PUTAR MANGANG AU AW

Kan hriat țheuh angin ka ram a hripui pun chak dan en hian a-va mangan thlâk ve le aw! Hripuia kan thih tam theih dan tur hriain Lunglei Hospital-ah mitthi dahna in lam an chei ta záwk em ni? He Covid-19 hripui kal zêlah, hri thar, Delta Viriant B.1.617.2 vei kan lo awm reng tawh tih hi hriain mitthi dahna indaih loh an hlau nge ni hri kai enna khâwl țha hman mai theih hman dan tur aia an ngaipawimawh tlat mai te hi a va mak em!

Mi țhenkhat mangangin PIL Hight Court-a an thehluh hnua Lungleia Laboratory din tura sawrkar hma lakna hi a lawmawm rualin, kan rama hripui kal mêk dan ațang hi chuan a mak lam deuh a ni. Tun hmaa mithiam rual sawrkarin a tirhte rawtna anga hma lâk záwk awm tak a nih lai a, a in sakna tur han laih țan thut mai chu, a hmanhmawh loh thlak èm mai. Kan thih tam deuh an nghak a ang deuh lo maw? A va run thlâk ve!

He hri hi politic a lak loh tur kan tih laiin, a sawrkar ber hian politic takin thil a kalpui em ni aw? An duh chinteah thil hi anti em ni? Kan MLA-te leh kan Doctor-te hi mi fel tak tak an niin ka hre hlawm si a. Anmahni ngei pawhin țha an tih Random Test-te pawh anti thei lo. Kan Health Minister Pu Thangtea tak hi ka khawngaih, a hun zawng zawng hripui do nan a hmang a, a hahzia hi mi zawng zawng hriat a ni. Tun a kan kal dan pangngai hi chuan loh theih loha hri kai tawh symptom nei tawh enkawl har tawh chauh enkawl tum kan ang a, kan dinhmun hi hlauhawm tak a ni. Tunah phei chuan hri thar, Delta Viriant B.1.617.2 a pangngai aia a lêt dawn thaw a kai darh awlsamin min chîm leh tawh nghal si. A mangan thlâk lutuk ta. Kan thih buai buai hma hian, kan mithiam rual, kan MLA leh Doctor rual te, mithiam dang, thil tithei deuhte u, kei mi máwl leh putar mai hian ka âwm a che u. Kan sawrkar hi a mawng a rit deuh a nih pawhin han dawm kâng teh u. “Pawisa a awm lo” tih te chu, sawrkarin thildang tih nan a nei țeuh a lawm, tun ang hunah chuan dam chhuah a pawimawh ber, thildang chu ti rih loh pawhin kan dam phawt chuan a tih theih hun a awm zêl. Thih hi chu a tâwp em mai. Kan thih buai buai hma hian țan i la ang u. Lalnu Estheri pawhin an chite dam nan chuan thih leh thih a tih kha, Lal hmaah dan lova a luh rap ang khan sawrkar procedure-in min chhan zawh tawh loh chuan kan ram leh mipui kan dam nan hma la turin mi fing leh thil tithei ka ngên tak meuh che u a ni. Sawrkar thu chu mipui chuan kan awih na-laileng a lawm. Mipui chhan turin mi fing leh bengvârte, thil tithei te ka ngên tak meuh che u a ni. Sawrkar officer fel leh thil tithei te u, in chhia leh țha hriatna hmang ngun teh u. A țha tur in hria a, a tih dan pawh inhriat kha. Hetiang tak manganna a lo thlen pawha kan theihna leh kan chhia leh țha hriatna kan hmang ngam lo a nih chuan, kumkhuain in in thiam lo kumkhua dawn a ni.

Sawrkar pawh in ngaihtuah sela, mitthi chunga lal ai chuan mi nung chunga lal a nuam záwk tih hriain hripui do tur hian tih tak zeta ke pên a chhuah a ngai ta. A ram mite kan dam miau loh chuan, sawrkar hian eng nge a tih chuan ang? Sawrkar chu mipui enkawltu tura thlan tlin, Pathian ruat an ni a, an mipuite mamawh ber chu a tih hmasak ber tur a ni hrim hrim. Kan hma lo awm zêl tur thlîrin tunah hian zoram kan dam nan mi zawng zawngin țan ila ang u.

Thingtlang rethei záwkte an fakawm. Khawpui hri avanga inkharkhipa awmte tan an va țha tak em! Pathian malsawm tlak an ni. Keini khawpui lam a thil tithei záwkte hian a têl phawkin kan ța ve a ngai ta a ni lawm ni? District tina RTPCR dah thuai thuai a ngai. A rang thei ang bera chet a hun ve tih huna kan ngawih reng chuan țhangthar chhuan lo awm lehte an zahawm dawn em mai. Hawh u, ke i pên chhuak tak tak ang u. Thingtlanga tun aia a darh phei chuan hmanrua a tlem si kan buai dan tur hi ngaihtuauh ngam pawh a ni lo. Damdawi lam thawktute pawh an tlem a nih chuan sawrkar hian mithiam leh thawk theite chu la thuai thuai sela, mi tlawmngaihna a innghat ngawt thei pawh kan nih tawh loh hi. Sawrkar Department dangte pawh hian an tih theih tur a awm zel, kan vaia țan lâk vut vut a hun ta. Țhalai kum naupang te te an han thi leh mai țhinte hi a van pawi em! Enkawlna an neih tlai vang a ni tlangpui. Hri hi symptom a lan hmaa enkawl chuan hneh awl tak a ni tih kan hre țheuh, symptom a lo neih tawh chuan a enkawl a hau tak bakah chhan an har tih chu kei aiin in hre záwk vek. Chuvangin tunah hian nawrpuia kan nawr a ngai tak meuh meuh a ni.

Tuna a țul hmasa ber pakhat chu Random Test neih vut vut mai hi a ni. Mihring tlém ber state ni si kan in enkawl hneh lo ber mai hi chu a tláwm thlâk lû deuh a lawm le!

India ram mihring tlûklehdingawn aia tam awmnaah hripui vei enkawl dam za-ah sawmkaw chuang an awm laiin keini chu za-ah sawmsarih awrh chauh dam kan ni a, India ram state ti țha bera sawi țhin kha tunah chuan kan kan țha ta lo ber mai hi a pawi tak zet a ni.

Engtin nge kan tih ang? Kan sawrkar hnuaia hnathawk ten an kar kal thei si lo a. Mipui lam ațangin i kar kal ang u ka ti a ni ber e.

Bawihpuia Pu