TESTING, TRACING LEH TREATMENT CHAK KAN MAMAWH BER

Pu Vanneihthanga’n Medical Opera­tional Team Chairman, Dr. Thiam­sanga MLA a kawmna kha ngun takin ka lo en a, a bengvarthlak ka ti a. Kan ‘line’ chu inang hauh lo mahse tunlaiah Covid-19 hripui chungchang thu ziak chhiar tur a tam tawh avangin Dr. Thiamsanga sawi ṭhenkhat kha han tuihnih ve ngaiin ka hria a.

Covid-19 hripui do nana mithiamte'n strategy ṭha bera an ngaih chu Testing, Tracing leh Treatment a ni. MNF sorkar hi chuan hripui vei hmuh chhuah thar an tam a hlauh avangin a loh theih loh chin chauh test a tih tir a, hei hian dinhmun hlauhawm takah min dah mek a ni.

Test hi a tam thei ang ber kalpui a nih theih nan ‘ramdom test’ nei se, khawi vengah te nge test tur a tam ang tih pawh chhui theih a ni. Chu chu random test ṭangkaina tak pawh a ni. Hri vei hmuh chhuah thar tam te, an kaina leh an theh­darh tawh dan chhui (trace) bakah, damdawi thiamna hmanga uluk taka enkawlin (treatment) he Covid-19 hripui hi do tur a ni a. Test, Trace & Treatment lo hi tihdan dang ṭha zawk an la hmuchhuak lo.

Pu Thiamsanga sawi ang kha chuan random testing an tih loh chhan chu hri kai thar hmuhchhuah tam an hlauh vang a ni ber a. Tichuan, Lockdown hmangin mipui min khung ta ngat ngat mai a ni. Testing, Tracing leh Treatment hi ṭha takin kalpui thei se chuan heti em ema rei hi keini ang mihring tlemna ramah Lockdown kalpui pawh a ngai tawh lovang.

Random testing hi Pu Thiamsanga sawi angin 'Community Spread a thleng em?' tih hriatna tur chauh a ni lo. Random test hmangin khawi area te nge focus tur tih hriat an tum tur zawk a ni. Hri vei hmuhchhuah thar tam hlauh vang ringawta random testing an ti lo hi thil serious tak a ni. Mipui kan him lo a, lockdown a ngaih rei phah. Mi tam tak eizawnna a tlakchhiat phah a, mipuite tan ngawih mai mai chi a ni tawh lo.

Test tam ila, hri vei dam lo pawh a ṭul chuan kan pung mai ang chu. An nat zual hmaa hriat chhuah vat khan an dam hma a, ICU-ah dah an ngai lova, senso a tlem zawk bawk a ni. Damdawi thiamna nen kan inenkawl ang a, Pathian zarah kan dam vat zawk ang a, lockdown pawh kan thlahdul vat thei ang.

Mihring dahna turah buaina tur a awm em ni? Kan inkhawm thei lova, Kohhran Hall leh Community Hall leh School tam tak a awm, school chawlh lai a nia lawm. Tuna min kalpui danah chuan test si lohin Covid vei tam tak kan awm tihna a ni a, chung mite chu vanduaithlak takin an chenna Inah lo boral ta se, sorkarin Covid vanga thi angah a puang dawn miah lo tihna a ni.

‘India ramah Covid-19 vanga thi kan tlem ber’ tih hi Minis­ter te tan uanna tur chi a ni lo, nunna pakhat pawh a hlu lutuk.

Zothani