KAN MAMAWH COLLEGE ADMISION FEL FAI

MBSE hnuaia Pawl 12 result a chhuak a, college admission tih a hun leh ta reng mai. Mizoram college admission hi tun hma lam chuan pawl 12 a ti tha leh ti tha lo inthliarlem lovin, mahni luh duhna leh remchanna laiah an lut mai thin a. Thingtlang lam bawh deuh bik te, nitina inhlawh duhin an bawh deuh bik te, Science la in an bawh deuh bik te chu a awm na in, a college a zir khan a ti tha leh ti tha lo kha an thliar lutuk lo emaw tih theih a ni. Tun hnai chho hian zirlai ten college luh duhna deuh bik an nei tan ta a, admission pawh an pawl 12 result zir in an siam ta a, vai ram college angin pawl 12 a percentage tha deuh ten college an duhzawng an thlang ve tan ta a ni ber e. Kan college admission tih dan pawh hi uluk zawka kan kal pui a ngai hle in a lang.

Admision-ah thiam dingchang thei se : Tun hnaiah hian Mizorama kan college ah hian kum dang aiin lut tur an tam in, a admission tih vel pawh a buaithlak in a khirh ve telh telh ta mai a. Naupang pass chhuak an tam in, an pass tha chho ve ta zel bawk a, inelna a na in admission tih pawh uluk a tul telh telh a ni. Tuna kan college admission tih dan en hian a tlangpui chuan a thiam thiam din channa, a ruh no no chhuakah tih ang deuh in an kal pui ve ta a. Hei hian zirlaite ah inthliarna a siam rualin zirlai te college tha zawk chang tura nawr kal tu a ni thei a, a thatna lai tak te pawh a awm in a lang.

Naupang ten college tha leh changtlunga luh an chak in chu mi tur chuan theih tawk an chhuah a, percentage mil in admission tih a nih chuan an percentage mil a college an hmuh hi an lungawi pui viau mai a. Mahse, hetih karah hian hmelhriat leh chhungte quota, Minister leh directorate quota tih vel thawm hi a la awm fo thin a ni awm a, a zia lo hle mai. Zirlai an aia thiam lo leh mark hmu tlem zawk ten an college chan loh an chan khalh leh si hian a fuh ta thin lo a ni. Chuvangin admission tihdanah hian fel fai taka kal pui a, tehna mumal tak hmanga kan teh a, khauh taka kan kal pui hi a hun ta hle mai.

Tun hma lam kha chuan college admission hi thil buaipui awm tak a ni lem lova. College a thawkte hmelhriat leh sorkar hnathawk hmelhriat kha an in thun mai a, mahse tunah chuan naupang ten college luhduhna bik kher nei in luhna tur an dap tawh avang hian hian chutianga kal pui chu a rem ta lo a ni. Technical line lam zir tur chuan in thei sem emaw in sawi pui mai chi a nih loh avangin exam a ti tha an lut a, hmelhriat insawi pui vak lam an sawi ngai lem lo. Chutiang chiah chuan college admission pawh hi kan in chuh ve ta viau mai a, college tha deuh a luh chu a hlu in an chak vek mai a, uluk a tul taka kal puia hun ve ta hle mai. A ti tha te aia hmelhriat leh insawipui a kan in admit tir zel chuan kan zirna in a tuar ang a, naupang tha tak tak kan ti beidawng dawn a ni, chuvangin, zirlai pawl lam pawhin uluk taka admission felfai nei tura an tha an thawh te pawh hi a tul ta a ni.

Admission tihdan mumal zawk kan mamawh: Tin, tuna kan college admission tih dan hi tlema kan her rem deuh a tul hle in a lang bawk. College te hian an mahni in admission tih hun hawngin an kalpui a. Naupang ten admission hmun hnih hmun thumah an kam a. College lam in admission ti tur list an chhuah hun a in rual lo ta zung a. A thenah admission tih hma a lo ngai a, an duh tak ni chiah lo pawh seat an chan loh hlau in admission fee an lo pe fel a. A hnu ah an college duh tak list a lo chhuah leh a, seat an lo chang leh si a, admission an tihna hmasa a mi lamah refund system an nei lova, an luhna tur taka admission fee nen chawi double ngai te a awm thin a ni. College in list chhuah huna in ang lo zung bawk nen zirlai tam takin an sum chan thlawn in seat chan loh hlauh reng rengin naupang rilru buai takin an dah thei bawk a ni. Admission hmasa zawk cancel ta lo chu seat ruak a awm tih college in an hre lo bawk a, lut tur beisei aia tlem an lut a, seat ruak ta kha a uiawm ta em em bawk a ni.

