Random versus random lo

Medical Operation Team hotupa Dr ZR Thiamsanga interview kha ka lo en ve a. Khatah khan random test tih loh chhan nia a sawi kha positive te a dahna tur leh enkawlna indaih loh a hlauhawm vang tih kha a sawi ngei a. Kha kha Covid-19 kan do dan a nih chuan kan sorkar kal dan hi kei ni mimawl hi chuan kan hrethiam ve phak tawh lo a ni.

Kha thusawitu kha politician a nihna aiin doctor tlawm­ngai tak a nih chhung a rei zawk a, politics ah chuan inzir tir mai a ni tih a chian em em chhan chu politician tak chuan ṭawng se kha zawhna kha chhan pial ve mai theih a ni. Chutih­laiin doctor fel tak a nihna kha a len zawk avangin a ruh langin a sawi ta piap piap mai a ni.

Tichuan MNF sorkar chu nasa takin a mualpho phah ta a, mi tam takin Dr ZR Thiamsanga an demna ka hmuh khan chhan vek sen a nih loh avangin, "Ama thu chu ni se random test a duh ang, sorkar thuin an kal a, positive enkawl­na a hautak avangin random test an ti ngam ta lo a nih kha," tiin ka chhan sak ngei ngei ang.

Health Depart­ment lam chuan random test chu tlin loah an inngai a, mah se MLA zingah mahni bial tana random test ti tura rua­hmanna siama Health Minister tihmual­pho hreh lo riau awm tiin Pu Robert Romawia pawh an lo puh ve leh ta tlat mai.

Bialtu MLA a nih angin a bial mipui­te tan test a buat­saih hi MNF sorkar kalphung tih mual­pho tumna leh Health Minister tih hming chhiat tumna lam a kawk lova, hei hi chu politics lama amah Pu Robert Romawia puh chhiat tumna ni zawkin ka ngai. "Mahni dinchanna tur a nih chuan party lama senior Dr Thangtea mual­phona turin random test a kalpui," tihte Whatsapp lama kan thu thehdarh duh dan a ni hi a vanduaithlak a, MNF leh MNF indo anga lan tir tumna politics tenawm tak a ni zawk lo maw? Hetianga thuziak chin hi.

Random test chung­changa sorkar dinna (stand) chiang tak TV interview naa sawi chhuaktu MLA leh ṭhahnem­ngaihna avanga random test kalpui tu MLA te hi an pahnih hian sorkar timualphotu pawh an ni lova, sorkar sum leh theihna an hriat chian avangin an ṭha­hnemngaihna thil tih a ni tih hi pawm ila. Ramdon leh dom lova inhnialna hi i duhtawk ang u.

K Lalhmingliana (Mahminga), Mission Vengthlang