Hri leng kara tih loh tur thupek 10

Kan Bible-ah hian Thu Sawm Pek tih a awm a, he thu hi a letling a, Mizo ṭawngah chuan Thupek Sawm tih zawk awm tak a ni. Tuna kan sawi tur pawh hi Covid-19 leng kara tih tur leh tih loh tur Thupek 10 a ni ang.

1. Task Force member pawh ni ula Social Distan­cing leh Mask vuah inthlah­dah suh. He thu hi ho viauvin i hria a ni mai thei a, mahse Task Force duty in ṭhut bial luih luih hi hmuh tur an tam a, veng leh khaw ṭhenkhatah phei chuan chaw ei khawm te an awm - hei hian an ven ber hri a thehdarh thei a ni. Task Firce member duty hian social distancing hi ngai pawimawh hmasa ṭhin rawh se.

2. I ṭhiante kha hlau rawh. Kan hmelhriat an nih vangin Covid-19 an thehdarh thei lo emaw tih hi a awla mah se hmelhriat aṭanga kai an tam hle a ni.

3. Sorkar pawisa Out Door Gym siamna tur an tih chanchinbu lama an ziah kha Covid-19 avang tal pawh hian tih tawp nghal ni rawh se. Out Door Gym siamna man to uchuak tak kha mipuiin an hria a, social media a luah nasa tlat. Khatiang kha tuna Mizoram mamawh hi a ni lova, sports infrastructur lama sum senna tur awlsam tak tak ruahman ṭeuh hi a tam thei ang tih tawp ni tawh zawk rawh se.

4. Rapid Antigen Test hi a rintlak tak tak nge rintlak vak lo tih hi kan sorkar hian huaisen takin sawi chiang ngam rawh se. Mithiamte ziak hi English thiam chin chuan an chhiar thiam a, hetah hi chuan RAT hi positive zawn chhuahna rang zawk leh man tlawm zawk a nih vangin a ṭangkai 've tho' tih mai a ni. Negative a tih phei hi chu RT-PCR ah en dik leh tur tih a nih avangin RAT hmanga intih dam tum hi a rintlak tak tak nge rintlak tak tak lo tih sorkar hian mipui min hrilh rawh se.

5. Vak de de suh. Kuhva lei tur, meizial lei tur tih mai maiin kan vak kan vak a, hei hian hri a thehdarh tam. I inah khan tawm ve mai rawh.

6. I hmai tuam mai la, hrehawm tawrh peih ve deuh rawh. Hriin a man che chuan a hrehawm dan hi hmai tuam mai mai ai chuan a nasa zawk a, chuvangin hmai tuam hian hri a veng tia mithiamin an sawi chuan zawm ve mai rawh.

7. Lungleia RT-PCR tih vel hi political party hian sawi tawh suh se, a nin­awm zozai tawh - sawi chunzawm lo ang.

8. Lehkhabu chhiar tam rawh. Thil inhmeh lo tak niin ngai mah la a ṭangkai si a ni. Inah kan awm a, kan hman em em a phone kan bih reng a, chu ai chuan lehkhabu pakhat tal chhiar pawh a ṭha zawk.

9. Sorkarin a theih ang anga chhawmdawlna a pek chhuah hi a bei tham kan ti a nih pawhin a sawi nep zawngin sawi ngai suh. Sorkar hian pawisa a nei lova, Central aṭangin a dawn tur ang a dawng kim lo nasa a, hri dona atan pawisa a hmang tam bawk si a, indaih lo chung chunga pawisa a sem (mi harsate puihna) hi sawisel lovin a pek chhuah hi beitham mahse lawm taka pawm tur a ni.

10. Sorkarin sum ren rawh se. Sorkar hna­thawk­in hlawh an pek lai hian sorkar hian a sum hmanna hi renchem se, pawisa a hmanna hi 2023 inthlana tlak pui thei a ni tih hre reng rawh se.

Lalthazuala