College admission hi University thenkhata Under-Graduate admission an tih angin a tih ni bik neiin kal pui ta ila a ziaawm ngei in a rinawm a ni. Sorkar emaw University emaw hian admission tih hun heng form fill up hun bik atanga a first list, in hnuhdawh hun leh second list, third list thlengin mumal takin kal pui ve se la, college lam pawh in duh leh percentage base in list siam ve ta mai se, zirlai lam hian an sawt pui in buaina tam tak an pumpelh thei awm e. Tin, hetiang lo pawh hian college tina seat awm zat lak khawm a, hmun khat atanga percentage base a, naupang in college an thlan dan mil a seat sem sawm pawh hi hmun thenkhat chuan an kal pui ve bawk. A eng pawh nise, admission tihdan mumal leh rualkhai zawk kan mamwh ta a ni. Tin, college hian admission hi percentage ngawt lo hian heng infiammi te, mi bik te leh thingtlang lam mite tan te thleng hian awmze nei in seat hausak vek ta bawk se la. Heng district kilkhawr leh hmun kilkhawr a sikul atanga pass chhuah te pawh hi seat hauhsak na chang kan hriat a tul ta hle mai. Admission tih dan mumal tak hi kan nei thuai zawng a ngai ngei mai.

Kan sawt pui pawh beisei ila: He admission inchuhna hian kawng tam takah chuan college leh zirlai te tan inelna tha zawk a thlen ngei a beisei awm a ni. Tun hma lama kan enghelh vak lo thil kha buaipui fe tham a ni ta a. Tun lai khawvelah chuan thil hming ngawt hian awmzia a neih tak em avang hian college hming ringawt buaipuia admission zawng hi kan pung zel dawn a nih hmel. Chu college hming tha leh mi bawh ni tur chuan college pawh a insingsak ve ngei chu a ngai awm e. Tun laiah college luhna a that leh that loh a zirin kan hma lam kawng thui takin a in hril ve ta reng mai a, chutih laia thiam mang lo, tling mang lo te hmelhriat quota vela lo thun tum hi a fuh ta lem lo. Mizoram college hi a tlangpui in a in ang pet pet a, tlema hlun deuh leh upa deuh chu awm bawk mahse la a tam zawk hi chu an in ang viau mai a. Han trang deuh se tumah hi hnufual leh sitawm an awm hran lo. Tu college tan pawh hian mi dang el huphurhawm lo tak vek a ni bawk a. Hetianga naupangin admission duh an thlan hian inthliarna zawnga siam ngei ang a, mahse college lam pawh in an tan phah ngei in a rinawm a ni. College tha zawk kan neihna tura min buatsaihtu a nih ngei a beisei ila.

Naupang tan pawh college hmingin awmzia a neih meuh chuan college thlang tur in an zir lai atangin an tang nasa zawk ngei beisei ila. Zirlai ten college tha zawk lut tura an tan miau chuan thiamna tha zawk chu an pawchhuak ngei in a rinawm a ni. Tun lai khawvelah chuan zirna tih hian class a va thut, zirtirtu te zirtirna piah lam ah hian zir tur hi a tam tawh em em a. Heng class room pawn lam thil hi thil pawimawh leh tangkai tak a nih avang hian zirlai tam tak chuan chutiang tha awmna, mi in an college hming an zawh pawh a zah pui loh tur, zam hauh lova an chhan theihna a luh hi an chak a ni. Chutiang tur chuan a zir pawh an zir ve thin reng a ni.

Chutiang kara khawimaw lai hmelhriat lo sawipui a, Block President chhungte tih vel, Unit President hmelhriat te pawh an ni mahna, Minister quota a lo lut an awm leh thin te, Director hmelhriat te, an thenawm leh veng te thleng pawh an ni mahna, chung te chuan admission an hmu leh si thin a nih chuan a zia lo hle dawn a ni. A thiam chuan college duh hi thing sela, college lam pawh in hah taka an thawhrim avanga hmingthatna an thawhchhuah ah hian naupang tha zawk te chu lo kawl ve mawlh tawh rawh se.

Engkima Chawngthu