Thingtlang mîte u!
Thingtlang lam kan unaute, Aizawl leh khawpui danga an kal, che khawr leh zei lo zawk nia an lan lai khân khawpui mî tam tak chuan thlíar hran phêt kan lo tum a. Fiamthu bungrua ang maia ngai tawk kan tam ṭhin. Kan en a, an fîp bîk leh an fû-ke hram bîkte kha kan inan lohna lian tak, sawi lan kher ngai loa 'anni' tih tichiangtuah kan ngai a. Khawpuiah chuan tlema inthlahrung zawk tura ngaihna hial kan nei ru reng em le!
Tunah chuan an hnathawh kawr leh an fû-ke chang hrap mai zahawmna leh takna kan hmù ta a. Ni sa hnuaia inpho mâwk satliah an ni lo tih chiang takin min entir ta! An tel lo pawha awm thei thâwka thaw ṭhin tam takte kha, an ei ang kan ei ve theih loh hlâuin min tuam hlawm ta hlauh a nih hi. Nui chungin kan thlai ei tur an lam khawm a. An phur haw a, an tel thlap a. Mumal takin an khungkhawm a, antui hâng leh thlai tharina hrawk a lo tihno laklawh, hrîin a suasam mêk si khawpui mite hnenah a thlawn liau liauin min pe ta ruih ruih mai a. Keini hi thingtlang aṭanga in thlai rawn zawrh lo dawn chîngte kha kan ni ta lo emaw kan inti hial mai dâwn!
Tunah chuan an thlan tui, chemtum leh tuthlawh nen min chhanchhuak turin a phêk chhuah ta a. Vui hauh loa, thlan tui kâra hmangaihna hmel an tar lang chu kan tán ennawm mak, sawifiah thiam rual loha min tithlamuang ru vawng vawng thei khawpa thiltithei a ni. Thlawhhma kawng vawi khat pawh zawhpui thei lo chungin in thlai thar kan lo fanghma no ei a. Changkanna hi khawthlang lam emaw khawchhak lam emaw hawitir ve chiam mah ila, in tel loa changkan kan tlin hlawl lo a ni.
Sum nei pawhin an lei phâk loh, bank-a tangka hlawm lian tak takin a thlen phâk loh ramdâi chu keimahni avangin an luh chhuah a. Vangvat leh thosi kârah, thophurh leh tlip, tît leh rul hlauhawm paltlangin lawm takin kan tân tha leh zung an sêng a. Anni an chêt theih chhúng hi chuan Mizo kan ni ve hi kan lawm zual zel dâwn a nih hi.
In hnathawhna kut kan hmu mawi thiam tawk lo ṭhin kha min ngaidam ula, in chempui ngaihsanna châng kan hre lote kha min hrethiam ang che u. In hmai thû leh vun châr kha thawhrimna vang a ni tih kan hai kha min ngaidam ula, khawpui chevel mila changkanna teh ṭhin zawng zawngte hi khin zui tlak kan awm lo a ni tih min hriatsak hram dâwn nia.
In thawhrimna rah a thlawna kan têl hian zahawmna awmze dik min zirtir se la. In thlawhhma kawng khan hmasawnna awmze dik min zirtir bawk se la. Changkanna hrilhfiah dan ṭha min zirtirtu in ni a. Ngaihsan tur dik min zirtir a ni. Mihring nunhonaah hian midang ngaihsaknain nun a hneh theihzia in puang chhuak mêk tih sawisak khanglangtu che u nih pawh kan hreh zo dâwn e.
Thlan tui hmangin kan mamawh in chhang a. Taihmakna leh lainatna nena in tuam hlawm khawpui hi hri avangin ṭap mahse, in hmela chakna awmin chanchin danglam a thlen kan hlimpuizia hi in hmu phâk vek lo zawk hial ang. Theih se la, mittui nen kut thing ngeia chibai buk duh che u nutling leh patling veng tinah kâwn khar tham tak meuh meuh an awm asin.
Khawpui hi in ta a ni a. Khawpui hi in tel loin kan kal thei lo. Khawpuiah hian mikhual in ni lo a. In aiawhin kan awm mai zawk a ni tih hi kan fiah zual ta a ni e- hmangaih takin in tuamhlawm si a.
C. Lalbiaknunga, Durtlang North