MKHC leh NGO hruatute u...

MKHC leh NGO hruatute u, expert pawh in nih loh avangin sawrkarin a rawn leh che u a nih chuan lo hnar tawh em em teh u! Pawngpaw lockdown bak hmalak ngaihna an hriat loh avangin mi sawisel leh duh­khawplohna lak aṭanga inphen nan sawrkar hian a hmang mai mai che u a ni.

Hei chen hi kan in lockdown tawh a, engnge kan thlen tak hi le? Sawrkar hi pressure te in pe ve em? Nge sawrkar aṭang hian in support na avang hian mi hriatpui lem lohin hlawkna in lo hmu reng zawk em ni?

Mizoramah rei tak total lockdown a ni tawh a, a tuartute tuar natzia hi in hmuhpui pha ve em? Mi ṭhenkhat chuan an eizawnna neih ve chhun te tawpsan hial khawpin an tuar a, ṭhenkhat lah in luahman pek thei loh vanga hnawhchhuah a vai tawkte an awm hial asin? Chungte chhawmdawlna tal chu sawrkar hnenah in dil pui em?

Sawrkar hian mipui pek khawm ni lo, central in mipuite min pek budget sum hmanga mipui lockdown nasa taka tuartute khai chhuak tura hma la turten in nawr ve em?

Duhtawk chin te nei ve teh u, ṭhenkhat lakah ruah in sur tir laiin ṭhenkhat lakah ni in sat tir mek asin. Lockdown hmanga i hrek retheihte rilru in ti na hnem tawh hle a, a thawi dam hna te hi engtin nge in thawh dawn tak le?

He hri laka kan him theih dan tur te, nitin a kai thar tihhniam a nih theih dan tur a ruahmanna siam thiam Mizoramah an awm lo a nih paw'n vai ram lamah a ngaihna hre deuh, hetiang lam zir an awm ngei ang. Chungho chu nangni aia rawn zawk turin sawrkar hi nawr ve tawh teh u.

Tuna lockdown kan kalpui ang rawt tur hi chuan mithiam nih a ngai hran lo. Chuvangin, aw lo neih ve tlat chakna te dah bovin, mithiam zawk te, a nachang hre zawkte rawn zawk tura sorkar nawrtuah lo ṭang hram tawh ang che u. Kan tuar na sa mah mah ta te.

Lal Remruata