KOHHRAN HRUAITUTE KAN THLIRNA

Kohhran hi a zahawm a, a dinhmun hi a ropui bawk a ni. Lal Isua ngeiin, "He lungpui chungah hian ka Kohhranho ka rem chho ang a," tia a sawi kha duhtawk mai loin, "Mitthi khaw kulh kawngkharte chuan chu chu an ngam lo ang," tiin a sawi chhunzawm leh a. Hemi avang ngawt pawh hian Kohhran hi sawihnawm theih rual a ni lo a, a dinhmun hi sang tak a ni tih kan hriat fo a pawimawh hle awm e. Nimahsela chu Kohhran chu tuna kan Kohhran hrang hrangte hi kan ni vek ang nge ni vek lo ang tih erawh chu keini hriat phak a ni chiah si lo a, nikin nia la hriat zawk turah ngai ila a ṭha mai awm e.

Amaherawhchu, Kohhran chu zahawmin ropui hle mah se la, a chhunga rawngbawltute avang zawkin sawihnawm a nih phah thei a, kohhran rawngbawltute thiltih avang chuan kohhran zahawm tak pawh chu a hmel a lo balh phah thei hial bawk ngei ang. Hmun dang sawi loin kan ram chhung chin aṭang chauh sawi ta ila, kan kohhran rawngbawltu ṭhenkhatte hi chu an zahawmin an ṭawngkam chhuakte reng reng hi chia al, khawngaihna tel hi a ni hliah hliah bik a, chutih laiin ṭhenkhat rawngbawltute thung chu vanram pawh an kai kher dawn em ni aw tihtur an ni hial awm e. Sorkar ngei pawhin tunhma lam, hun rei tak aṭang tawh khan kohhran hi chanvo pawimawh tak tak a lo chantir ṭhin tawhin dinhmun sang takah a lo hlang kai tawh ṭhin a, vawiin thleng pawhin a la ni thei bawk ang. Rambuai laiah ngat phei kha chuan kohhran hruaitute kha an fakawm thlawt a ni. An hnathawh kha a ropui a, anni vanga vawiin hun thleng hi kan ni ti ila a sual kher lo ang.

Vawiin thleng hian kohhran hruaitute hnathawh hi hriat tur a la awm reng a, Zoram mipuite tan nasa takin hna an la thawk reng a ni. Chutih mek lai chuan an kawng ni lo an zawh dawn dawntein a hriat a, tun hnai te maia Lockdown pawh sei chungchangah kha chuan an tih loh tur an ti emni aw a tih theih a. Medical Operation Team (MOT) berin thlahdul hret ni se an tih laiin Mizoram Kohhran Hruaitute Committee (MKHC) lam hian pawhsei leh ni se tiin thu an thlen a, chu chu sorkarin a lo pawm zawk ni awm takin Lockdown chu kan han pawtsei leh a ni a. Hei vang hian MKHC lam hi sawiselna an tam phah hle mai a, an kuang lo nawr ang hialtea sawi an awm a ni. MOT thu hi sorkar lam pawhin ngaipawimawh zawk ni tura ngaih a nih viau rual laiin hetia MKHC thu ngaipawimawh zawk anga thu a han ni ta hian phunnawina pawh a tih tam phah viau reng a ni.

Kohhran hruaitute hi an zahawm a, an mawhphurhna pawh a sân mai bakah mipuite ngei pawhin an thu leh hla hi kan dah pawimawh viau bawk ṭhin a ni. Sorkar inrelbawlnaah ngei pawh an thu leh hla hi ngaihchan a ni fo tawh ṭhinin vawiin thleng pawhin kan la ngaichangin thu chhia thu ṭha vai hunah ngat phei chuan kan au chamchi a ni zawk a. Hetiang taka an dinhmun a pawimawh avang hian sakhuana kawngah lo chauh pawh mipui tan an ṭangkai em em a, vawi tam tak ban an lo phar tawh bawk a, sorkar leh NGO inkarah te ngei pawh ban lo phar fo tawhin thu rem a ngaih hunah pawh thu remna an lo nei fo tawh ṭhin a ni.

Tuna Lockdown pawhsei chungchanga sorkarin MKHC thu leh hla a ngaipawimawh zawk anga ngaih ang chiah hian dan ngaipawimawh vang tia MLA 12 te’n Pu Lalduhoma an hekna chungchanga mi tam takin Pu Zoramthanga Vrs Pu Lalduhoma anga an lo ngaih phahnaah khan MKHC lam hian thu leh hla an nei lo ni awm tak a ni. Mi ṭhenkhatin Lockdown chungchanga an kuang lo nawr ang hiala MKHC an ngaih lai hian eng vangin nge Pu Lalduhoma disqualify chungchangah ngei pawh khan thu leh hla an neih loh tiin zawhna an zawt awl lo a, a ni bawk tak reng a, Congress sorkar laia ETHICS in Pu Hawla chal hnawihsen chungchang an lo hre lo hrim hrim ang deuh kha a ni mai awm mang e ti pawlte an awm bawk a. Engpawhnisela, thil kal tawh a ni a, tuna han sawi thar leh pawh a tul kher awm chuang lo e.

Sakhaw hruaitute hi khawvel hian a zahin a dah sang em em a, khawvel sorkar zawng zawngte ngei pawhin lungrual taka hnathawktu pathum an pawm theihah pawh telin an dang pahnihte chu Doctor leh Nurse te an ni a. Hei vang hian an hnathawh hi sawi nep theih a ni ngai lo ang a, an ropuina leh zahawmna hi sawi hnàwmsak theih a ni bawk ngai hek lo ang. Chutih lai erawh chuan an zahawmna tihmelhem palh thei lakah erawh an inven fimkhur a ngai viau dawnin a hriat a, Politician verther tak anga tute emaw laka tlaktlum tum ang hrima thil ti ṭhin mi leh akawi angila sorkar thuzawm tura ngaih sorkar hnathawkte ang maia ngaih palh tur ang an awm a, thu leh hla an neih pawh a rem lo ang. Hei vang hian tuna sorkarin Lockdown a pawhsei chungchangah ngei pawh Medical Operation Team (MOT) te aia an thu ngai pawimawh zawk anga tinzawn theih hial tura thu lo awmah ngei pawh hian anmahni demna thu tam tak awmte hi ngaihtuahna fim zawk an neihna tura hmanrua atan hmang thei se la a duhawm hle a ni. Chuti a nih loh chuan a taka thawktu MOT te hian kut an sil a, an inthiarfihlim hlauh chuan buaithlak deuh tur a ni a. Chutiang bawk chuan sorkar lam pawhin rorelna thutthlenga thute leh a hahdam chin (ti mai ila)a thute thu leh hla chu a field-a thawktute thu aia a ngaih pawimawh zawk fo pawh chu thil dik ber a ni kher lo thei bawk a ni.

Mahmuaka Chhakchhuak