ENG VANGIN NGE SAWRKAR ṬHA NEIH A PAWIMAWH?

Mizoram hi kan ram neih chhun a ni a, a tlùk chhiat hi kan phal tur a ni lo. Delhi, Mumbai, Kolkata-ahte in (flat) neiin awm mah ila, ṭhenawmte leh miten an rilru leh a taka min zawh fo tur chu “Khawi aṭanga lo kal nge i nih?” tih hi a ni ang. Hei hian a lantir chu Delhi, Mumbai, Kolkata mi dik tak kan nih lohzia a ni.

London, New York, Paris khawpui­ahte pawh hna thawkin in ṭha tak neiin inbêngbel mah ila, Mizorama piang leh sei lian tan chuan upat huna a khawharthlàk dan tur kan suangtuah thiam ṭheuh awm e. Heng ramahte hian khua leh tui nihna (citizenship) pawh nei mah ila, ram dang aṭanga pêm lut, khua leh tui nihna nei chawp kan ni dawn a ni. Second class citizen ang chauha min hmu pawh mi tam tak an awm ngeiin a rinawm. Mizoram hi neitu nihna tak tak kan neihna ram awm chhun chu a ni.

Chuvangin, ka thuziakte pawh hi Mizoram, kan ram neih chhun hi a tlùk chhiat loh a, a lo ropui zel theihna tur kawng nia ngaia ziah a ni.

Mimal emaw, pawl emaw tana huat tur lam ni lovin, kan zavaia ṭhatna tur leh ṭhangthar lo la awm zel turte hmakhua atan a ni tih chhiartuten min lo hriatsak ka duh a ni.

Khawvel chanchin (history) kan chhiar chuan roreltu ṭha pawimawh dan leh roreltu ṭha lote avanga ram leh mipuiin an tawrh nasat ṭhinzia kan hmu ṭheuh awm e. Heng thil thleng angte hi kan ramah hian a thleng ve ṭhinin, a thleng mek a ni tih kan hriat a pawimawh. Mizote hi harsatna lo thleng tur laka lo invèn làwkna kawngah hian kan ṭuan a fûm hle ṭhin a ni.

Kum 1985 vel khan ruihhlo hman dik loh (drug abuse) ṭhenawm state-ahte a nasat thute kan hre tawh a. Manipur-a kan tlangmipuite chuan, “Kan fapa hian drug rui lovin zû in zawk se ka va ti êm!” an tih ngawih ngawih ṭhin thute pawh kan sawi fo ṭhin a nih kha. Mahse sawrkar leh kohhran angin lo inven làwkna (prevention) mumal taka kalpui a ni lo.

Kum 1990 aṭangin HIV/AIDS natna kan buaipui ṭan a. Inkai chhawnna ber chu injection-na hriau inhman ṭawm (sharing needles) leh mipat hmeichhiatna hmanna aṭangin a nih thute tàr lan a ni ṭhin a. Khatih laia ngaih dan tlânglawn takah chuan Kristian kan ni a, hetiang harsatna hi Mizorama thleng ve turah kan ngai lo a nih kha! Kum 30 a lo ral meuh chuan mi sing hnih chuangin HIV/AIDS natna kan vei dèr tawh chu a nih hi! Hetiang lama mi thiamte chuan a takah chuan hei aia tam daih hi Mizoramah an awm an ring ngei ang.

Covid-19 natna pawh hi Pathian hnenah ṭawngṭai vak ila, kan him mai ang tih ngaih dan pawh kan nei hlawm a nih kha. Pathian rorel dan hre thiam tura ṭan làk a pawimawh a ni. Pathianin Israel faten a thu an awih loha rûl chuk na mite hmanga a hrem a, an sualte an sim hnuah Mosian mipuiten an ngen anga rûl chuk na mite tibo tura Pathian hnena a dil khan Pathianin rûl chuk na mite a tihbosak lo, dâr rûl khai kha a en apiang an dam ang a ti a nih kha (Number 21:4- 9). Hetah hian Pathianin Israel faten thil dila a thu an awih leh awih loh a hre duh niin a lang.

