DAWNTISEI
Mizoram Sawrkâr hian COVID hripui lêng avanga lockdown a pawhsei chungchângah hian ngun taka a inenfiah a ngai niin a lang. Ka ngaihdanah chuan, Covid-19 hripui hi chutia tihtawp mai chi pawh niin a lang lo, malaria ang mai hian khawvelah hian min chamchilh reng hial mai thei.
Tichuan, Mizoram sawrkâr hian engtia rei nge a ram mipuite hi he hri lakah hian lockdown hmanga chhanhim a la tum? tih hi ka zawhna a ni. Sumdawnna ruhrelte chu sawi danglam sak dawrhin kan awm a, an sum lakluhna chhah sak an nih avângin miharsa zawkte chu thih mai hmabâkin an awm ta, inhlawhfa chhungkuate chu manganna khur thûkah an lùt mêk a ni. Sawrkâr hnathawkte erawh lockdown hian a nghawng lem lo, thlabi hlawh pangngai an la miau a. A pawimawh ber erawh chu, heng khawsak harsa zawkte, lockdown anih ruala an chhungkaw sum lakuhna tihtawp saka awm nghalte hi an ni, hna an thawh theih loh avângin hlawh an 'neilo' a ni. Mizoram sawrkâr chuan chhuanlam dawrawm tak siamin, 'Kan hriselna inenkawlna a la pachhiat avângin lockdown neih chhunzawm a ngai a ni', an ti teh fo mai bawk a. Lockdown chhunzawm zel ai chuan engvângin nge kan hriselna lama kan inenkawlnate chu tichangtlung tura hma a lâk mai loh? Mizorama kan inenkawlna dinhmun leh ruhrelte a ṭha tawk lo anih chuan, chutiang siam ṭha a, hri do turin a theihna zawng zawng sawm khawm tur a ni mai lo em ni?
Chutih lai chuan, Covid kai damlo, damdawiin leh CCC-a awmte chu an inenkawlna damdawi mante tum tîr an la ni leh lawi bawk si.
"Kei, Mizorama BJP MLA awmchhun hi chuan lockdown neih chhunzawm hi ka thlawp tawh lo bur a ni tawp mai". He lockdown chhunzawmna hian mirethei, ei chawp zawng, sumdawngte tawrha namen lovin a belhchhah leh dawn a ni.
Sawrkâr hian hetiang hian hma la rawh se:
1. Sawrkâr damdawiin zawng zawngah khum, ventilator, damdawi leh a dangte pek belh rawh se.
2. Lockdown hi an la chhunzawm cheu anih pawhin, sawrkar hna a ngheta thawk awm lohna chhungkaw tinah sum fai ṭanpuina pe rawh se.
3. District tinah RT-PCR khawl bun rawh se.
4. Medical Oxygen indaih lohna a lo thlen thulh atana hman turin, hmun remchang apiangah, a tam thei ang berin Medical Oxygen Plant bun rawh se.
5. Lockdown lai hian, Covid kai damlo zawng zawngte hnenah chaw leh inenkawlna damdawi leh a dangte a thlawn vekin damlote hnenah sawrkârin pe rawh se.
6. Awmze nei takin lockdown thlahdul ni se.
7. Hri danna pêk hna hi an theihna zawng zawng sawm khawma chakin kalpui rawh se
He corona hripui hian kan khawvel hi a chhuahsan mai dawn lo tih hi kan sawi nawn leh hrâm teh ang. Chuvang tak chuan, hnathawh dan kal hmang thar (new work culture) hi Covid hripui lên lai hian inkaihhruaina (SOP) khauh tak hmanga kan kalpui a ngai a ni. Mahse, sawrkâr hian mipuite an him theih ngeina tur dan, a chunga ka sawi tak ang hian uluk takin duang thung se.
Hei erawh i hre reng ang u, lockdown chhunzawm tlut tlut ringawt hi zawng Covid-19 hri umbona tur kawng a ni lul lo e. Covid-19 vang ni lovin, 'Lockdown' chhunzawm zel vâng zawk hian mipuite 'thaw a chham' takngial mai dawn e.
Dr. B.D Chakma, MLA