Sorkarin min awl ve dawn em?
Mizoram sorkar chuan thuchhuah meuh siamin in luah man leh dawr luah man awl turin ngenna a siam a, dawr luah man leh in luah man hi an awl thei lo a nih pawha tihniam turin in leh dawr neitute a ngen a, he ngenna hi tih hlawhtlin theih ni se a lawmawm dawn hle a, he mi rual chiah hian sorkar lam pawh hian tih ve theih a neihte hi ti ve bawk rawh se.
In luah man avanga rum mek chhungkaw tam tak an awm tih hi thil chiang tak a ni ta. Tunah hi chuan thla tam kan in lockdown tawh a, chumi bakah chuan nikum lockdown leh tun kum lockdown inkarah hian eizawnna a lo buai tawh laklawh si, eizawnna thar la nei nghet hman bawk si lo, hna va thawh dawna thawh tur awm thei bawk si lo avangin patling hi mahni in luah chhungah an hui pup pup tih hi kan hriat ve a ngai khawp mai. In luah man pek a ngaih bakah electric bill pek a ngai a, tui connection hi a mala nei lo pawh an inchawi sem a ngai tawha khawpuiah chuan (a ṭhen chu in luah manah tui man hi chhiar tel nghal a ni) chumi bakah chuan chaw ei tur atan sum sen a ngai bawk nen khawpuia mirethei hi a rumin kan rum tawh a ni tih hi sorkar pawhin a hriat ve a hun tawh a ni.
He lockdown boruak rit tak karah hian he thu hi sawi chhuah loh chi a ni lova, chu thu chu hei hi a ni ta a ni: "Sumdawng tam tak hian an sumdawnna pangngai hi an chhunzawm thei tawh dawn lova, dawr luah man a thlawna an chawi a tam si a, an thawktute lawmman tlem tlem an pek a ngaih bawk avangin loan hmanga sumdawnna bul ṭan tute leh sumdawnna lama la lian vak lo mi tam tak hian eizawnna an chân tawh a, heng mite hi chu dawr luah man tlawm or dawr luah man tihhniam hi an phu ngawih ngawih a ni."
Thil reng rengin Side B a nei ṭhin kan tih tawh kha. Side B aṭanga thlir chuan in luah man leh dawr luah man hi chhungkaw tam tak eizawnna a ni a, loan-in in leh dawr an han sa a, a luah man aṭanga rulh tur a ni ta a, pawisa an lakluh loh chuan a building neitu hi an buai ve a ni. Chu bakah chuan mi tam tak hi chu a building neitute aia a dawr neitu hausa zawk an awm avangin tlawm kher an ngai lova, chu bakah sorkar hnathawk chu in luah man tih tlawm ve an ngai lo an sum lakluh a ngai reng a ni.
Sorkar zawk hian mirethei a ngaimawh chuan in luah man tlawm tura a au ang chiah hian tui bill leh electric bill hi ngaidam ve ta mai se, chu bakah chuan Chief Minister Relief Fund bawma pawisa thawh khawm hi sorkar hospital bungraw leina tura thawh ni lovin miretheite ṭanpuina (relier) atan liau liau hmang ve tawh em em bawk rawh se.
John C Laldinpuia