Zoram hi ram nuama siam tura ṭan lakna kawnga ṭangkai a nih theih beiseiin roreltu ṭha pawimawh dan leh roreltu ṭha loten ram an tihchhiat nasat theihzia tlem han tar lang ila.
1. British lehkhabu ziaktu lâr tak Agnes Castle-i chuan kum 1921-a Italy ram a tlawh chungchang heti hian a ziak. Italy ramah chuan eng mah hi mumalin a awm lo. Rêl (train) chhuah hun tur chu tar lan a ni nàin, darkar hnih hnuah a chhuah theih chuan vanneihthlak tak a ni. Bungrua Genoa khuaa kal tura chhinchhiah thlapte pawh hnathawktuten a hunah dah chhuak peih lovin Rome khawpuiahte kal leh daih mah se miten mak an ti lo. Ni hnih hnuah a lo kir leh mai ang an ti a. Mite'n mak an ti lo, thil thlen dan pangngai a ni. Tu ma'n sawisel pawh an tum lo. A chhan chu sawiselin awmzia a nei dawn lo tih an hriat vang a ni. Kum 1923 khan British chanchinbu mi A.J. Greenwell-a chuan Italy rama a zin chanchin chu heti hian a ziak ve thung a ni. Italy ramah chuan rêlte chu a hun takah an kal mai bàkah lehkhathawn leh telegraph-te pawh a thlenna tur hmunah a hun takah a thleng zel tawh a. Italy ram pumah nawrhna (strike) thawm rîvà hriat tur a awm lo. Sicilian khaw naupang motor car lunga vawm ṭhinhote leh Naples khaw naupang bawlhhlawh char khawma zuar ṭhinhote khan an thiltih ṭhinte bansanin, khawchhung leh kawngpuite an pâwl hla saa zai chungin an thian fai ṭhin a ni. Tin, mipuite an polite èm èm a, hmanlai Rome-ho tih danin kut dinglam phar chhuakin hlim hmel pu takin ṭhiante nen an inchibai (greet) ṭhin a ni. Kum rei lo te chhunga Italy ram inthlak danglam dan leh an nun dan ṭhat tawhzia kan hmuh chuan Benito Mussolini sawisel ṭhintute tan pawh ṭha tih loh rual a ni lo. (Source: The Traveller’s Daybook; A Tour of the World in 366 Quatations by Fergus Fleming). Italy ram mipui pangngai reng kha Mussolini chuan rei lo te chhungin nasa takin a tidanglam thei a nih hi. India ramah pawh roreltu ṭha chuan thil ṭha tam tak an state tân an ti thei tih kan hre ṭheuh ang. Entir nan, Nitish Kumar-a chuan Laloo-a officers, engineers leh doctor-te tho hmangin nasa takin hmasawnna Bihar-ah a thlentir a ni. Hetiang bawkin Delhi-ah pawh Arvind Kejriwal-a chu Delhi U.T Chief Minister mai ni chungin hmasawnna tam tak Delhi khawpuiah a thlen bawk a ni.

