Tlin pui tham leh tlak pui tham
Kum 2008 ah Congress party chuan hneh taka sorkarna an siam hnuah kum 2013 ah a hma aia chiangin sorkarna an siam leh thei a, 'marawhchu he Congress party tho hi kum 2018 ah khan mualpho takin an tla leh.
Congress khan tlin pui chiang tak an nei a, tlak pui pawh chiang tak an nei angin MNF hian kum 2023 inthlanah hian tlin pui theih leh tlak pui theih an neih te tarlan hi a hun tawh a ni.
Congress kha chuan MNF term hnihna rorel chhe lutuk te, sum dinhmun chhia te, mipui lungawi lo te, sorkar ninna (anti incumbency) leh NLUP lama nuai 1 kha an rawn tlin pui a ni. Chiang taka an tlin nawn theihna turin NLUP kha an sem ta tak tak bawk a, an MLA te langsar taka hmingchhia an awm lova, eirukna tia a langsara puh tur kha an nei vak lo bawka (eiru lo tihna a ni kher lo) kum 2013-ah an tling nawn leh a ni.
Kum 2013 inthlan zawh hlim kha chuan MNF kha chu an te tawh lutuka an ral mai a hlauhawm tawh a, nimahsela Congress an over confident a, mipui duh loh tih hre chungin zu an zuar lui a, pawisa neih loh vang ni si lovin kawngpui chhia an ngaihthah lui a, Central-ah Congress an che chhe bawk a, Congress chhungah inhrui pawhna awmin a keh chhe ta nge nge a. Vice President a chhuak a, Congress chu an tla ta a ni.
Kum 2018 inthlanah mipuiin MNF an ngaihzawn thar leh vang ni kher lovin a thlak thei tura an rin kha an vote tling ta a niin a lang, MNF vote share kha a sang lo a ni. MNF tlin chhan chu candidate an neih ṭhat vang (MNF ni ngai lo mi thiam leh mi hming ṭha an la lut ngam), Congress an nin tawh vang, SEDP nuai 3 chhung tin hnena sem an intiam vang, Cong zu zawrh duh loh vang, elpui (opponent) an chak tawh loh vang te kha a chhan lian zingah a tel a ni.
Kum 2023 ah MNF hi tling nawn leh tur ni se an tlin theih chhan tur tam tak sawi chhuah sen loh a awm ang. Side B lamah an tlak theih chhan tur hi a risk theih ve nual a, chu mi zingah chuan pawisa vang (Covid hma pawhin a vang), bial tam zawka pawisa nei lo ruling MLA te laka party mipui vuina, minister ṭhenkhat mipuiin an duh khawp lo tura awm leh ṭhenkhat invai vung ninna, MLA hming hliau (sangha bomb, nula kawp neia puh tura awm, sorkar hnathawk laka silai leka inpuhna, mahni MLA pui tla tura hek duhtu), Serchhip inthlana mualphona te hi a sawi theih a. Nuai 3 hi an sem loh chuan mipui lakah sawi mam a harsa hlein a rinawm bawk.
Lalrammawia