MNF sorkar hian an tiṭha takzet a ni
Tun hnaiah social media han heu ila sorkar sawiselna leh MNF duh khawp lohna kil tinah a lang chuai chuai a, RTPCR tih te, pawisa awm lo tih te, ramdom test tihtawp tih te, MLA hektu tih te, sangha bomb tih te, mau ṭiak supply tih te, Lengpui Airport tih lam te pawh nasa taka sawi a ni. Heng thil hi chu sorkarna siamtute chuan an tawn fo a ni a, mipui hi chuan thil chhut peih tak tak si lovin kan sawisel ve phawng phawng mai ṭhin a ni.
Chik zawka thil kan chhut duh chuan Pu Zoramthanga kaihhruai MNF sorkar hian hripui karah Mizoram himna turin nasa takin hna an thawk a, Health Minister Dr R Lalthangliana pawhin theihna sang tak nen Mizoramah hripui do hna a thawk mek a ni. MLA dang leh Minister dang te pawhin an thawk ṭha tih te pawh hi sawi chhuah tam ve deuh a ngai a ni tunlai khawvelah hian.
Tun thleng hian kan chhut vang vang pawhin MNF sorkar hnuah eirawngbawlna gas ah harsatna lian kan tawk tawh em le? Buhfai supply kawngah harsatna a awm tawh em le? Hripui len hun khirh vang lai pawhin hmasawnna hi an kalpui reng thei a, Supply Minister chak tak Pu Rintea zarah buhfai kan nghei lova, gas kan hnianghnar zawk bawk a, buaina lian kan tawh loh chuan MNF sorkar hian a tiṭha hle a ni zawk lo maw?
A nih leh agriculturte lam hi kan thlir ve dawn em ni ang le? Minister Pu R Lalrinsanga hnuaiah hian kuthnathawktute hi an hlim em em niin news lamah hian kan lo hmu ve ṭhin a, hna a thawk nasa hle tih kan hmu a ni.
Mizoram hian agricultute lamah theihna sang tak a neih pawh hi he MNF sorkarna hun lai ngei hian a takin kan hmu chho mawlh mawlh zawk daih asin. Tin, mau chungchang hi sawi ve leh ta ila, mau hi kan la ching ṭan dawn chauh a ni a, tunge a tirah hlawkna tel nghal ngei? Mau hi kan ching chho ang a, nakinah chuan kan Chief Minister sawi angin mau hmang ṭangkai hian kan la intodelh mai dawn alawm.
Mi ṭhenkhat chuan, "Mau hi Pu Zoramthanga chiahin a sawi a, tumahin an sawi pui ve duh lova, a hlawhtlin an rin loh vangin Minister dang hi an ngawi ṭhap," an han ti ringawt a, mahni chan loh department dang hnathawh tuin nge sawi pui ve ngai?
Sports Minister tan Health department lam va sawi ve a remchang lova, chutiang chiah chuan UD&PA Minister tan mau va sawi ngawt kha a rem lo ve bawk a, chuvagin ṭan rual loh vang lam a ni lova ni.
Mizoramin hun khirh ber a tawn laia MNF sorkar hnathawh thlir hian sawiselna tam tak karah hian 'a tiṭha takzet' tih hi khaikhawm dan tur dik ber chu a ni e.
Lalhmingmawia