2. Liberia ram hi Africa khawthlang lama awm a ni a. Mihring hi nuai 47.3 vel an awm a, Kristian 85.5% an awm bawk a ni (2008 National Census Report). Kum 2004 khan Chris Mullin (British Labour Politician leh Minister) chuan Liberia khawpui Monrovia a tlawh chanchin heti hian a ziak. Monrovia khawpui en chuan Armageddon indona hnuhma ang mai hian a lang. Mi nuai 10 chuang an cheng a, tui a harsâ a, electric êng a awm lo bawk a. U.N sipaiho lo luh thlengin buaina lalpa (Lord of Chaos)-in ro a rel a, ṭhalaite chuan silai kengin an duh duh an that a, an rawk a, an pawngsual bawk ṭhin a ni. An khawpui chu a sawprawp nasa èm èm a, an in bangte chu silai mu tuarin a kaw chek chuk a, tukverh nei lo te, inchung awm mumal tawh lote leh kàng ût hiam huam an ni hlawm a. Heti chung hian heng inte hi an la luah reng tho a ni. Hetih lai hian kawtthler tinah Biak In a awm lawi si a! Chris Mullin-a chuan khawvelah hian Liberia anga Biak In tamna hmun hi a awm thei ang em? Kristian tam èm èm si, Kristian tak tlem bawk si, tiin a ziak hial a ni. A sap ṭawng chuan, “Can there be any place on earth that has as many church as Liberia ? So many Christians and so little Christianity” (Source: The Traveller’s Daybook; A Tour of the World in 366 Quatations by Fergus Fleming). Mizoram hi Liberia ram ang hian kan la awm ve thei ang em? Nge, Liberia ram kawng zawh ang hi kan zawh ṭan ve mek zel? Liberia ram hi eng hun lai emaw kha chuan Kohhrante pawh an hlimin an ropui hle ni ngei tur a ni. Hei hian roreltu ṭha pawimawhzia a tilang chiang hle a ni. Liberia ram dinhmun hian sawrkar ṭha a awm loh chuan Kohhran pawh a ṭhat theih bik lohzia a tilang chiang hle a ni. Kristian 85.5% lai awm mah se an ramah Dàn mumal a awm thei lo a, thuneihna leh sum duhna avangin mi sual rual tam tak an awm ta a ni. Roreltuten duhàm chintawk nei lovin ro an rêl a, mi hausa leh thiltitheite an lian tual tual a, mi retheite an rethei tulh tulh a, mi retheite retheihnain a vàwrtàwp a thleng a, ṭangrualin silai an lek ta a. Mi hausa leh neinunghote an rawk a, sum làksak kha intunnun nan an hmang ve ta ni berin a lang. Hetiang ramah chuan mi rethite aiin mi hausaten hrehawm an ti zawk ngei ang. Kan hmuh phàk reng Myanmar ramah pawh khian an sipai hotuten thuneihna leh sum an àtchilh avangin mipui rorèlna (democracy) chu paih bo dàn hlir an ngaihtuah ta a nih khi! Rorelna ṭha a awm loh avangin an ram leilung hausakna chu mipui vàntlâng khawsak tihṭhat nana hmang lovin mi tlêm té chauhin an hlawkpui ta a nih khi. Democracy a lo awm khan mipuite an hlim a, beiseina sâng tak neiin Mizorama awmte pawh tam tak an kir leh a nih kha. An khawngaihthlak hle a ni. Rorelna ṭha nei ngat se chuan Myanmar ram khi ram nuam leh hausa, miten an tlawh chàk èm èm ram a ni ngei ang. Kan ṭhenawm Manipur-ah khian an ṭhalai tan hna thawh tur a vâng èm èm a, a chhan ber chu Meitei khi tribal an ni lo va, vaiho (General Category) el (compete) turin an thiam tâwk bawk si lo a, ṭhalai tam tak an beidawng a, ṭhalaite hmakhua ngaihtuahin industry te din a ni bawk si lo. Sum deh chhuahna awlsam ber nia lang chu hel pawl silai keng zawm ni maia ngaiin, ṭhalai tam takin hel pawl an zàwm ta niin a lang. Sawrkar hnathawkte pawhin helho tan tihluihnain thla tin an hlawh aṭangin pawisa an pe ṭhin niin an sawi bawk.

