Lockdown ṭha chi – SOP HI RETHEITE LAM HAWIA HER REM THEIH SE!

Mizoram mipui, a bikin Aizawl khaw­pui chhunga nitin eichawp zawng leh inhlawhfate tan, a thla tel total lock­down hman chu a manganthlak ta tak meuh a ni a. Kan SOP hman mek hi chu thla tin hlawh neite tan chuan sawisel tur a awm vak lo a ni thei. (SOP duangtute hi thla tin hlawh nei deuh vek an ni mahna!)

Mahse nitin inhlawh ṭhin te, dawr­kai leh mi dawr nghaka eizawng te, motor (Taxi, etc.) hmanga eizawng te, chawhmeh zuar te, huan siamtute tan chuan a buaithlak double thei, SOP siam leh hman nihna a awm nual a.

Chuvangin, lock­down hi chhunzawm a nih dawn chuan thlatin hlawh neia eizawng lo leh rethei zawkte tana khawsak phung ziaawm zawk tura SOP ṭha chi siam ni thei se – Entirna point thlem :

1. Dawr hawn hunte hi tih tam/ tih sei ni se. Task Force/LLTF/ VLTF te hian an huam chhunga dawr­kaite erawh SOP zawm ṭha tura vil reng dan erawh awm thei se.

2. Nitin inhlawhfaa eizawngte chu, an awmna veng leh an thawhna veng LLTF ten a dik tak (genuine) te chu hnathawh phalna pe mai ṭhin se, SOP erawh vawng ṭha ngei turin order pe se.

3. Huan/ Loa feh turte tana 8am hma leh 5pm hnu hun pek hi tih danglam ngei tur a ni. ‘Lal pawh thlawhhma ring mi bawk a ni’ tiin Bible (Thuhriltu 5:9) ah kan hmu. Khawpui chhung kawngpui hi office kaite tan chauha siam a ni lo; traffic jam hlauh deuh chuan 9am – 10am leh 4pm – 5pm chhung hian feh turten Aizawl kawngpui paltlang loh hram tum nise tih a tawk em em a ni.

4. Loan laa motor leh dawrkai hmanga eizawngtute chu Lockdown hman hun chhunga an loan rulh ṭulte ngaihdam dan emaw siam sak a, sawrkarin loan rulhpui dan emaw siam ni thei se.

Van Pathian hi ‘mi retheite lam tang ṭhin Pathian’ a nih avangin mi retheite lam hawia SOP hi siam rem dan awm se a ṭha hle lo maw?

Isaia’n ‘A chhe lai siamṭhatu, mi awm­na tura kawngte siam­ṭhatu’ a tih kha kan mamawh hle a ni lawm ni?

H. Lalhmachhuana Zobawm In