Hripui hian kan tu leh fate hmakhua tichhe lul suh se (Kan lei do hripui hi a tlawm ṭep tawh a nia, kan hneh ngei dawn e)

He hripui hian kan tu leh fate hmakhua a tihchhiat hi i hlau ber mai teh ang u. Hripui (Covid 19) leng hian naupang hun hlimawm tak a chhuhsak nasa em em a, chuvangin kan tu leh fate hmakhua a chhiat vek loh nan kan tih theih zawng zawng kan tih a ngai ta.

Kan lei do hripui hi kan hneh ṭep tawh e, tho chhuak leh thei lo khawpa min sawp chauh hma hian ṭan hmun siam remin han tawlh rih mah ila, he hripui lakah hian kan tlawm tihna a ni lo e. Chawngbawla bawl theih loh hun kan thleng mek a nih hi, roreltute thu hi han awih phawt mai ila, he hripui hi kan hneh ang. Kan tho chhuak leh thei em em ang.

I tu leh fate bulah inkharkhip (Lockdown) i nin tawh thu sawi vak vak lo turin i insum thei deuh em? Harsatna kan tawh zozaite hi naupang hriat laia kan sawi kan sawi chuan kan tu leh faten rilru hah phah nan an lo hmang ve palh thei a nia. Chuvangin, hripui leng avanga kan dinhmun harsat tak thu leh a hrehawmzia thu hi kan tu leh fate hriata sawi sawi loh hi zir a ṭha e.

Inkharkhip i nin tawhzia thu i sawi vak vak khan i tu leh fate khan in in chhung kha zim ta sawt leh hrehawm ta sawtin an ngaih phah thei a, inkharkhip puangtute demna leh huatna rilru hrisel lo an neih phah thei. Chuvangin, kan tu leh fate bulah hian midangte demna thu sawi mai mai loh a va ṭha em.

Kan tu leh fate hian sikul an kal thei si lo, pawn lamah an infiam thei bawk si lo. Engmah sawi lo mahsela an rilru hi a chiai ve tih hi hriatthiampui an ngai. Vin vak vak loh tur a ni a, an nun chep tak hi hriatthiampui a ṭul e.

Puitling nih vangin TV remote control te hi hum run reng bik lo ila, naupangten zalen taka an duh hun huna an hman theih nan dah ila, an duh zawng enpuite zir ila, a ṭha e.

Puitling nih vanga englai pawha phone khawih bik rengte hi a ṭha lo, kan faten an khawih ve chak chuan khawih tir ve ṭhin ila, an bulah ṭhua lo titipui ṭhinte hi a ṭha.

Naupang na na na chuan pawnlama hawi chhuahte hi an chak ṭhin a, an hawi chhuah hleka, “Hri kai i hlau lo mi” tih khum chiam chiamte hi a ṭha lo, puitling paw’n kan hlauh chuan an hlau ve tho. A inven dan hrilh ngun zawk tur a ni.

Engmah beisei tur awm lo ang maia zing thawh hlim aṭanga awm tawp mai hi naupang tan a ṭha lo a, chuvangin hun bi hrang hrang siampui ṭhin a ṭha, chhun lamah tihtur a awm chuang lo tih vanga duh chen chen mut rikngawt hi kan vai atan a ṭha lo. Naupang tan a ṭha lo lehzual. Chuvangin, kan tu leh fate chu mut hun, zing thawh hun, chaw ei hun fel takin vawn sak ila, chaw ei khamah eng emaw tihpui ila, chawhhnu lamah pawh chutiang tho chuan zan lam thlengin an tihtur siamsak ila tihpui bawk ila. Tichuan, thilthar an ngaihtuah ve reng ang a, beiseina nung an rilruah kan siam sak thei dawn a ni. Puitling chu kan insum thei a, kan tu leh fate tan kan hun hi i pe hram hram ang u.

Kan tu leh fate hnenah hian chhungkuaa awmkhawm nawmziate hi sawi tam ila, inkharkhip puangtute hian mipui himna leh damna an ngaihtuah vang a ni tihte hi hrilh tam zawk ila, puitlingte pawhin kan hlawkpui zawk bawk ang.

Kan tu leh fate zirna hi ngaihvenpui a va ṭul em!
Hripui leng avangin sikul khar a ni a, a theih dan dan (Online) a zirna an kalpui mek hi i ngaihthah lovang u. Nu leh pate pawh zirtirtuah ṭan a ngai a nih chuan ṭan mai a ṭha, kan hah deuh a nih pawhin kan tu leh fate hmakhua kan siamna tur a ni a, hah hi i pawisa lo teh ang u. Kan tu leh fate tan alawm mawle kan tha leh zung zawng zawng hi kan sen ṭhin le. An zirtirtute hah ve dan pawh hi ngaihtuah tel a ṭha e, online a zirtirna inpek hi a harsa a, an homework endik leh hrilhfiahte hi class room a awlsam taka an tih mai ṭhin ang kha a theih loh a, hun tam tak an hman a ngai ve a nia.

Kum 1966 ah rambuai avangin sikul khar a lo ni tawh a, mi tumruh leh hrehawm tuar peihten harsa takin zirna an chhunzawm a, an hlawhtling. Mi ṭhenkhat, an tih danglam theih loh harsatna lo thleng avanga phunnawite chuan an tuar thung. A theih ang angin chawl lovin, beidawng lova phunnawi hek lovin kan tu leh fate zirna hi i chhunzawm tir hram hram ang aw. Hun ṭha a lo inher chhuak leh ṭep tawh e. Kan tu leh fate zirna kan thlahthlam sak chuan an kum leh an class a in mil lo lutuk palh ang a, kan vaiin kan tuar palh ang e.

Naupang thaza te hi an lo ninhlei deuh a nih pawhin hriatthiam a ṭha e, an taksa hian chet tam a mamawh ve nasa em a ni. An awm mai mai a, an ei rikngawt chuan an hriselnain a chhiat phah thei bawk si a, an chetna tur hi ngaihtuahpui zawk a ṭha e. Ṭhenawm khawvengte pawhin naupang ninhlei leh bengchheng deuhte hi tun ang hun ṭha loah hi chuan i in ngaidam tawn hram hram ang u. Kan lei do hripui hi kan hneh ṭep tawh e. I ṭangrual zel phawt ang u.

He hripui hian kan tu leh fate hmakhua hi a tihchhiat i phal lul lo ang u.

H.Lalrindika