Kohhran leh a thununna
Nilai zan inkhawmah Mizorama Kohhran lian ber Presbyterian Kohhran chuan kohhran serh leh sang khawihna hun hmangin inngaihna suala tlute chu kohhran dan pawnah hnawt chhuakin a thunun ṭhin a ni.
Heng mite hi dan pawna an hnawh chhuah hian an in report ṭhin a, mahse kohhran hian inngaihna suala tlu hrim hrim hi a hnawt chhuak kher lo tih chu kan hre tlang hle.
Tun laia thil lar tak, sawi pawh zahthlak si chu sex video tih hi a ni a, khawi khawiah emaw hetiang video ṭha lo tak mi an che sual ngei a ni tih finfiahna awm ngei si hi a awm a, ṭhalai te hian an mobile phone ah hian hetiang chi video ṭha lo tak tak Mizo ni ngei si hi an kawl fo a ni. Video ni kher lo thlalak pangngai pawh leak out a awm ṭhin a, heng thil hian ngaihtuahna thui tak mimalah min siam a ni. Kohhran hian heng thil hi a thlir liam mai mai dawn nge a ngaihtuah zui ve dawn? tih zawhna zawh hi he article lo pian chhan chu a ni.
Finfiah theih ngei video lama lo lang te pawh hi an thunun hi keimah mimal chuan ka la hre hauh lova, hetiang hi a nih si chuan kohhran thununna tawk chin hi chu tlema huaisen deuh mahni inpuang ngei chinte leh nau lo pai lang chhuak ta chin hi a nih mai hmel. Kohhran hian thil hi a thlir dan a thlak hret hret a ngai ve ta hle a ni.
Tun hmaa nupui ru an inpuan hnu chauha an phuar ai mah khan video lama chiang taka hriat theih te pawh hi phuar ve mai hi tun lai khawvel mila chet a ṭha tawh zawk lo maw? A nih loh chuan kohhran hian inngaihna sual hi a haw lo a ang dawn si a ni.
Video kher lo pawh audio lamah pawh inngaihna suala tlu te, uire te, kohhran phuar theih tur tihte pawh hi a lang chhuak ta zauh zauh a, hetiang hian a ṭhente chu tleirawl lam te, a ṭhen te chu patling nutling phanchang tak tak te pawh an ni tawh; hei hi kohhran hruaitute hian tun lai khawvel tharah hian kohhran thununna lek kawh dan te pawh hi ennawn se kohhran thianghlimna leh kohhran thikthu chhiatna hi lan tir ve bawk ṭhin teh se.
MLA inthlan dawna ram hruaitu duhthu samna lehkha hmanga thuchhuah siam leh ringawt lo hian Mizoram tan kalphung thar kohhran hian nei ngam se a ṭhat a rinawm tawh.
John VL Ramlian3