Lunglei RTP-CR a ngaihnawm chho dawn e!

Lunglei mipuiin Covid-19 hri kai leh kai loh endikna, RT-PCR neih an ngiatna chuan vung thar a chhuah zel a, a ngaihnawm chho zel dawn ni paw'n a lang e.

Kan hriat vek tawh angin, MPCC Treasurer, Tho­rang bialtu Pu Zo­dintluanga'n Lunglei Civil Hospital tana RTP-CR (oh..RT-PCR) khawl a pek chu chhan hrang hrang vangin Mizoram Sorkar-in a hman theih rih loh ni-a a sawi chu RTP-CR Lab. for Chhimbial-in hman hram dan ngaihtuahpui tura Sorkar a ngen hnuah pawh hman mai a nih tak loh avangin RTP-CR Lab. for Chhimbial chuan High Court-ah PIL a thehlut ta rup mai le!

Lunglei Civil Hospital tan RT-PCR pek hian pek a nih tir aṭangin sawizui a hlawh nghal hle a. A petu pek dan leh pek chhan dik tak hriatpui ve lem lo mah ila, bun a nih mai loh chhan ni-a ngaih Politics thil inphum ni ngeia lang hi a duh a nih phawt chuan Sorkar kaihruaitu MNF Party hian a tirah khan a hmet mit thei a. Chutiang ni lova, a hluhlang zawnga thil a kalpui lui tlat ni-a a lan avangin hetiang buaina hi a thleng chho ta ti ila kan sawi sual awm lo e.

Kan Political party-te sukthlek leh an ngaihdan chu ka hriatpui ve lem lo naa, an ngaihdan ni chiah loah pawh tun aia mipui tana dawn sawn nuam deuh zawkin thil kalpui ṭhin se a duhawm ka ti a. RT-PCR thu inchuhah pawh Sorkar fawng vuantu MNF lamin bun a nih theih loh chhan chhuanlam hrang hrang a siamte chu Lunglei mipuiin an pawm lo tih an hmalak zui danah a lang reng a. High Court lam hial thlengin thu a kal phah dawn ta a nih hi.

Mi tam tak ngaih­danah RT-PCR bun leh bun loh chung­changah High Court lama zualko chu thil tih dan phung a ni em tih zawhna a awm theih laiin, ngaihdan pakhatah chuan Sorkar thu­neitute thil tih dan (Civil Administration) laka lungawi zo lo, mipui nawlpui nghawng thil ni siah chuan PIL thehluh mai hi kawng awm chhun niin a lang a, hei hian hun zal zel tura Sorkar hmalak danah a ṭha zawngin nghawng a neih ngei pawh a beisei awm a ni.

Samuel Lalruatsanga