CM hovin Minister-ten Central sorkar an dawr ṭan laiin hun khirh an tawk :-
MNF hi a sorkar ṭan chiah khan, Chief Minister leh Minister hrang hrangte pawhin Central sorkar an han dawr nghal sang sang a, an thawm pawh a ngaihnawm hman hle a. Health Minister pawhin Central sorkar mai bakah Washington DC-ah World Bank thlengin an Office hmunpui a zu luh chilh hman a ni. Hetianga Chief Minister hova Minister leh MLA hrang hrangten hma an lak ṭan lai tak khan khawvel ram zawng zawng tibuaitu Covid-19 Pandemic chu a lo thleng ve ta hlawl mai si a. Engkim a buai zo ta vek a, hma lakna tam tak a khaihlak nghal a, State dang leh ram pawn aṭanga Zoram hmasawnna tur sum chawkluhna kawng a ping zo ta a ni.
International Boundary, State Boundary leh Airport thlengin kan inkharkhip zo ta vek a, heti chung hian sorkar chuan hmasawnna hnathawh tam tak chu a ṭhulh phah chuang lo, zawi zawiin chhunzawm ngai lai chu a chhunzawm ve zel a ni.
Chhiatna tin reng a inmung :-
Covid vanga ram pum kan buai laiin Tuipui ral tlangdung leh Zoram hmun hrang hrangah Lirnghing ṭum enge maw zat kan hria a, kan ralkhel nasa ṭhin hle a, East Tuipui bialtu MLA Pu Ramthanmawia, CM, Minister leh MLA dang dangte pawhin an theih tawkin mipui thlamuan tur leh an mamawhna zawnah ṭanpuina hrang hrang pein, Lirnghin chhante zir chiang turin mithiamte pawh an tir chho hial a nih kha. Mahni inchhung lumah mutmu pawh tuah ngam lovin chhungkaw tam tak pawnah riak chhuakin chenna in an rauhsan a, chhim lam leh hmun hrang hrangah khawkheng leh ramkang tuarin Helicopter hial hmanga ramkang thelh a lo ṭul ta a ni.
Kan ṭhenawm Assam-ten kan ramri min chuh buai a, silai leh ralthuam chhekkhawlin kan inep ut ut reng mai a, silai kan hmet puak lo chauh a nih kha. Mihring pulh hri mai ni lo, kan vawkvulh thlengin ASF avanga an thih tam ber kum a la ni hial bawk. Tun hun hi khawvel sorkar ropui ber te, India sorkar leh Mizoramah pawh hripui avangin sorkar sum dinhmun harsat leh chhiat lai ber a ni a. Heti chung hian Supply Minister leh Department thawktute zarah Ei leh bar, Gas leh thil dang tlakchham avanga chhuanchham kan la awm lote hi a ropui tak zet a ni.
Sorkar che thei lovin, mualpho se tih duhtu an awm :-
Hna thawk thei lovin Lockdown-in min phuar rih zel a. Pa ber dam sam loh avangin chhungkaw nu ber leh an fa, nula tlangvalten an hnathawh kal lai lo ṭhulh phah nitin ve ringawt se a fuh lo ang chiah hian, sorkar hmalak mekna tihṭhuanawp leh mipui rilru hruai sual tum niawm fahranin, tunlai hian eptu party worker ṭhenkhat chuan Development Board-te ṭhiat vek turin Media lam aṭangin rawtna an siam chamchi a. Kan Subordinate Service Board-te pawh ṭhiah rawtin, raw chi supply tender pawh tihtawp an rawt hial bawk a, archuk tuiloah raw chi supply chu an chhuah hial a, social media thlengin an la vawm zui nasa a ni. Heng mite hian sorkar sum awm dan leh kalphung an hre chiang lo hle nge, kawhmawh an bawl duh hrim hrim vang tih pawh hriatthiam a har khawp mai.
