VEGETABLES AND FRUITS SUPPLY CHAIN KHA

Nikum 2020 khan hripui avanga lockdown chhungin kut hnathawktute'n thlai leh thei rah an hralh theih dan tur te,mipuiin eitur an neih theihnante "Vegetables and Fruits Supply Chain" hi sawrkarin a din a ni a, a ṭ­ul ang zela chhunzawm tura tih a ni. Mizoram leh state pawn aṭ­angtein thlai leh thei chi hrang hrang lei khawmin motorin trip 164 lai phurh khawm a niin ṭ­angkai taka mipui hnena hralh leh sem a ni. Nikum April ni 27 thlenga thlai leh thei leina'na senso pawh Rs. 10,010,013 lai niin Rs. 94,34,997 man an hralh tih sawrkar thuchhuah aṭ­angin kan hmu a ni. Hei hian lockdown avanga mipui harsatna a chhawk mai piah lamah zokhaw lama kut hnathawktute thawhrah leisakna a ni tel hi a lawmawm lehzualna a ni. District hrang hrangah pawh Sawrkar hian hma a lak thu a sawi bawk.

Kumin hian nikum aiin nasa takin hri a pungin lockdown pawh a rei zawk fe mai a, Aizawl veng hrang hrangah pawn chhuak thei lo va hun rei tak inchhungkhung kan awm mek a ni. Vegetables and Fruits Supply Chain hi a thawm a reh ta riau a, zokhaw lam thlai leh thei rah leisaka phurh khawm thawm hriat tur a la awm lo. Zo khaw lam aṭ­angin Aizawl khawpuiah rim taka an thawhchhuah thlai leh theite chu a thlawnin min la rawn pe ta zel zawk a ni.

Zokhaw lama kan unaute hian an thlai thar hi an sum lak luhna ber a nih avang hian a hun lai hian ngaihtuahpui an ngai hle .

Lockdown avangin kar khatah Aizawlah Zirtawpniah chauh bazar hun hawn a ni a. Lo neitute avang tal pawh hian bazar hun hi kar khatah vawi hnih tal siam ni thei se, an thlai thar hralhna hun tam zawk siamsak hi an phu hle a ni. Chutiang tur chuan Sawrkar hian nikum lama a tih ang khan phur khawmsak leh se la, a nih loh pawhin zalen taka an thlai thar hralhna hun hawnsak a ṭ­ul hle mai.

Political party zawng zawng hian kuthnathawktute hi thu chuan an hmangaihin an ṭ­awngka lamah an hmang zel a ni ber a. Tun hun hi a taka hmangaihna lantir hun ṭ­ha a ni a, zo khaw lam unaute'n min hmangaih leh duhsakna avanga an thlai thar man an dawng duh lo hi a zahawm a, a chhan letna'n hian an thawhrim rah teltir dan ngaihtuah a hun takzet e. Kut hnathawktute tana in Manifesto ṭ­heuh kha han keu u la, thu chu tisaah han chantir vat teh u!

Vegetables and Fruits Supply Chain kha chhunzawm leh ni thei se, Horticulture dept. hian chak takin hma la thei se a duhawm hle mai.Sawrkarin sum harsatna avanga thlai leh thei leikhawmna tur a nei lo a nih pawhin, lo neitute'n an thlaite an hralh dan tur tal hi a hun (season) chhung rei loteah hian ngaihtuahsak an ṭ­ul hle mai. Thlai dah ṭ­hatna (Cold Storage)pawh hmun ṭ­henkhatah dah a nih thu pawh kan hriat kha, a la hmantlak turah ngai i la, tun hi a hman hun tak niin a lang .

Lo neitute'n hmun hla tak aṭ­anga an thlai thar lakhawma an phurkhawm lai video clip han hmuh khan an hah turzia a hmuh theih a, chung chu a thlawnin min la pe leh nghal. Khaw pakhat phei chuan darkar nga kea kalin an thlai tharte Aizawla pek tur an dahkhawm chu social mediaah pho lan a ni a. Heng thlai tharte hi thlai kumhlun lo an nih avangin a thar vanglai taka ṭ­anpui a, an mi duhsakna thlai tharte hi a thlawna dawng tawh lo vin, Aizawl leh district khawpui hrang hrangte hian i leisak tawh ang u.

Vegetables and Fruits Supply Chain hi a ṭ­ul dan anga chhunzawm tur tih a nih ang hian, thla hnih chuang kan in-lockdown tawh hnu hi chuan, engti kawng zawng emaw tala chhunzawm hi a ṭ­ul hle niin a lang. Rim taka kut hnathawktute thlai thar hi a ṭ­awih ral palh hlauh ang e.

H.Lalchhuanliana