3. Singapore lam hawi ve thung ila. Singapore hian Singapore thliarkar tê tak tê leh thliarkar tê lehzual (islets) 64 a huam a. Islet 64 zinga 20 hi mihringin an luah chauh a ni. A ram zau zawng hi 647.5 sq.km chauh a ni. Mizorama District hrang 11 zinga a tê ber District pawh a tiat mang lo a nih chu. Mihring chéng tam ber hi Chinese an ni a, a dawttu chu Malays niin a pathumna chu Indians an ni. Kum 1965 khan Malaysia aṭangin an indang (independent) ve a. An ram hi tê hle mah se, an ram roreltuten uluk taka ruahmanna siamin a ṭangkai thei tur ang berin an hmang a ni ber mai. An Prime Minister hmasa ber chu Lee Kuan Yew (LKY) a ni a, ani hi Singapore ram tungdingtu ber chu a ni. Khawthlang ram khawtlâng nun ṭha loten Singapore a luh ve hi LKY-a hian a hlau hle a, ani ngaih dan chuan mi mal zalèn viau ngawt mah ila, kan mihring nunphung kan hloh si chuan a ṭha chuang lo a ti tlat mai a ni. Hei vang hian Drug hralh rûk ching chu an khai hlum zel ṭhin. Kum 1975 aṭanga 1990 chhung khan Drug zuar mi 90 an khai hlum tawh a ni. Sawrkar a khauh hle a, Dàn kalha thil ti apiang chu Dàn angin na taka hrem an ni zel a, lung in an tàn loh pawhin awih har khawpa tam an chawitir ṭhin a ni. America tlangval, Michael Peter Fay, Kum 18 leka upa pawh kawng sira signboard tàr rùk leh mi car tihchhiat luih thubuaiah thla 4 tâng tur leh a mawngtama vawi 6 na tâwka vuak leh Dollar 2,200 (India pawisa cheng nuai khat leh sing nga vel) chawi tura a chung thu rèl a ni a. U.S.A President Clinton-a’n a dilpui avangin vawi 6 ni lovin vawi 4 vuakah chiah chauh hremna tihhniam niin, a bàk zawngah chuan a ngaiin hrem a ni tho a ni. Dàn rorelna hnuaiah chuan mipui an zalèn a, an thlamuang ṭhin a ni tih hi Singapore-ah hian a takin a hmuh theih a ni. Zan rei tak hnuah pawh nulate pawnfen chhing tak fêng chungin thlamuang takin kawtlaiah an kal thei a ni. Mi sual an awm palh ang tih hlaua hawi kual vel lovin an tum lam panin thlamuang takin an kal mai a ni. Hetiang nun hi keimah (a ziaktu) ngei pawh hian kum 1995 khan ka lo hmu ve tawh a ni. Hetiang boruak ṭha awm theihna chhan ber chu tu mah Dàn chunga lêng an awm lo va, tute emaw tân Dàn ding lai pawh fàn a awm ngai lo a ni ngei ang. Tichuan, Prime Minister LKY-a leh a hote chuan an ram aṭangin thil tam tak a thar chhuah theih lohzia hriain, an mipuiten ram dang aṭanga an mamawh hrang hrangte an lei theihna turin sum leh pai an deh chhuah dan tur ruahmanna hrang hrang an siamsak a ni. Tin, miten hma an sàwn zel theih nan education policy ṭha an siam a, mi chengte hman tlakin an siam a, hei hi an din chhuahna bul chu a ni. Thil mak tak nia an sawi ṭhin chu he rama chêngte hi khawvel hmun hrang hranga an awm chuan sual leh duhâm, rûk hmang leh an bula khawsak pawh nuam lo tak hnam ni mah se, Singapore-ah chuan an ṭha vek mai. Ṭhat pawh an tlin, ṭhat pawh nuam an ti a ni. Hei hi rorelna ṭha leh fel hrin chhuah a ni. (Source: Reader’s Digest, 1995 March Issue leh The Statesman’s Year Book by Brian Hunter, 134th Edition).

4. Japan ram khi Second World War khan a chhe hneh hle a nih kha. An ram economy kha a bul aṭanga ṭan ṭhat leh a ngai a. An ram roreltuten uluk taka ngaihtuahna hmangin, rei lo tê chhungin ram changkáng leh hausa an lo ni thei ta mai a nih khi! Buh leh thlaite uar a, ram danga thawn chhuah a, sum leh pai tam tak deh chhuah theihna ram an nei lo tih an inhria. Chuvangin, thilsiam lamah ṭan lain technology leh industry lamah an tlan ta a ni. Tin, ram a changkàn dawn chuan mipuite an taimain an rinawm tur a ni a, Dàn an ngai pawimawh bawk tur a ni. Heng mihring changkànna tura thil pawimawhte hi an inzirtir uluk a, an hnam nunah a bet ta tlat niin a lang. Sahoko Kaiji, Keio University-a Economist chuan heti hian a sawi, “Kawtthlerah hian i car hnutchhiahin a kawngkharte pawh kalh (lock) theihnghilh mah la, a tûk zing thlengin a ngaiin a awm reng ang. Car chhungah stereo leh bag ṭha tak pawh dah la, tu man an ru lo ang. Hmeichhiate chu hlim takin metro-ah chuangin, an bag khaiahte an wallets (pawisa bawm) langsàr takin an dah a, mipate pawhin mi tam tak zingah kal mah se, an kekawr Jeans hnung ipteah mobile te an dah mai ṭhin a ni. Tu man an ru dawn lo a ni tih an hria a ni. Tokyo khawpuia Shinjuku Station-ah khian ni tin mi nuaih 20 chuang (commuters) an veivak ṭhin a, bawlhhlawh hmuh tur a awm lo. Tin, mipui an nèlawm (friendly) a, an polite a, an thutiam an hlen chhuak ngei bawk ṭhin a ni” (Source : When China Rules the World by Martin Jacques). Washington khawpui pawh khu kum 1803 kha chuan Paris khawpui nen khaikhin chuan a hrehawmin a changkang lo hle ni ngei tur a ni. French Sawrkar-in an ram Palai (envoy) atana an ruat chuan Washington khawpui a zu thleng chuan heti hian a au chhuak hial a ni, “Ka Pathian, eng thil sual nge maw ka tih a, hetiang hmuna awm tura ruat (condemned) ka lo nih tàk mai hi !” (My God ! What have I done to be condemned to reside in this city). Rorelna dik leh fel a awm mai lo, mahse Pathian ringtu ṭha, ram hmangaihtute an lo chhuak zel a, an thawh rimna avangin America khu khawvela ram hausa ber a lo ni ta a ni. Heng Pathian ringtu ṭha (Puritans) hote kaihruaitu (guiding star) chu, “Roreltu (magistrate) chu ama duh dan emaw, mipui duh dan emawa roreltu ni lovin, Pathian duh dana roreltua ni.” A chian zawk theih nan sap ṭawng chuan heti hian ziah a ni, “Magistrate is the servant not of his own desires, not even of the people, but of his God” (Source : Profiles in Courage by John F. Kennedy). He thu hi Jehosaphata’n a aiawha roreltu a dahte hnena a thuchah nen a inang hle a ni (Chronicles 19:6&7). Mi dik lo tam tak karah dikna duhtute an ṭan tlat avangin hnehna an chang ta a, America chu ram ropui a lo ni chho ta a ni. Awlsam takin America khu ram ropui takah siam a ni lo tih i hre nawn fo ang u. Israel ram pawh khu an ram zatve aia zau khu thlaler, ram ro a ni chungin roreltu ṭha leh hmangchang hria an nei a, an thlaler hmunte chu thlai leh thil dang chin nan an hmang ṭangkai ta èm èm a nih khu! Tichuan, Israel chu ram changkâng a lo ni ta a ni.

