Mi dangte nunna chelh din sak ang u

Blood group hmuchhuaktu Dr. Karl Landsteiner-a piancham­phaphak denchhenin June ni 14 hi WHO chuan thisen petute ni (World Blood Donor Day) ah puangin kum 2005 khan an hmang ṭan a. Mizoramah chuan kum 2007 aṭangin kan hmang ve ṭhin a ni. Thisen petute chawimawina leh thisen pawimawhzia infuihtharna ni atan hman ṭhin a ni.

Nikumah khan coronavirus hripui leng avangin mumal takin kan hmang thei lova. Kuminah pawh hripui leng do nana inkhuahkhirh chhunzawm zel a nih avangin kan hmang thei ta lo fo a, a pawi tak zet a ni. AVBD chuan a lo tih ṭhin dan angin thisen petute niah hian Voluntary Blood Donation Award sem a tum a, inkhuahkhirh chhunzawm a nih avangin hun remchang danga huaihawt turin sawn a ni.

Khawvel huapa thisen petute ni thuchah (slogan) inṭawm chu sapṭawngin “Give blood and keep the world beating” tih a ni a. Hei hi Mizo ṭawng ngial ngan chuan “thisen pe la, khawvel chelh ding rawh” tiin a sawi theih mai awm e. Hei hian a tum ber chu - thisen pek hmangin kan mihring pui, damlote nunna chhanhim leh chelhdin sak hi a ni. Thisen awm loh avangin nunna hloh an awm tur a ni lova, damlote thisen mamawh chu mi hrisel te zarah a awm zel tura beisei a ni. A bik takin thisen pe tura ṭhalaite cho chhuahna leh fuihthar nan he thuchah hi siam a ni.

Nikum April 2020 - March 2021 chhung khan Kohhran ṭhalai pawl te, NSS volunteers te, YMA te, Sawrkar department te, NGO te leh mimal tam takin thisen an pe a. Hripui leng avanga harsatna hrang hrang karah thisen pek hi kalpui reng a ni a. He hun chhung hian a thlawna thisen pek zat chu unit 23,911 niin thisen pek zawng zawng aṭanga chhutin 89.66% a ni.

Mizoram chu India ramah state ti ṭha ber pawl kan ni a, a lawmawm tak zet a ni. Hripui leng kara thisen petute hi an chhuanawm hle a ni. Thisen petute ni denchhen hian thisen pek kawnga thil pawimawh zual han tarlang ila:-

1. Thisen pek a hlauhawm lo: Mi hrisel ṭha pangngai chuan a mamawh aia tam thisen hi englai pawhin an nei reng avangin hrisel ṭha pangngai tan thisen pek hi a hlauhawm lo a ni. Taksa rih zawng a zirin thisen neih zat erawh a in ang lo va. Mipa kg 50-a rit chuan kg khat zelah ml 76 neiin a chuang liam 1200ml a nei a. Hmeichhia chuan kg. khat zelah 66ml neiin, kg 50-a rit chuan thisen chuangliam ml 800 vel a nei a. Mizoramah hian ṭum khata thisen lak nan 350ml dawng blood bag hman a ni a, hei hi unit 1 a ni. Thisen neih zat leh thisen lak chhuah zat chhutin thisen unit khat lakchhuah hnuah pawh a chuang liam tam tak an la nei tho a ni. Tin, thisen cell hi taksaah ni 120 bak a dam thei lova, cell thar a insiam zel a, kan pekchhuah loh pawhin thisen cell chu a thi tho ṭhin a ni. Chuvangin, mi hrisel ṭha pangngaiin thla tum dana thisen pek hi hriselna atan a pawi lova, chhiatna tham a tling lo a ni.

2. Mi tin mawhphurhna a ni: Blood Bank buatsaih leh hna­thawktute - doctor, nurse, techni­cian adt. dah hi sawrkar mawhphurhna a ni a. Thisen dah­khawl erawhchu mipui chanvo, khua leh tuite mawhphurhna a ni thung. Blood bank-ah thisen dahkhawlsa awmloh vangin miin a nunna chan ta sela, nang leh kei hian kan mawhphurhna kan hlen lo tihna a ni. Mihring mamawh thisen chu a mihringpui thisen veka phuhruk ngai a nih avangin thisen pek hi mi tin mawhphurhna a ni. A bik takin thalaite kutah a innghat thui hle a ni. Ram changkang zawkah te chuan puitling, thisen pe thei khawpa hriselna ṭha nei chuan an mawhphurhnaah an ngai hmiah a ni.

