POLITICIAN NI TÙRIN HAUSAK KHER A NGAI LO

Politician chu rorèl dàn thiam mi, ram leh hnam hmasawnna ngaihtuah avanga Politics khél ṭhin tiin sawifiah mai ila a ṭha àwm e. Politics chu ram awp dàn ngaihtuahna a ni mai a. Democracy ramah chuan mipui thlan tlin Politician te'n ram rorèlna fawng chelhin, mipui tán hnathawk tùra thutiam lain, ram an awp ṭhin a ni. Mizo mipuiin Politics kan thlir dàn leh kan hmuh dàn hi kan thlak danglam a hun tawh hlé mai. Thil ṭha lo awm khawmna, Pathian tel lohna ang maia kan hmu ṭhin hi a dik lo hléin a lang.

Mizoramah ngei pawh hian Politician ṭha, ram leh hnam véi mi, mi ṭha tak tak kan nei ṭeuh a, ṭhatna kan teh dàn a zirin ṭha táwk lo pawh an awm ve bawk ang, Bible-a kan hmuh, buh tak leh buh lem an ṭo zà ang hian. Member of Legislative Assembly (MLA) te'n mahni bial chan ṭheuh neiin, mipui leh ramin hmá kan sàwn dan tùr an ngaihtuah a, an phák tawkin hma an la ṭhin a ni. Tin, Aizawl bik tan Municipal Corporation awmin, bialtu Councillor, ram leh hnam, khawtláng hmasawnna véi mi kan nei bawk a ni.

Salt Lake City Utah, USA Ex-Mayor-Ben McAdams tia a hming kan hriat, a hmingpum erawh Benjamin Michael McAdams, Jan 7, 2013 aṭanga Jan 2, 2019 thlenga Salt Lake City Utah, USA a Mayor kha mi smart tak, pa fel tak niin, thiamna lamah chuan Bachelor of Law a ni a. Chanchin ngaihnawm tak pakhat langsar deuh a nei a, chu chu kutdawh, chénna in nei lo (Homeless) anga a inthuam kha a ni.

Mayor a nih hun chhung hian a hna tlin taka thawkin, ram siamṭhat hna nasa takin a thawk a. Zir chhuah theih mai loh, tih fuh táwk loh thil pakhat a nei ta! Chu chu mi rethei, kutdawh, chénna in leh lo nei lo (Homeless) enkawlna tùr an duana awm ṭha duh lo an pung ta lutuk kha a ni.

A chhan hmu chhuak tùrin a hnuaia hnathawkte leh mithiam hrang hrang ruaiin, theihtawp chhuahin a buaipui a. Mahse, a beisei ang rah ṭha (result) a hmu lo. Uluk taka a ngaihtuah hnuin amah chuan kutdawh lem, chénna tùr nei lo (Homeless) anga insiam chu a rilruk a, a insiam a, a duh a hmuchhuak ta. A thil hmuhchhuah chu mak a tiin, a harh chiang ngei mai. Sawi vek lo ang, a sei lutuk dawn.

Ben McAdams aṭanga zir tùr lo lang nia ka hriat chu, mi rethei, mi harsa tam takte dinhmun anga inchan a, an nun (life) zu tem phák hi a pawimawh hléin ka hria. Tih tak zeta hnathawk mi, mi pamham lo, ram leh hnam bakah mi rethei dinhmun thlir thiam a, chawikán thiam mi, sum leh pai enkawl (Finance management) thiam ram hruaitu lú hi kan mamawh tawh hléin a lang. Hmasawn kan duh tak tak chuan Chief Minister intlawnsiak hi kan bansan a hun ta bawk.

Politician ṭha ni tùrin hausak kher a ngai lo-
Politics hi sum ngah, intheh lár thiam, ṭawngkam thiam avang ngawta khelh chi niin a lang lo a. Ram leh hnam siamṭhat tum, mi rethei chawikán duhte telna chi, Pathian rawngbawlna rilru púte telna tùr niin a lang. UT leh State kan nih hnu kum 49 chhung hian hmasawnna sawi tùr ting chu awm ṭeuh mah se, kan la intodelh tlat lo. Thil zawng zawnga intodelh theih chu a ni hauh lo. Engemaw tala kan intodelh piah lamah, ram danga kan thil thar thawn chhuah (Export) neih ve a nghahhlelhawm tawh hlé a ni.

Sum hi a pawimawh a, a tel lo chuan hmasawnna (Development) a kal thei lo a ni tih hi mi à niléng lo chuan kan hrethiam vek àwm e. Sorkar sum enkawl tùr chuan mithiam bik an ngai a, ram hmasawnna leh mi rethei chawikánna atana thawk tùr chuan mi taima, mi dik leh rinawm an pawimawh bawk. Chu hnàthawk tùr chuan mi hausa kher an ngai lo a, kan aiawh atana kan thlanchhuah dànah mipui kan inenfiah a hun tawh a. Mipui aiawh tlak ngei kan thlan chhuah thiam a ṭul ta hlè.

Mi ṭhenkhat chuan MLA ni tùrin campaign na atan sum an tawktarh nasa a, suma inlei tlin theih an inring ṭhin. A theia mual mual pawh an awm ngei ang. Mahse, sum hmanga inlei tlin tumte buaina chu sum bawk a ni a, MLA/Minister an nih pawha an tum hmasak ber chu, an sénso tawh neih lét leh duhna a ni ṭhin. Politician zawng zawng an ni vek kher lo a, engemaw zat hi chu an awm ngei ang. Ngaihtuah zui peihte tán...

A tlángkawmna-
Mizoram hmasawnna tùr hian mipuite'n mi taimà, mi dik leh mi rinawm, thlan chhuah nacháng kan hriat hunah chuan hmasawnna leh changkanna dik kan hnaih ve tawh ang a. Party tin pawhin heti ang mi hi Mizoram inawpna ngaihtuahtu atana an thehchhuah ngam hunah chuan Mizoram hian hmuh theihin hma kan sawn a rinawm a. Tin, mipuiin kan ngaihhlut tùr (values) dik kan hriat hunah chuan ram hruaitu, mi ṭha tak tak kan neih belh a beiseiawm a, engtik niah emaw chuan Pathian zarah kan ram hian bungthar a la kai ve ngei ang.

David Zochhuanmawia (Vida Hrahsel Saza)