Hripui leh rawngbawlna kawng thar

Hmanni chu Covid-19 vaccine ka va la ve a, vaccine kan lakna hi kohhran pakhat hall a ni a, hall chu sorkarin vaccine pek chhuahna atan an hman sak a, an hmunhma in a zir bawk a, ruahmanna a fel ṭha hle mai a, a lawmawm hle in ka hria.

He kohhran te hian vaccine pek hi an khawmpui thlen a ni ber a, an hall chauh hman tir lovin kohhran thalai KTP ten nitin an in duty chhawkin vaccine la tur hi an pui a, chung duty ho ei tur te chu kohhran hian a tum sak vek bawk a ni awm a. Sorkar lam hian vaccine hi a thlawn in mipui hnenah an pe a, kohhran in a buaipui ngai an buaipui zarah mipui ten felfai takin vaccine kan dawng thei ta a ni. Tun kan hripui donaah hian sorkar leh khawtlang hruaitu te, tlawmngai pawlte bakah kohhranten theihtawk an chhuah a. Kohhran pawh hian rawngbawlna huang zauh in a tih ngai loh kawng a zawh ve zel ni te pawh in a lang, a lawmawm hle.

Rawngbawlna kawngpui tharah: Tun hrilengah hian pawl ang te, mimal ang te in kan thiltih ṭhin kan tih theih tak loh a tam a, kan tih ngai loh kan tih pawh a tam viau awm e. Chung zinga thil lawmawm tak chu kohhran in khawtlang leh mipui ṭhatna tura tha a thawh tam hle hi a ni awm e.

Tun hma lam aṭangin kohhran hi inhungbing leh inkharkhip tak, sakhuana lam thil lo phei chu buaipui vak ngai lo angin ka hre ṭhin a. LC/VC emaw tlawmngai pawl huang chhunga ṭha an tih kha kohhran huang chhung aṭang ṭha ti thei miah lo kan ni ṭhin awm e. Mihring ngai reng, thil buaipui tur ngai si mahse pawl behchhan a zira danglam hi kan awm fo awm e.

He hri hian kohhran kalphung tam tak a rawn thlak danglam ta a. Thlarau lam nun chauh ni lovin, thawhlawm chauh buaipui lovin, a mi leh sa te, khaw­tlang leh sorkar tana thil ṭangkai a tih theih kawng hrang hrangah ke a pen ve mek chu a ni a. Hripui thawh hmasa zawkah kohhran hall te chu Community Qua­rantine Centre atan hawngin, a ṭhen chuan an hall a awm te an ei leh in tur nen lam an tum sak a. Tunah hripui thawh hnihnaah hian kohhran hall te chu Community Covid Care Centre atan an hawng leh ta sup sup mai a, a lawmawm tak zet zet a ni. Kohhran hian tum hma aṭangin a member harsa leh chhumchhiate hi ngaihsak ṭhin mah se, tun hripui len lai ang em ema kohhranin a mi leh sate a buaipui a, a ngaihsak hi a awm kher awm love. An mipuite ah chhuanchham an awm palh ang tih hlauin an luangchhuak a, an luang chhuak mek zel bawk.

Isua Krista ngaih­pawimawh em em rethei leh chanhaite ngaihsakin ke a pen chhuak hi a rau em em a ni. Rawngbawlna kawngpui thar a zawh tih loh rual a ni awm love.

Mipuiin kohhran kan hmuh dan : Mi tam tak chuan kohhran kan ngaihdan leh hmuhdan hi a inang lo hlawm khawp mai. A ṭhenin thlarau lam nun chauh buaipui turin an beisei a, a ṭhen in thlarau lam pawh buaipui lova, thawhlawm deuh chauh buaipui ang te hian an chhuah bawk a. Chutih laiin rawngbawltu ṭhenkhat hian kohhran chuan a mi te nunphung kawng tingreng hi a khawih theih tih changchawiin an duh duh sawi leh kawng tinrenga inrawlh ve thei ang deuh te in an sawi ve bawk a.

Nia, kohhran hi a huapzo em a, kohhran hian kawng hrang hrang hi a hawlkim theih lai hian, thil zawng zawng a inrawlh vek erawh a fuh ber kher lo thei. Thil engkim thlarau lam thil khawih vek anga sawi hi a fuh ber lova. Pathian mite tana buaipui leh kohhran in a tih awm tak hi a awm ve awm e.

Mi tam tak chuan koh­hrana Pathian ram kan thawhlawm te pawh hi kan hriat mang loh a luangral leh hman ral ni mai hian kan hria a. Heng ramthim a, kan hmelhriat loh Chanchin Ṭha hrilhna atan te leh Pastor hlawh vel atana an hmang ral ta ang hian an ngai tlat ṭhin. Kohhran hi a mi te tana thil ṭha ti tawk lo emaw, a mi te ngaihsak tawk lo a ngai pawh kan awm nual awm e.

