MI KA HMANGAIH VE NGAI ANIH CHUAN

Hmangaihna chu eng nge? Ka hre bik hauh lo mai! Kum 17 chhung khawvel hian min lo mikhual ve ta a, nunkhaw ningkhawngte hre ve zelin, “Aw! Khatiang khan keipawh ka awm ṭhin,” lo tihpui ve thei turin hling leh pangparte ka lo hrut sil ve nial nual tawh.

Ka rilru la naupangchhia leh sual rawng la kai lo chuan hmangaihna chu tawpintai nei lo turah a ngai. I hmangaih tawh miau chuan eng anga mihring tlaktlailo, thirchhe zawng pawhin a duh lovang tih tur pawh nise i kalsan lo turah ka ngai, i thei lo a ni lo, i hmangaih em a i duh lo mai a ni. I kalsan a, i tuithlar hmak thei a nih chuan i lo hmangaih hlek lo a nihchu!

Pathian pawh khan min hmangaih em avangin a fapa neihchhun min pe a, a tana channa lian tham lutuk mah nise mihringte a hmangaihna kha a sang em a ni. Mihringte sualzia hmuin, amah inhambuai peih lovin Setana’n a duh duha a tih turin mihringte kha hlamchhiah se, hmangaihna a ni lovang. Chu chu a ni thei mai ang em, “ First love never die” an tih ve teh chhen hi.

I hmangaih miau avangin amah aia ṭha tawng singsarih mahla, i thinlung erawh chu kha i hmangaih hming rem turin a la phu reng a; hun ṭhenkhatah phei chuan a hriat chhuah tir mah mah che a, i pawmlai kha i hmangaih hmasa ber hmingin i koh leh zoh ṭhin kha tiraw? I thinlung kil khat a la luah reng a, a thi thei lo a ni.

Mihring kawi lutuk, ngeiawm tham zet ka ni. Ka ngaihdan hnial leh tu bawk ka ni a, mi ngaihdan pawh ka hlah chuang lo. “Hmangaihna chu tawpintai nei lo a ni” ka tihah khian ka nuih a za hnuhnawh a, dawheh ka inti kher mai. Mihring hi phakar leh mahni hmasial lutuk kan ni.

Engvangin nge mi kan hmangaih? Kan tana hlawkna tur a lo awm vang bawk hi a lo ni leh ṭhin. I ngaihzawng kha i mil zawng a nih poh leh i hmangaih ang chu! Chu, a hmasialthlakzia chu. Ka chenpui theih tur, ka mil zawng, ka lawmna ṭawmpui tur leh ka lung­ngaihna inbunruah theihna tur ka mamawh a, ka duh ang chu ka hmu a, ka hma­ngaih mai a ni - mihring dan a ni. “Unconditional love hi, nu leh pain fate an hmangaih­na hi?” i ti maw? Han ngaihtuah chiang teh, khaw­vela investment ṭha ber chu human investment a ni.

Engvangin, nge nu leh pa chuan fa chu a kalsual hlauvin a zilh loh reng ang? An tar huna anmahni chawmtu tur a ni miau a, a fa chu sualin laktlak lo ta viau se tunge a tar hunah chawm ang? He kan hmasialna tenawm tak hi a khuh mawi nan a hmingah 'hmangaihna' kan vuah mai a ni lo maw?

'Undeniable love Pathian hmangaihna hi?' i ti maw? Thil i siam a, i thil­siam chu i ulukin i ngaina a, i thilsiam avang chuan i hlimin i inchhuan phah em em bawk a; chu i thilsiam duhlai chu i hmelma lian ber lakah i chan phal ang maw? Chan lo turin i theih­tawp i chhuah lovang maw? Pathian pawh khan chu chu a ti a ni lovang maw?

Han ngaihtuah zel phei chuan engkim tithei leh hria Pathian chuan a fapa chu a chan hlen dawn lo tih a hre reng awm asin. Thihna hnehin a ni thum niah a tho leh dawn tih pawh a hre lawk ngei ang. I hmu let leh ngei dawn tih i hriat pawisa chu puktir i hreh ngai ami?

Mi ka hmangaih ve ngai a nih chuan ka duh danin thlak ka tum lo ang. Amah a insitna turin engmah ka sawi lo ang a, a nihna ang anga ka hmangaih em avangin amah pawh a inhmangaih phah ve ngei ang. Mi kawi lutuk tih takah hmangaihna ka rin loh thu sawi lai mekin, “Mi ka hmangaih ve ngai a nih chuan,” te ka han ti kawkalh leh hnuhnawh a! Kei hi chu aw!

Engpawhnise hma­ngaihna chu a lo awm tak tak emaw, awm lo emaw, mihring nuai za tel dam chhan a ni, khuarkhurum thuk lutuka kan pil bo lai pawha beiseina min petu a ni.

Beiseina nei lo mihring chu nung hming puin ala awm ve mai mai a ni. Hma­ngaihna hi a awm emaw awm lo emaw, mi i hmangaih vang emaw khan miin a hmangaih vang che a he lei a nun chakna i neih kha thil hlu lutuk, pawisain a lei theih loh a ni. Chu thil neitu mihring chu mi vannei ber a va ni em!

H.Lalduhsaki (Kum 17)