CHHIM BIAL MIPUI TAN TEMPORARY RT-PCR LABORATORY DAH A NI DAWN TA!
June 23, 2021 khan RT-PCR Laboratory for chhim bialin, High Court-a PIL an thehluh chu Remote Video Conference hmangin ngaihtuah nawn leh a ni a. Sorkar ukil, Advocate General D. Das chuan, sorkarin RT-PCR khawl a dawn chu hman theiha install thuai a nih tùr thu Court a hrilh a ni.
June 22, 2021 a ICMR aṭanga an email dawn, damlo awmna ward bula RT-PCR Laboratory din chu a hlauhthawnawm thù erawh a sawi a, building hran sak a ṭul thù a sawi thung. Mahse, hetih rual hian ZMC a COVID-19 hri kái endikna RT-PCR Laboratory chu TB centre building-a a awm thù tarlan a ni bawk.
Court hmasa lama hriattir an nih angin, sorkar ukil hian Health & Family Welfare hnuaia thawktu hrang hrang sorkarin a neih dan a report a. Sorkar ukil sawi danin, Civil Hospital, Lunglei (CHL), Medical Superintendent chuan, May 13, 2021 khan CHL microbiologist Doctor chu RT-PCR online installation ti tùrin a thiam tawk lo a ni, tih a lehkhathawna a ziah tel thù a sawi a. CHL microbiologist chu ZMC ah training pek theih a nih thù leh chuti ang a nih loh pawhin Online installation thiam, microbiologist Aizawl aṭanga Lungleia an transfer mai theih tùr thu a sawi bawk.
Sorkar hnuaia PWD Department chuan, Lungleia RT-PCR testing laboratory dinna atan kum 2020 khan estimate chéng nuai 140 chuang hret siamin rawtna an thlen a, he sum dilna hi Finance Department chuan sum awm loh chhuanlamin a lo hnawlsak tawh a ni.
Civil Hospital, Lunglei tan building thar sakna tùr project chéng nuai 700 chuang man thehluh mek hi concept proposal chauh a la ni. NEC-in a approve a la ngai a, hun a la duh rei dawn hle nia tarlan a ni bawk.
Sorkar ukil, Advocate General D. Das chuan, Mizoram sorkar hnenah temporary/ makeshift Covid-19 RT-PCR Laboratory din tùra hriattirna a pek dawn avangin he Court-ah hian thu dang chu sawi vak ṭul loa ngaih a ni. RT-PCR temporary laboratory lo hman lailáwk tùr atan hian luhka hranpa a ṭul a nih chuan tuna building awm saah hian luhka hranpa siam chawp mai tùr a nih thù tarlan a ni.
Heti ang a nih avang hian sorkar ukil-te chu additional affidavit/an hmalakna court hnenah July 8, 2021 hmain an thehlut leh tùr a ni, tih a ni a. Hemi chungchang hi July 12, 2021 ah ngaihtuah leh a ni ang tiin, thù dah a ni.
Hemi chungchanga thil inthup nia lang, chiang ta deuh chu; Sorkar hian a thlawna an dawn RT-PCR khawl hi an bun a nih chuan hmingṭhatna (credit) hi Pu Zodintluanga'n a tél ngei dawnin an hria a, mipui ngaihsak lovin, Politics khelhna atan an hmang ta zawk niin a lang. Mipui pawhin a tawp tak tak an thlen ngam ring lovin, an in phun lungawi leh mai mai ang tih rinna an nei niin a lang a, sorkar hian a ring a tikhawng lui tlat niin a lang.
Mahse, PIL hial thehluh a lo nih tákah chuan sorkar pawhin Civil Hospital, Lungleia RT-PCR Laboratory dah theih a nih thù Court hmaah sorkar ukil kaltlangin an aupui leh ta ruái a, chhim bial mipui tan COVID-19 hri kái tam zawk endik theihna khawl chu temporary-in neih a lo ni dawn ta ni.
David Zochhuanmawia (Vida Hrahsel Saza)