Hmanna tur bika sum awmsa, thil danga hman pen theih loh ang chi thawh leh zel insawisel sak hi chu i ching tam lo ang u. Hun harsa kan tawh lai hian sorkar chu kan ram hmasawnna turin a chet theih dan danin che reng se, dipdal lo hram i la, ram hmasawnna daltu nih tum lovang u.
Ṭanpuina kan dawng nasa :-
Health Minister leh thawktu dangte hmalaknain Mizoram chuan Pathian khawngaihna zarah ṭanpuina kan dawng nasa a. USA, UK, China, Germany-te tiamin Foreign ram 20 chuang aṭangin Oxygen Concentrator, Ventilator, Oxygen Cylinder, Face Mask hrang hrang leh PPE hmanraw dang kan dawng ṭha viau a ni. Covid Vaccine pawh India ramah a mi cheng tam dana chhutin a la ṭha ber kan la ni nghe nghe. Heng zawng zawng hi thawktute thawhrah zara Pathian malsawmna kan dawn a ni. Hri avanga thihnaah pawh hmarchhak State-ah kan la hniam fi lawr lak a, a lawmawm takzet a ni. A mimal leh chhungkua ang pawhin i ṭawngṭai bang lovang u. Kan thawhhona leh ṭanrual ṭhatna hi Pathianin mal min sawm a, Pathian malsawm tlak ni zel turin tha i thlah lovang u.
Sorkar thu kan zawm tha :-
Kum khat leh a chanve vel chhung chu inthlah dul chang awm mahse; hripui avang hian Partial Lockdown leh Total Lockdown inkarah kan la kal chho bek bek zel a. Tunah Covid Second Wave vangin ni 50 vel zet kan inkharkhip leh mek bawk a. Hemi chhung hian mipui pawhin sorkar thupek kan zawm ṭha a, sorkar thupek chu kan zawm ṭha tur pawh a ni a, VLTF/LLTF te thu kan awih em em a, a lawmawm hle a ni.
Kohhran leh NGO thlengin kan thawhhona ṭhatzia a lolang zel a. Thingtlang lama thlai chingtuten khawpui mite chungah an thar chhuah hmangin an rawn luang chhuak a, khawpui leh thingtlanga mi hausa tam tak pawh rethei leh chanhai zawkte tan an neih rosum phal takin an lo luan chhuahtir zel a, rualkhai takin ṭanpui ngaite hnenah Task Force-ten a sem hna an thawk ṭhin a ni.
Zonun ze mawi, tlawmngaihna hi a hunah chuan kan ramah hian a la nung reng tih heng aṭang hian a lang chiang em em a, 'thih leh ruam khatah, dam leh tlang khatah' tih thu vuantute kan la ni. A Mizo Kristian zia em em bawk a, i vawng nung reng ang u.
Thu puar paw leng :-
Sorkar, Health department, Police, VLTF/LLTF leh thawktu hrang hrangten nunna thapin rim taka hna an thawh mawlh mawlh lai hian, mahni in chhung lum aṭangin rinthu, thu puar pawleng leh thubelhchian dawllo tak tak hmangin mipui tihchi-ai tum an lo awm ve nawk zel mai bawk a. Tun hnaiah pawh ZMC-ah mi pakhat bill chungchangah thuthang dik lo an vawrhdarh nasa hman a, kha tiangte kha a ṭhalo takzet a ni, i sim ang u. Hri hi a la kiam mai hmel rih si lo a, nakin zelah pawh mipui hian a hman na zawng leh a peih peih thu leh hla thehdarh nazawng hi ringlo ang u, ṭul map lova kan rilru tibuaitu a ni ṭhin.
I & PR emaw department lam thuchhuak hriat hma chuan i lo chi-ai chiam nghal ringawt tawh lo ang u. Mitin mahni in lumah kan inkhungin kan hman em em vek a, phone kan bih nasat lai hian thubelhchian dawllo leh mahni duh zawng zawng kut zungṭang hmangin dawt sawi nan kan smart phone-te hi kheuh kheuh lovang u.
R.Hmaa