RT-PCR AIAH MORTUARY; CHHIM BIAL MIPUI HMUSIT

State Bank of India (SBI) chuan vantlang hnathawhna atana ruat, Corporate Social Responsibility (CSR) hnuaiah Civil Hospital, Lunglei (CHL) tan chéng nuai 100 pek a tum a. SBI chuan CHL thuam ṭhatna atan an pawisa hmanna tùr (estimate) thehlut tùra Health Department a ngenna chu, June 3, 2021 khan Dr. T. Lalhmangaihi, Director, H&ME hmingin, memo.No.B.18012/2/2020-DHME(PP)/Covid-Vol-II chu SBI Regional Manager, Mizoram, Aizawl hnenah thehluh a ni a. A subject-ah pawh "Improvement of Civil Hospital, Lunglei for preparedness of Covid-19 pandemic - prayer to allocate fund thereof," tih a ni. Chhim lam mipui tán SBI luanchhuahna hi lawmna tùr thil hlu tak a va ni ém!

Lawmna kara thim thuahhnih chu-

Dr. T. Lalhmangaihi, Director, H&ME tarlan danin, Covid-19 hripui avanga Civil Hospital, Lunglei tana SBI sum pek an hmanna tùr nia lang chu-

1) Construction of Mortuary building (Mitthi dah lailáwkna In) niin, chéng nuai 48.89 ruahman a ni.

2) Construction of Oxygen Gene­rating Plant (Oxygen siamna hmun) niin, chéng nuai 19.12 ruahman a ni.

3) Purchase of Cold Storage (Ruang dahṭhatna), fire fighting and furniture niin, chéng nuai 31.99 ruahman a ni.

Chhim bial mipuiin theihtawpa an áupui, Covid-19 hri kài leh kài loh endikna RT-PCR khawl dah tumna pakhatmah a la lang lo a. He pawisa hmang hian CHL a room ruak pathum an sawi fo ṭhin kha Laboratory tùra cheibawl theih a ni ngei ang tih a rin theih a. Mahse, Mizoram sorkar hian Lunglei (chhim lam) a hawi rualin, an mamawh hmasa ber tih sak lam a la hawi rih tlat lo. An tan chuan 'Lâwmna karah thim thuahhnih' a ni hawt mai.

Hri kái endikna (RT-PCR) khawl nge pawimawh, hri kai avanga nunna chánte dahna (mortuary)?

Duhthusamah chuan heti ang building ṭha tak hi Civil Hospital, Lunglei tan a ruala neih ngei a chakawmin a rinawm. Neih dawn rau rauah hri kái endikna neih hmasak hi a pawimawh zawkin a lang.

Covid-19 hri kái hriat hma a, hmá taka enkawl dam an nih zel chuan vanduai avanga nunna chán awm lovin, mitthi ruàng dah lailáwkna In (mortuary) hi chu mamawh a ni dawn lo phawt a ni. Chumi awmzia chu, mitthi dah lailáwkna in aiin, Covid-19 hri endikna khawl hi tun pandemic-ah hi chuan chhim lam tan chauh pawh ni lovin, Mizoram tán a pawimawh fé zawk tihna a ni.

A tlángkawmna-

Mizoram sorkar hian hripui hi an ban phak tawkin an do a, theihtawp an chhuah a ni tih hi mipuiin hriatpui ila, rorèl an thiam theihna atan leh sorkar ṭha an siam a, Covid-19 dona kawngah tih chak an nih zel theihna atan ṭawngṭaipui zel ang u.

Tin, sorkarin ngaih pawimawh hmasak tùr zawk a thliar thiam zel theihna atan te, rilru chhungrila khákna awm loa ram rawng an bawl zel theihna atan theihtawpa ṭawngṭaipui hi mipui mawhphurhna a ni a, kan ram hruaitute tán ṭawngṭai ang u.

David Zochhuanmawia (Vida Hrahsel Saza)