"Covid-19 do nan pawisa limit a awm lo"
Sawitu : CM Mizoram
Sawina hmun: Kolasib
2020 kum tir kha chu kan CM zahawm tak pawhin Bairabi-ah Covid plus Monsoon Emergency puang hial a nih kha. Kum tir lam bawk khan Kolasib a rawn khan Covid-19 chungchanga sawrkar hmalak tumna kan lo zawt leh a, 'Covid-19 do nan pawisa limit a awm lo' tiin min chhang a ni. CM zahawm thusawi hi a darh nasa a, hetiang thu aia thlamuanthlak sawi hi khawvel ram hruaitu zingah an awm ve lo a ni.
Mizoram CM, Finance Minister ni bawkin hetiang thu a sawi takah chuan chet lakna pawh a hraw ta hraih mai. Quarantine Centre a awm te chaw free pek an ni a (Heihi DM&R) CCC a awm te a thlawn a enkawl an ni bawk. QC leh CCC a awm te hi man chawi loa lirtheia phurhkhawm an ni a, Mizoram sawrkar pawhin fak a hlawh hle mai. Amaherawhchu, pawisa limit awm lohna state-ah sawrkar-in chaw man leh lirthei a hman man te hi pek tur a nei ta lo or a pe duh ta lo.
Covid-19 kan hlauh em em laia Health Department-in mimal lirthei Positive te phurh nana nikum June thla aṭanga kumin February thla thlenga a hman te chu, tunhnai thleng khan an bill pek an la ni lo. An kum khat petrol/ desiel hman ringawt pawh hi tih tham ve fe ang.
Opposition Party kan neih ve te lah hian an thlavang zuk hauh tak tak ngam der lo a! Kan opposition Party te hian thu puarpawleng deuh lo chu an buaipui peih vak lo niin a hriat rum rum a ni.
Mizoram CM-in 'Covid-19 do nan pawisa limit a awm lo, mamawh awm apiang kan ti zel ang' a tihlai a, Health Department-in Truenat khawl man tur pawh an nei lo hi a mak! Nikum lamah CMRF sum hmanga lei a ni tawh a, 2021 ah MLA fund hmangin Kolasib a mi tur lei a ni a, tunhnaiah Lunglei a mi tur Truenat khawl pahnih MLA fund hmang bawkin lei a ni. MLA ten an fund hmanga Ambulance an lei te hi hmun khatah dahkhawm i la, a park nan PAHOSS lian deuh kan mamawh ngei ang.
CMRF leh MLA te fund hmanga lei sa a hman tur Beta Covid (Test kit) te chu kan nei leh ta mang lo. Test kit man tal te hi chu Health Department hian pawisa limit a awm loh thu sawitu, kan CM hnenah hian dilchhuak ve se a va duhawm ve maw le.
A tir te aṭang khan Chief Minister hi chuan Covid-19 hi mipui thawhkhawm hmanga do tum niin a thusawi aṭangin a lang lo. Amaherawhchu, Health Department-in RAgT an lakna pawisa pawh hi an ba leh ṭeuh tawhin a rinawm. Health Department hian CCC a positive awm te chaw man hi mi 5 lakh lek lek te bat a la nei a ni.
Covid-19 do nan hian Mizoram sawrkar hian hma a la nasa tih chu phat rual a ni lo. Hetihlai rual hian kan Health Minister hmingṭha tak hi a baa hmingṭha mai a nih loh nan ba rulh lamah ṭan a lak a ngai hle mai.
ZPM Tlau