Pastor chauhvin thu hril se

Khaw’nge, ro ka'n rêl sak ngawt teh ang che u. Hei, kan khawvel hi a buai ta lutuk a, kan hotute leh roreltute pawh an indaih lo hle mai. Ro rela thil ngaihtuah chet chetna hun pawh nei hleithei lovin hrileng leh mipui sum-pai mamawh tur thil buaipuiin an hmanhlel êm êm vek mai si a. Nangni mi nawlpui ho lah, facebook leh whatsapp ah te leh social media dangah in lo ṭul ve êm êm bawk sia.

Rorel pakhatna
Thuhriltu apui in tam lutuk! Pastor leh Upate thu in awih chuang bawk si lo. Kohhran leh Pawl tinah hian hun puma rawngbawltu Pastor an awm vek a, Pastor te chauh hian Pathian thu hi hril tawh se a ṭha ka ti mang e. Mahse, an indaih vek bik loh avangin hei hi chu a tih puitlin hleihtheih rih loh. A zira zir, Kohhran thurin leh Isua Krista zirtirna thu tak puang chhuak tura rawih te ngei hian Kohhran mi leh ringtute hi min enkawl se a ṭha in a him ber a ni. An thu i awih ang u khai.

Tunah chuan ‘gospel team’ hrang hrang a lo tam ta hle mai. Speaker te'n ṭhuihruai an han nei ve diah diah ṭhin lehnghâl a; khaw hrang hrangah an vâk chhuak bawk a. “Koh” ni ve lem lote pawh kal chhuak an awm fo awm tak e. Team ṭhenkhat phei chu in leh lo kalsanin an chhuak a, rawng an va bâwlna khuaah rei tak tak an châm a. A nihna takah chuan an hrawk châwm vek an ngai a. Lo mikhualtute tan phurrit an nihna lai a tam.

Pathian thu hi kan duh êm êm hlawm a. Kan ‘rinna’ chuan mi a ti taima in mite a ti thilphal a, kan nun a kaihruai hneh hle. Chu rinna avang chuan miin a in a kalsan a, an va kalna te'n eiin ṭha ṭha leh silhfen te an lo hlui bawk a. Hun leh thâ leh sum leh pai sengin ral mah se, hlohah an in ngai lo! Rinna avangin mite chuan buaina satliah mai mai te chu an hmu mam vek mai a ni. Mak deuh asin aw!

Kohhranin hun puma thawk turin ruai ve lo mahse thuhriltu ṭhenkhat chu Pathian thu hmangin ei an hmu ve tlat! Matthaia bung 6:25-26 a inziak “chungleng savate” anga in ngai tlat, Krista an rin tluk zeta mi pêkkhawm leh mi inphalte thawhlawma rinna nghat bur, “taksa thu” lungkham lo lui tlat pawh an awm maithei asin. Mahni thawh chhuah ngaihhlut nachang hre lo, buh ah leh seng tur chu khawi lamah, a tuh pawh tuh rêng rêng lo, Kohhran mite châwm thâu tura inngai tlat an awm thei bawk.

Hei erawh hi hria ula. Matthaia bung 6:28 a tarlan, “ram tuktinpar” emaw in-tih a, thawk lova ei ve ngawt in tum tur a ni lo. Kan rinna mak tak avangin Pathian rawngbawltute hi Mizoho hian kan ngaisang hle mai a. Amaherawhchu, “chungleng savate” leh “ram tuktinpar” ni-a inngai tlat ang maia hna thawh tum lo, thusawia vâk kual vâk kual ṭhenkhat nazawngte hi chu en dan chin tâwk in lo thiam a ngai. Tin, Pathian rawngbawla inpe (volunteer) te pawh, anmahni leh an chhungte mamawh phuhru turin rim takin hna an thawk ve tur a ni.

Thuhriltu an nih avang ngawtin anmahni thawh hlawh pawh ni lo, mi thilpêk leh thawhlawm tlingkhawmte hmangin an in hnangfâk reng tur a ni bik lo. Ṭhalai kut ke kim leh pianphung pangngai chuan kan theih ang tâwkah rim takin hna kan thawk tur a ni. II Thessalonika 3:10 a inziak ang khan, mahni ei tur chu kan hlawh chhuak ve tur a ni.

Ṭhalai zingah rawng­bawltu rau tak tak, thusawi thiam leh ei nahawm tak tak an awm nual ta. A lâr zual deuhte leh sawmtu ngah zual bik pawh an awm. Hêng mite phei hi chu mipui nawlpuiin an ngaisang êm êm a. Chuvangin, a lâr apiang leh râu apiangte khan mihring kan nihna anga kan mamawhte phuhrûkna kawngah intodelha rim taka hna in thawh ve a ngai. Matthaia bung 6:25-26 & 28 te hi lo uṭawk tur vawn ve tlur tur in ni lo. Pang a himdam chuan hna kan thawk tur a ni. Hei hi pulpit aṭangin nasa takin han sawi piap piap ula, ramin hma a sâwn phah dâwrh ang.

Kohhran ṭhenkhat a keh­darha pawl chhuak an awm zauh zauh chhan pawh hi Pastor ni lo, rawngbawltu intite’n thuhril danglam bik tak mipuiah an tuh vang a ni fo. Chutiang thuhriltute chuan mak angreng takin midang hneh theih riau dan hi an nei tlat pek a, ngaihzâwn-awm taka han awm dan an thiam bik te pawh a ni ve ang. Reilotê ah ho an nei thuai a, chûmite chuan a thim a var pawh thlu lovin an ṭan bur tawh mai ṭhin. Karl Marx-a’n ‘sakhuana chu opium anga ruih theih a ni,’ a lo tih angin kal sual laklawhte chu an rui tlat a, an râu chan pawh a ‘common lo’ tlangpui.

Vanram kâi lohte hi in hlau lutuk bawk! Kâi in tum lutuk na lamah hian vanram luhna kalkawng atana pawimawh ni lêm lovah in peng in peng a, kawng in bo fo mai. Ringtuten kan thupui ber chu - thih hnu piah lam ram, rinna a kan beisei, awm ngeia hriatna hmun – vanram a ni. Vanram kai tura kan inbuatsaihna kawngah te, ringtu awmdan tur kan in hrilhhriat dan kawngah te hian ‘him leh him lo’ a awm thei viau mai a. Chutiang thilah chuan, Pastor te sawi ngê ngê hi chu a lem a nuam a, pawm a hahdam a, rin a him ber a ni.

Lalzahawma, Kawlkulh