VACCINE BER MAI HI...

“Bo se, bo se tih takah chuan,
Sakei bo se, ral bo se,
Hrî nen pathum”

Kan pi leh pute pawh khan duh thu an lo sam ve ṭhin ngei a. Khatih laia an tana hnawksak êm êm – Sakei, râl leh hrîte kha bo se an ti ve ngawih ngawih a ni. Heng thil pathumte hian an thaw a tipik a, an nun a tichep em em a ni. Tunah chuan sakei leh râl hlauh tur a kiang a, hrî erawh hmanlai ang thovin kan la tuar zel zawng a nih hi.

Hripui lakah fihlim tumin hei chen kan bei tawh a, thawktu leh ngaihtuahtute lu pawh a hai rei ta tak zet. Mipui ni se loh theih lohna avângin kan inkharkhip a, sawrkhar total lockdown bakah kan rilru leh ngaihtuahna zawng zawngte pawh hi a in-lockdown ta hrim hrim mai a nih hi. Quarantine, lockdown, containment tihte pawh hi a pawl hniam ber pawhin eng tihna nge tih kan hai tawh lo.

Covid hripui len tirh khan kan inhma­khua ṭhat em avângin a tawrh pawh kan tuar nêp a; hripui kai hrim hrim thu hlaah chuan inchhuang tur pawh kan awm a nih kha. Chhim thlipui ang maia tawrhhlelhawm leh min suat puk puk tura kan ngaih avângin mipui pawh kan thlabar a, kan fimkhur a, thu kan awih a, him khat chuan kan him a nih kha.

Mahse, a thawh hnihna a lo lan meuh chuan se kawng kan khar hman ta lo ni berin a lang. State dang aṭanga lo haw RAgT test negative thlap, in an thlen hnua positive tih hmuh chhuah leh tak si kha kan awm nual a. Kâr khat vel lai hnuah test negative pawh ni se tiin kan han in-quarantine leh na a, khawi khawiah emaw hlet a lo chhuah hman tawh si a, kan heti ta a nih ber mai hi.

Kâr tam total lockdown hnuah pawh result duhawm kan hmu hlei thei ta lo. Aizawl khawpuiah chuan “Ni tin mi an thleng, thla tin an tam kum tin an pung zel” tih hla ang mai khan kan pung deuh deuh zel zawng a nih hi. Heti khawpa total lockdown rei tawh si hi engah nge result ṭha kan neih theih loh tih hi a ngaihtuah thiam apiang, a fing apiangte lu tihaitu a ni ta zawk.

Pawn chhuah tlem, mask vuah ṭhat, kut sil ngun hi kan hmanraw hman thiam a ni tawh chungin kan pung zel a. Mipui punkhawmna thil rêng rêng pawh khap tak tein kan khap na a, eng kan ang thei ta chuang lo a nih hi. Kan in-lockdown reng chuan ei barah harsatna namen lo zawk kan hmachhawn dawn tih a lan avângin thuneitu lamin hri kai pung zel chungin inphelh dul deuh turin ruahmanna an siam ta a, engtin awm zel i maw le.

Khawvel thiamna leh finna san tawhzia ngaihtuah chuan khawvel pum tibuai khawp hripui pawh ni se kar lovah a damdawi hmuh chhuah awm tak a ni a. Mahse, tun thlenga mi thiamte tih theih tawk chu a la tlem hle mai a, vaccine 100% veng thei tur hmuh chhuah a la ni lo. Hetih laiin Covid chi thar, a hma aia inkai awl chi a lo chhuak zel bawk nen, mi thiam zawkte tan pawh a ngaihna tak a awm hmel bik lo a nih hi.

Mi thiamte hian a damdawi chiah hmu chhuak rih lo mah se a thawh dan leh nghawng dan tur erawh an sawi dik ṭhin lawi a. Hri kan tawrh nasat vanglai tur te an sawi dik ṭhin a, ‘a thawh thumna’ tur phei hi chu huphurhawm tak a ni ta. Naupang lamin an tuar deuh tur niin an sawi a, vaccine lah kum 18 chung lam pawh kan la inpe zo thei si lo!

Kan thiam leh phak tawkah tha thlah lovin hripui hi do zel phawt ila, chutih rualin Covid hripui hlauh vângin kan inhrek dang châr mai thei tih pawh kan hriat tel a ṭha. Khaw danga zin chu sawi loh mahni in chhuahsan thlenga kan inkhap chunga eng kan an theih tak si lohah chuan hmalak dan ngaihtuah belh a ngai ta.

Covid hi thlabar lovin hmachhawn law law ila, ṭampui kan tawrh mai loh nan ei bar hmuhna leh hmasawnna hnate hi mask, kut sil, social distancing ngai pawimawh chungin kalpui ila, vaccine hi lak kim thuai i tum bawk teh ang u.

R.Lalfakawma, Seling