Tun hma lam phei chuan Pastor nupui pawnfen manah mai mai tur ka thawh peih lo ti fiamthu tawk te pawh an awm. Chutiang ang a nih avang chuan kohhran thawhlawm hi mi harsa leh chhumchhiate pawhin an chan ve turah an dah ngai vak lo. An chan tawk pawh Masi vela thilpek an dawn bak hi an beisei ngam ngai lo a ni. Chutiang vel chu kohhran leh a rawngbawlna kan hriat chu a ni a, kan tan chuan min khawih leh min ngheng rawngbawlna ang hian kan hre thei vak lo chu a ni ber awm e.

Chutiang anga kohhran an hriat miau avang chuan mi tam tak tan chuan kohhran rawngbawlna hian a khawih che lova, an sawt puina sawi tur a vang viau a ni.

Pathian thu inbûk tawk kan mamawh: Mizoramah hian Pathian thu hi kan inhrilh nasa hle mai a, inkhawm tinah infuihna leh Pathian thu tha tak tak kan ngaithla reng a, mahse kan nun a khawih tak tak thei lo a ni ber e. Pathian lehkhabuin “Lehkha thu mai chuan a tihlum si ṭhin a” tih ang deuh khanin, thu mai a rawng kan bawlna a tawk ta lo emaw tih tur a ni. A taka kan chet chhuah hi a ṭul ta hle mai. Tun hnaia kohhranin mipuite kan ngaihsakna leh khawtlang tana kan pen chhuahna hian mi tam tak thinlungah chuan thu a sawi ngeiin a rinawm a. Thu a kan lo sawi tam tak an awih em em loh kha thiltih hian a awihtir ngeiin a rinawm a ni. Kan rawngbawlna thu leh a tak chet hi kan inbuk tawktir zel hi a ṭul khawpin a lang.

Kohhran hi pawl tia sawi hi ka haw viau a, Pathian ta, Pathian thawh pui kan ti a, pawl aia chungnung angte hial in kan sawi thin. Mahse, kohhran hian pawl aia kan chungnungna emaw kan daglamna kan tarlang tam lo hle mai a ni. Mipuite thlarau nun hrisel nei tur chuan tisa lama an nun hi a hrisel ve a ngai a ni tih hi kan hriat reng a ṭul awm e. Kohhran ang hian kawng tam takin mipui huap rawngbawlna chu an kalpui a, damdawi in leh thil danga rawngbawlna nasa takin an kalpui mek ngei a, mahse mipui nawlpui hi damdawiinah kan kal vek lova, thil danga rawng an bawlna hi kan hrethiam vak ṭhin lo fo, kan chhawrna lai pawh hi kan hrethiam tawk lo ṭhin a ni. Mipui hriatthiam tawk tura rawngbawlna kan kalpui a hun ta viau a ni. Hei hian thu hmanga kan rawngbawlna tam tak hi a rawn puiin kan rawngbawlna pawhin hma a sawn ngei beisei ila.

Kalphung thar ni thei se: Tun hripui hian kohhran anga kan tih ngai lem loh, tih tura kan ngaih lem loh kan ti ta zel mai hi a hlu hle mai. Hripui hian mipui rilruah kohhran kan hmuh dan, kan thlir dante tidanglam ngei se. Kohhran chu Pathian aiawh a leia awm a nih ang ngei hian thlarau lam nun kher lo khawtlang leh mipui ṭhatna tur hi ngaihtuahin tun aia nasa zawk hian kohhran hi a mipui tana a inhawn leh inpekna thuk zawk nei ngei se a duhawm hle mai. Mipuite'n hian an thawhlawm tling khawm hi an hriat loh chanchin ṭha hrilna leh Pastor te hlawhah mai ni lovin, kohhran mipuite hnen ngei a thleng ve thei a ni tih hi an hriat a, an hmuh hi a ṭul hle mai. Hri hian min kiansana nungphung pangaia rawng kan bawl leh hunah pawh a taka chet a, mipui rawngbawlna leh khawtlang tana ṭha tura nasa leh zuala thawkin kalphung thar, kalphung nghet angin nei thei ngei se a lawm hle ang.

Chutih rual erawh chuan Pathian rawng kan bawlna kawng hi kan hlamchhiah erawh a rem lo. Thute hi chu kan hrilh mawlh mawlh a ṭul a, bansan tur pawh a ni hek lo. Thusawi bansan a, ṭanpuina lam ngawt kan buaipui chuan kohhran hi Pathian thawhpuitu aiin ṭanpuitu pawl pakhat ang lekah min hria ang tihte pawh hlauhawm a ni. Chuvangin fing taka kohhran hrian rawngbawlna kawng hi a zawh a, Pathian thu leh a taka chetna lam hi a kalpui tawn thiam hi a ṭul ta tak zet zet a ni.

C. Lalengkima, Vaivakawn