CM hnenah Lehkha ka thawn a...

Kan Chief Minister zahawm tak hi June 9 (Nilaini) khan lehkha ka thawn a, a hmu ngei a, CMO aṭang pawhin an rawn acknowledge tawh nghe nghe a ni. Chutihlaiin ka lehkhathawna ka ziah lante chu engmah ka ngenna tih hlawhtlin a la awm lova. A thu hi a la hlui chuang lo bawk a, a effective lehzual theihna turin mipui vantlang hriatah kan CM zahawm tak hnena ka lehkhathawn hi tlangzarh a ṭhain ka hre ta a, Mizoram tana ṭhaa ka ngaih a nih avangin heti hian ka rawn dah chhuak ta a ni:

To,

Pu Zoramthanga,
Chief Minister zahawm tak

Ka support che : Mizo mipuiin kan aiawha kan thlan tlin sorkar hi chu ṭha taka rorel tura ngaiin ka support mai a. 2018 Inthlan zawh khan kan tlin ve zawh tak loh avangin ‘moral responsibility’ la in State BJP President nihna chawlhsan dilna kengin Delhi-ah ka kal a. Kan National President leh National General Secretary te chuan, “Rei lo te chu lo nghak la, i aiawh tur kan siamrem hunah i la chawl dawn nia. Nagaland Chief Minister Pu Rio pawh Tribal Kristian a ni a, Regional Party nichungin BJP rem takin a thawhpui mai a, hma lo la rawh se” an ti a. Kan National General Secretary chuan Pu Rio a phone a, ‘Mizoramin BJP an hrethiam lo, Pu Zoramthanga hnenah lo pui teh’ a ti a, kan awm lai ngeiin December 14, 2018 ah Nagaland C.M chuan a phone nghe nghe che kha.

December 15, 2018 ah i sorkar thar chu rinawmna thu tiama lakluh a ni a. Keini pawh Delhi aṭangin kan lo hawng a. A tuk December 16, Pathianni chawhnu inkhawm ban 3pm ah appointment min pek angin Ramhlun Venglai a i inah kan lo leng a. Kan lawmpui che thu leh ṭha taka Zoram hruai tura kan duh thu kan hrilh che a. Delhi thlenga Zoram tana hma la tlang turin kan MLA neihchhun chu ṭhibeh a dah turin kan ngen bawk a che a. Hei hi chu Chakma a nih avangin kan thei lo a ni tih thu a hnuah i palaiin min hrilh a, kan ngaithiam mai a. Ka aiawh President ṭha tak an ruat a, chawl mah ila sorkar kal tluang tura ka duhna chu a pangngai reng a ni.

In renchem : Nangmah ngei pawhin sum harsatzia i sawi a. Chief Minister’s Relief Fund te a zau thei anga Covid-19 hri do nana khawn a ni a. Mahse kan sorkarah hian inrenchemna a lang chuang tlat lo. MP Area Development Fund kum hnih atan an titawp a, an hlawh an cut bawk a. Kan MLA te chuan an Fund hi an bial mipuite hri do ṭanpui nan an hmang ṭangkai em em a, mipui pawhin an thlamuan pui hle a, MP ho an hrek ang chuan a tih ve chi lovang.

Amaherawhchu, SEDP Board 14 lai, Minister of State enkawlna zat senso ngai leh MPSC awm reng chunga Subordinate Service Selection Board (MSSB), an thawh ṭul leh ṭangkai kan hriat loh te hi chu ṭhiat la. Rua supply lo tih ve chhen te hi titawp rih la. Sum kan harsa a, i renchem tak tak a ni tih a lang ang.

Covid-19 Hri do : India a ti ṭha ber pawla kan lanchhan hi mipui ṭanrual em vang a ni. Amaherawhchu, i zawng zawng hi i chhuah lo deuh tlatin a lang. Lunglei RT-PCR khawl te hi sawi hnawm kual vel lo in bun mai la. Pu Zodintluanga a hmingṭha a nih pawhin engnge pawi. Pu Thantluanga (Hauva & Sons) pawh a hmingṭha tho alawm. A chhawr tur chu mipui an ni a, mipuiin an chhawr chuan a lawm ber tur chu nang leh Dr. Thangtea in ni tho tho. ZMC a khawl pakhat bak awm pawh hi Champhai leh Kolasib ah bun daih ni bawk rawh se.

Random Test tih zel chu kan hmu chhuak tam lutuk ang a, dahna tur kan indaih lovang tih vanga titawpa Lockdown-a mipui hrek beh reng mai hian hri a ti tlahniam thei chuang lo a nih hi. Sorkar hnathawk ve lo te a ti rethei zual mai zawk a ni. A tam thei ang ber test nise, a kai enkawl hma hi dam leh hma na a ni a, a dahna te chu Kohhran leh YMA te, Sikul te dil chuan an remtih zel ṭhin kha. Volunteer a thawkte pawh hi daily rate tal chuan lawmman pek ni bawk rawh se.

In hawng zau rawh : Committee i koh hian MKHC aiawh pakhat leh Central YMA President i duhtawk mai ṭhin a, an ṭha tehmeuh mai. Opposition MLA Group aiawh te, Kohhran leh NGO pawl lian deuh aiawh te pawh ko tel ṭhin ta che mawle, a uiawm lo emai. Ṭanrual lehzual nan a ṭha alawm.

Ṭawngṭai ho : MKHC in emaw, Kohhran malin emaw ṭawngṭai rual te, Crusade te, LPS leh Zonet kaltlangin an buatsaih ṭhin, a ṭha khawp mai. Mizorama lal ber leh chungnung ber i ni a, nangmah ngei hian Lammualah SOP zawm chungin, inkhawm buatsaih la. Minister leh MLA zawng zawng te, Kohhran tin aiawh Pastor, Officer leh Father panga ṭheuh te, NGO aiawh pathum ṭheuh te kokhawm la. Nang leh Pu Lal Thanhawla leh Pu Lalduhoma te ṭhu tlarin ṭawngṭaina tur item han sawi ṭheuh ula. In vaiin tih takzetin Pathian hnenah lawmthu sawi chungin sual thupha chawi a ngaihdam dilna han nei ula, reserve nei miah loin kan ram leh hnam tan han ṭawngṭai teh u. Lalpa chuan min ngaidamin min chhanchhuak ngei ngei ang.

PROFESSOR J.V. HLUNA
Ex-MLA & Ex-BJP State President
Date: 9th June, 2021.