2023 inthlan thlirna hmasa ber
Kum 2021 kum lai hawl kan lo thleng leh dawn ta reng mai a, kan MNF sorkar pawhin a term chanve chu a hmang a ni ta a, kum 2023 inthlan tur hi thui tak a thlir lawk theih ta a ni. Kum 2023 ah hian party pahnihin MLA pakhat ve ve an nei chiang sa tawh tih a sawi ngama chu chu BJP leh MNF an ni.
BJP hian Tuichawng Bial hi an la chiang dawn tih hi mi mawl nileng lo tan chuan a chiang a, he bial hi Dr BD Chakma bial a ni a, Congress bial him niin Congress in Dr BD Chakma hi an enkawl danah lungawi lovin BJP ah a insawn a, BJP ah chiang takin a tling leh a ni. He Tuichawng bialah hian Lok Sabha inthlan pawh khan ṭangrual candidate chuan vote a hmu ve mang lova vote 400 pawh an hmu ve lova, chuvangin Tuichawng hi chu BJP tan bial him a ni a, kum 2023-a MLA tur hi tunah pawh a puang ngam leh ta der tawh a ni.
ZPM in bial pakhat chiang taka an neih chu Serchhip bial a ni a, Serchhip bial hi chu kum 2021-ah mai inthlan a niin Pu Lalduhoma vote 5000 chuang in a tling a, chuvangin kum 2023 chawnhu lamah inthlan puan a nih tawh mai dawn avangin Pu Duhoma hi mawi lo takin a khawsa emaw, hmingchhiatna lian tham tak a nei thar thut a nih loh chuan kum 2023 ah hian Serchhip MLA a ni leh dawn tiin a puang ngam ve tawh mai bawk awm a, chuvangin MLA bial 40 ah hian bial 38 ah chiah inthlanna hi kal pui a ni dawn tiin a sawi theih a ni.
USA-ah khuan swing states tiin tu party tan pawh bial him bik lo, candidate azir leh issue azir a mi vote tling ṭhin state an awm a, chutiang swing constituency tih ve mai theih hi Mizoramah hi chuan a tam khawp a, "Kan bial him" tih theih bial hi chu vang tak a ni a, tunah hian ruling party tan pawh 'Bial him' tih tur a vang a, eptu lam tan pawh 'bial him' tih tur a vang ve tho a ni. Ruling tan chuan Covid-19 hri leng hi kawng tam tak ah hming ṭhat pui ve theih a ni a, hming ṭhat pui loh pawhin a hming chhiat thupna remchang a ni a, "Pawisa kan nei lova, Covid vangin," tih a remchang a, Covid tel lo pawhin pawisa hi chu kan nei dawn chuang lo hrim hrim an tia lawm. Aizawla ruling MLA zawng hi chu an thin a phu dep dep dawna AMC inthlan ah khan ZPM in an hnaih thuak thuak riauva, mahse a ZPM pawhin an MLA neihna bial an hum zo chuang lova, Congress hi mihring nei ngah sa inchhal siin inthlan hnuhnung aṭanga en chuan bial him hi an van ve bawk a ni. Chhim lama RTPCR khawl boruak hian 2023 hi a nghawng phak ang nge nghawng phal lovang? tih pawh hunin a la rawn hril ang.
R Lalruatsanga