3. Mimala chetchhuah a pawimawh: Mizote tlawmngaih dan kalphung hi a huho a ni tlangpui a. Thisen pek pawh hi pawl hrang hrang hian an ngai pawimawh hle a, a hlawk em em a ni. Amaherawhchu, pawl ho hminga thisen pek hian kan mamawh hi a phuhru zo lo hle a. Nikum chhung khan pawl ho hmingin thisen pek runpui vawi 530 huaihawt niin unit 15,277 lakkhawm a ni a, mimala pek hi unit 8,634 a ni. Kan mamawh phuhru zo tur hian mimala chet chhuah nasat a pawimawh hle a ni. Hun ralmuangah pawh thisen pek runpui huaihawt hi a hautakin a buaithlak em em a. Hri leng karah phei chuan a huhova thiltih hi a buaithlak lehzual a. Pawl hminga huaihawt kher loh pawhin mimal tin mawhphurhna a nihzia hi kan hriat thiam a hun tawh hle a ni. Pawl ho tih atana kan dah chhungin thisen mamawhtute nunna kan chelh ding hman lovang tih a hlauhawm a ni. Khawvel ram 195 zinga ram 62 te chu a thlawna thisen pek zaa za (100% VBD) nei ram an ni a. Heng ramte hi mimala thisen pek uar ram an ni a. An khua leh tui te’n thisen pek an ngai pawimawh a, blood bank-ah kalin thisen an pe ṭhin a ni.

India ramah pawh hian thisen pek uar tak tak an tam em em tawh a, thla thum dan a pe ṭhin, regular blood donor tam tak an awm a. State dangah hian vawi 100 aia tam pe tawh an awm ṭeuh a ni. Thisen pek kawngah hian mimala chet chhuah ka uar tulh tulh a pawimawh em em a ni.

4. Inthlahdah a rem lo: Hmasawnna kawng hrang hrangah hian kan thiltih ṭhat te chu kum tam tak atana ṭangkai zui a ni fo ṭhin. Thisen pekah erawh chuan nimin lama kan tih ṭhat kha vawiin atan a rin theih loh va, a thar zelin chet chhuah a ngai a ni. Ni tinin thisen mamawh damlo an awm zel a. Nikum lamah ti ṭha viau pawh ni ila, vawiin atan a rin theih loh avangin inthlahdah a rem lo a ni. Naktuka damlo te hman turin vawiinah hian kan lo pek lawk a ngai a ni. Mamawh huna hman mai theih tura thisen thianghlim lo dahkhawl hi a pawimawh em em a ni.

5. Inkhuahkhirhna danin thisen pek a phal: Thisen pek hi a pawimawh em em avangin Sawrkarin hri leng dona tura inkhuahkhirhna dan (SOP) a siamah hian thil tih theih te zingah a dah tel a. Inkhuahkhirh chhung hian thisen pek runpui a huaihawt theih reng a ni. Mimala pe duh tan pawh ni tin blood bank-ah a pek theih a ni bawk. Hun harsa kan tawh mek lai hian thisen mamawh damlo an awm reng tho avangin thisen pek kan ngaihpawimawh hi a ṭul hle a ni.

Tlangkawmna: Mizote tan thisen pek hi kan hnam nun ze mawi, tlawmngaihna nena inhmeh em em a ni a. Ral leh sa hrang hmaa zam ngai lo Mizo tlangval tan ral leh sa hrang an bo zo tawh a. Hetih lai hian mi dangte nunna chhan turin thisen pek hmang hian tlawmngaihna nun ze mawi chu kan lantir thei a ni. Kristiante tan phei chuan Isua Krista nun entawna rawngbawlna tur kawng pawimawh tak a ni a, chuvangin thisen pek hi Mizo kristian tena kan tih makmawh a ni e.

Damlo thi mai turte nunna chelh din sak turin thisen pe ngai lote pawhin thisen pe ila, vawikhat pek duh tawk mai lovin thla thum dana pe ṭhin turin inbuatsaih ṭheuh ang u.

C.Lalnunnema, President, AVBD, Mizoram