5. America President John F.Kennedy-a thusawi (inaugural Challenge) mite ngaih san em em chu, “I ramin eng nge a tihsak theih che tih zawt lovin, eng nge i ram tan i tih theih tih zawt zawk rawh” (Ask not what your country can do for you, ask what you can do for your country) tih a ni. He thusawi ropui tak hi ṭha hle mah se, rorelna dik hnuaiah lo chuan tihhlawhtlin theih a ni lo. America ram roreltute chuan an mipuiten sawrkar hnena dil lo a, sawrkar ṭanpui thei zawk tur dinhmuna an din theih nan ruahmanna ṭha tak takte an siamsak a, ram ropui an lo ni ta a ni. He thusawi ropui tak hian Myanmar ramah chuan awmzia a nei thei rih lo ang. A chhan chu rorelna mumal a awm theih loh vang a ni. Dante Alighieri thusawi John F. Kennedy-an a ngaih sàn leh a sawi chhàwn fo ṭhin chu, “Ramin hun khirh tak a tawn laia ngawih chuh tlathote tan hremhmunah a sa lai ber dahsak an ni”(The hottest places in Hell are reserved for those who, in times of great moral crisis, maintain their neutrality) tih hi a ni. Mizoram pawh hian tunah hian hun khirh tak (moral crisis) a tawng mek a, ngawi renga awm a hun tawh lo a ni. Thusawitu ṭhenkhatin Mizoram dinhmun an sawi dan, “In kàng mek, nasa taka ṭhelh tuma ṭan làk loh chuan kàng ral mai tur” anga an sawi ṭhin hi a dik hlein a rinawm a ni. British mi ropui leh political philosopher, Edmund Burke-a chuan, “Mi ṭhate an ngawih reng chuan sual a punlun ṭhin” (The only thing necessary for the triumph of evil is for good men to do nothing) a ti a. Mi ṭha pui puiten sual do ngam lova an ngawih reng si chuan sualna chu a pung zel dawn tih hi thu dik awm sa a ni. Mizoramah hian miten engtin nge min ngaih ang tih vènthàwn vanga thil ṭha nia an hriatte pawh tingam lo mi tam tak kan awm niin a lang. Hei hi kan bànsan a hun tawh tak meuh a ni. Thil dik lo leh sualte huaisen taka do ngam turin kan Pathianin min beisei tih i hre nawn leh bawk ang u. A tawp berah chuan Hindu leh Mosolman-hote hian min thlir reng a, Krista nun mawi leh chanchin ṭha hi kan nunah hmuh an tum reng ṭhin a ni (Mat 5:16).

Dr. Lalnunthara