Raju-a dan ber Mizo leh Mizoram kan ni
Nikum kum tawpah khan hun rei tak chhung Mizoram chhunga lut tur lirthei chu Assam ramriah dan a ni a, Mizo mipuite kan buai a, kan sorkar hotu liante pawh an meeting sup sup kha. Lalapur-a Vaipa Raju-a'n motor dan a tihtawp rualin kan buaina a reh fel nghal mai khan kan ramri buaina kan tih kha Lailapur in min dan vang mai mai tih a lang. He buaina hi enchian loh chuan kan buai nawn leh dawn a ni.
Mizoram leh Assam intibuai angin kan lan tir a, kan MLA leh Minister te pawh Vairengte panin an kal sup sup a, party pakhat phei chu party flag nen advantage lak tumin Vairengte lamah an zuk kal a nih kha.
Kan sorkar Minister leh MLA ṭhenkhat chu kan IR sipaite bulah zuk kalin an zuk fuih a, an bulah thla te an zuk la a, Assam leh Mizoram kan in kap tawh dawn emaw tih turin social media lamah a lo lang chuai chuai a. Hnam party nia inchhal MNF sorkar lai a nih avanga ramri ngaihsak thu kha MNF lamin Facebook leh Whatsapp lamah an theh darh nasa bawk.
Chu buaina chu Assam leh Mizoram buaina awzawng a lo ni lo; Assam rama inthlang tur boruak siamna chi khat mai mai a lo ni. Mizoram sorkar pawhin Assam lama BJP sorkar hruaitute zuk be lem lovin Cachar leh Karimganj DC level mai mai meeting an neih pui a, central sorkar a inrawlh hnu khan Home Secretary te an indawr a mahse ramri chinfel reng reng an sawi lo. Motor an dan chu kal tlang tir turin a inrawn khawm mai mai a lo nia a, chu motor an danna chu Silchar ah pawh ni lovin Mizoram luh dawn ṭepa Lailapur bulah hian a lo ni lek a ni.
Assam in min dang lova, Cachar District dan pawh kan ni lo; Silchar mipui lungawi lovin min dang pawh chu la ni ta lovin Lailapur-a Raju-a pawlten kan motor lut tur an lo dang mai mai niin motor an luh tir rualin kan Minister leh MLA ten IR sipaite silai thla an lak puite pawh mu khat mah kah ngai lovin a fel ta duak a. Mizoram chu Raju-a tih buai tham chauh kan lo ni tih a chianna chu tun thleng hian kan sorkar hruaitute hian ramri hi an la sawi miah lo.
Kan ramri kan tih khutah, Bhaga bula mi khu humhalh tumna an neih ka la hre lo.
Lamuanzova (MZ-a)